Esayi 8 - U TIENU MAAMA TILI 2013

Jaligi ki fie, jaligi ki fagi

¹ O Diedo den yedi nni: «Taa yaa tanpabu n yabi ki diani lipo yaa maama n tie ne: ‹Jaligi ki fie, jaligi ki fagi.› »

² N den yini siedi-dugikaabilie, lani n tie o kopadiciamo Uri leni Berekia bijua Sakari, ke bi yegi leni nni ki baa tieni siedi, ke n tieni o Diedo n den puogi nni yaala.

³ N den kua n pua yua moko n den tie saawalipualo kani. O den punbi ki mali bonjaga. O Diedo den yedi nni, yini o yaa yeli n tie ne: «Jaligi ki fie, Jaligi ki fagi.

⁴ Hali ke ki biga yeni daa bandi ki yedi: ‹N baa› leni ‹N naa› bi baa tugi Damasi piama leni Samari fagidi ki cuani Asiiri bado nintuali.»

Asiiri yaaba cua ki baa mi diema

⁵ O Diedo go den maadi nni ki yedi:

⁶ «Nani bi naa niba n fali Silowe Ñima yaama n puubi dindini, Ki mangi bi pala Letisini po leni Ramalia bijua po yeni.

⁷ Lani yaa po yo, ke o Diedo baa teni U kpenciamu yaa ñingola Ya n yabi ki go pia u paalu n duodi Ki kandi mi boanjaana kuli.

⁸ O baa fii ki sedi Juda po, O ñima baa gbie ki duodi, Ki pundi hali Juda diema tulu, O boantaana tandima baa gbieni A diema kuli, Emanueli!»

O Diedo ye leni ti

⁹ I nibuoli, kuudi mani boncianla, Kelima yi baa jie ki luodi. Yikuli n cengi bonŋanla, Yinba yaaba n ye hali foagima, Bogini mani bu toabu po. Yi baa jie ki luodi.

¹⁰ Ba yin jagi ke yi bua ki tieni yaala kuli, Liba kuli kan baa yuli. Yin maadi yaa maama mo kan tieni, Kelima U Tienu ye leni tinbe.

O Diedo n tie yin baa fangi yua

¹¹ O Diedo den maadi nni Yaa maama n tie ne, Wan den tandi o nuu yaa yogunu, Ki muubi nni ki tuodi ki waani nni, Ke min da ŋoadi bi naa niba sanu.

¹² Bi naa niba yaa yini yaala janbi, Yin da yini la janbi. Yin da jie ban jie yaala, Yin da jie la ba waamu.

¹³ Li Miali Diedo U Paaciamu Kuli Daano Tie yin baa yaa nua yua, O gagidi ki ŋani, Yi baa jie wani bebe yo, Yi baa yaa fangi wani bebe yo.

¹⁴ Yeni o baa yaa tie u kaangagidiŋamu, Ama o go baa yaa tie li yuboantanli, Li tantuudikaali Isidayeli dieliedima po, Taali leni diagu Jerusalemi yaaba po.

¹⁵ Bi niba boncianla baa tuudi Ki baa ki kua kua biba. Bi baa baa ku diagu nni kun cuo ba.

Mi guudima leni mi suginma yogunu

¹⁶ Kubi o naa siedo bonŋanla. Kubi mi naa bangima bonŋanla n ŋoadikaaba siiga.

¹⁷ N dugi o Diedo po, wani yua n buli o nunga Jakob diegu yaaba po. N dugi o po, hali bonŋanla.

¹⁸ N ye nekanba mini leni U Tienu n puni nni yaa bila. Ti tie sinankeene leni mi maalima bonla, Li Miali Diedo U Paaciamu Kuli Daano po, Isidayeli diema nni, wani yua n ye Siyon juali yuli po.

¹⁹ Bi baa yedi yi: «Gedi mani ki ban bu ku baagu, yaaba n maadi leni bi tinkpiba leni yaaba n soabidi ki bunbidi, ki go wangi yaala n faadi ki ye. Naani laa dagidi nibuoluba n bu wun dugi yaala po? Naani laa dagidi ban mia bi tinkpiba todima yaaba n fo po?»

²⁰ Bi yaa buali yi, yi baa guani ba: Li tie ban guani li bali maama leni siedi kane. Bi yàá tieni yeni, suginmiba kuli kan yaa ye bi niba po.

Yaa biigili n pia i jeje

²¹ Bi niba baa yaa puagi mi diema nni Leni li coagili leni mi koma. Mi koma yaa muubi ba, Bi pala yen baa be yogunuba, Ban soli bi bado leni bi Tienu. Bi baa yaadi ki noanli tanpoli,

²² Li yaa yuandi bi baa tibini Ki noanli tiipo, Ki sua ke paboanli, li biigili Leni i yanbani bebe. Bi yen baa sua ke bi se laa biigicianli nne.

²³ Ama li biigili kan waagi ki ye, Ki tinga yaaga n pia li paboanli nni. Kpiama U Tienu den teni ke Sabuloni leni Nefitali diema laa i fe, Yaa yogunu n kpendi ne o baa pa, Mi ñincianma yaama n ye Jurden kandima sanu ti kpiagidi, I nilanbuoli diema nni.