Esayi 7 - U TIENU MAAMA TILI 2013

Bi soani u tondu o bado Akasi po

¹ Juda bado Akasi den tie Yotam bijua, Yotam mo den tie Osiasi bijua. Akasi yeni bali nni, Siiri diema bado Letisini den taani leni Isidayeli bado Peka, Remalia bijua ki baa n tuogi bu toabu leni Jerusalemi. Ama baa den fidi ki paadi u.

² Bi den cua ki waani Davidi diegu nni yaaba, ke Siiri diema yaaba cua ki kali Efrayimi diema nni. Laa laabaalo den teni ke o bado Akasi leni o niba kuli tugusoama den sani, ke bi den digibi nani u faalu n figi li fuali nni tiidi maama yeni.

³ Lanwani, o Diedo den yedi Esayi: «Fii, fini leni a bijua yua n yi Sedi-Yabusi, ki gedi ki ban tuogi Akasi. O ye yaa ñinbuogu n ye a juana po ñinsanu juodima, yuu n goa o siekuodo koasanu po.

⁴ Ŋan yedi o: ‹Duani a yama ki da jie liba. A tugusoama n da sani a mudatalieda po, yaa da baa ki ŋubidi, bani Letisini, Siiri leni Ramalia bijua yeni kani.

⁵ Siiri yaaba, Efrayimi yaaba leni Ramalia bijua n jagi ke bi baa tieni a yaala n bia, ki maadi ki tua:

⁶ Tin gedi mani ki ban baa Juda bu toabu. Ti baa digi u dogu yaaba ki nugi ba hali ki paadi ba cain. Li yaa puoli, tin dini Tabeeli bijua li bali wan diedi u.

⁷ O Diedo maadi yaa maama n tie ne: Laa bonla kan cua, laa bonla kan tieni,

⁸ Kelima Damasi n tie Siiri yaaba dociamu, Letisini mo n tie Damasi dogu bado. Ne leni piiluoba n binamuu Efrayimi Diema baa pua ki yadi yadi, Ki kan go yaa tie nibuolu.

⁹ Efrayimi yaaba dociamu n tie Samari, Samari bado mo tie Remalia bijua.› Yinba Juda diema yaaba, Yi yàá sedi bonŋanla yi dandanli nni, Yi kan ti fidi ki mua jamiba kuli.»

Emanueli

¹⁰ O Diedo go den soani o tondo Akasi kani ke bi yedi o:

¹¹ «Mia a Tienu, o Diedo wan pa ŋa Mi maalima, Tanpoli nni bi ki tinga nni.»

¹² Akasi den guani ki yedi o: «N kan mia liba kuli, n kan biigi o Diedo.»

¹³ Lanwani, Esayi den yedi: «Yinba Davidi puoliŋuani, cengi mani! Naani yin den coagini bi nisaaliba yeni, Laa dagidi yi ke yi go baa ki coagini n Tienu?

¹⁴ Lani yaa po, o Diedo wani o ba Baa pa yi mi maalima. Diidi ki le, li puowandiali baa punbi. O baa maa bonjaga, Ki yini o Emanueli.

¹⁵ Ki biga yeni baa yaa di Mi naaŋankpama leni ti siadi, Hali wan baa bandi Ki yie yaala n bia ki gandi yaala n ŋani yaa yogunu.

¹⁶ Hali ke ki biga daa bandi Ki yie yaala n bia ki gandi yaala n ŋani, Yaa badiliediba n jiendi a yeni, Diema baa kpandi diegbena.

¹⁷ O Diedo baa ti cuani fini leni a niba po Ki taani leni a baa puoliŋuani kuli po, Yaa dabiada n daa den kpa cua yi buolu po. Ki cili Isidayeli yaaba n den paadi Leni Juda yaaba yaa yogunu, Ki ban pundi hali moala.» Bi li maadi Asiiri bado maame.

Ki diedi mi diema n kpendinni yaala

¹⁸ Laa daali, o Diedo baa fuoni Ki yini yaa sii n ye Ejipiti ñinsani juodima po, Ki go fuoni ki yini yaa naakpansii n ye Asiiri diema nni.

¹⁹ Laa sii kuli baa cua ki yaa ye ti joaloandi Jiidima kani, A tanciama mabinma nni, Ti tugandi leni i yankpaakaani kuli nni.

²⁰ Laa daali, o Diedo baa kuo ŋa Leni wan ledi yaa pengu u kpenciamu duoli po. Bi li maadi Asiiri bado maame. Bi baa kuo o yuli, o taana kobidi Leni o langbiadi moko.

²¹ Landaali ke yuakuli baa wubi Naañuayendo leni yanbidilie.

²² Mi naaŋanma baa yaa dua hali yaala Ke bi baa yaa di mi naaŋankpama. Yeni de! Yaaba n sieni mi diema nni kuli, Baa yaa di mi naaŋankpama leni ti siadi.

²³ Laa daali, yaa kaanu n pia Duven tiidi ñiana tudili Ke li dunga mo pundi ŋanjilifa kujapiena tudili, Baa tua ti konkondi leni a kongoaba n dini yaala.

²⁴ Bi baa yaa kpendi likani leni I piemi leni li dabanli, Kelima mi diema kuli baa yaa tie Konkoni leni kongoaba bebe.

²⁵ Ban den ko yaa juana po kuli, Bi kan go poandi lipo, Kelima bi baa yaa jie ti konkondi leni a kongoaba. Li baa tua naakpaakaanu, Ki tua i pe mo yaa duankaanu.