Esayi 66 - U TIENU MAAMA TILI 2013

Mi jaanmoanma

¹ O Diedo yedi mine: «Tanpoli tie n bali kalikaanu, Ki tinga mo tie n taaŋmaakaanu. Yi go baa fidi ki maa n po be yaa diebuolu yo? Bi, le n go baa fidi ki tua n po n fuodikaanu?

² N yaa nuu n tagi laa bonla kuli, Ki teni ke lani kuli ye. O Diedo n yedi yeni. Diidi n nuni n baa yaa maa yua yaa po: Lani tie o ninñinnilo yua n ye leni li paboanli, Yua n yen gbadi n maama ki yaa digibi.

³ Ban padi i ne maama, Bi kodi bi nisaaliba mo yene. Ban padi i pe maama, Bi kpaani i sangbanli moko yene. Bi yaa cuani mi pienma padili, Li yen tie duosoama yo. Bi yaa cua ki juu tulale, Li yen tie ke bi bua ki kpiagi i buli yo. Yaa niba n ye ne, ŋua bi sancele, Ki mangidi bi pala bi cancagintuona po.

⁴ Mini moko baa mangi n pali bi fala po, Ki teni yaala n baa cie bi jigi n cua, Kelima n yini ba ke oba kuli naa tuo. N maadi, ke bi naa cengi. Ama bi den tieni n po yaala n bia, Ki den mangi bi pala leni yaala n gundi n po.»

O Diedo n baa tieni yaala ki juodi

⁵ Cengi mani o Diedo maama, Yinba yaaba n gba o maama ki digibi. Yi kpiiba nani yi ki yaadi yi n yeli po. Bi tua: «O Diedo n nan doagidi o kpiagidi, Tin le yi pamanli naa!» Ama bani n baa le i fe.

⁶ Ku fuugu ña u dociamu nni, U nialu ña U Tienu diegu nni. Li tie o Diedo yaa nialu. O pa o yibalinba bi panpaani.

⁷ Hali ke u maditugukoanu daa cili, O jaligi ki mali. Hali ke ti madi fala daa cuo o, O mali bonjaga.

⁸ Ŋme n da kpa gbadi laa bonla? Ŋme n da kpa laa yaa bonla n tie ne? Naani bi baa fidi ki maa diema dayenli? Naani bi baa fidi ki maa nibuolu yenma? Li yaa baa tuo yeni, Siyon baa fidi ki yedi ke o mali o bila.

⁹ Naani n baa teni o pua n gbaani ki kan ma? O Diedo n yedi yeni. Naani mini yua n tendi ti madi Baa yie ban da ma? A Tienu n yedi yeni.

¹⁰ Mangi mani yi pala leni Jerusalemi dogu, Teni mani wun tua yi pamancianli, Yinba yaaba n bua u yeni kuli. Taani mani leni u ki yaa jeli, Yinba yaaba n biidi yi pala kelima upo,

¹¹ Ke yin ŋadi o biili, Yaali n pia i baagi ki guo. Lani n tie yin mangi yi pala, Kelima o kpiagikandikaadi po.

¹² O Diedo yedi mi naa maama: «Diidi, n baa teni mi yanduanma N yaa puubi ki caa upo nani u kpenciamu, I nilanbuoli mo yaa kpiagidi n yaa caa upo Nani yaa kpenu n gbie ki kandi yeni. Lani, bi baa yaa yua yi ki ŋaandi yi, Ki kaandi yi bi pana po ki jelini yi.

¹³ N baa yaa baagidi yi, Nani yaa biga ke o naa baagidi o yeni. Bi baa baagi yi Jerusalemi nni.

¹⁴ Yi baa le lani, yi pala n mangi, Yi kpaba mo n guani ki baa u fidu Nani li muabunli yeni. O Diedo baa teni o naacenba n bandi o paalu, O yibalinba mo n bandi o pabiencianli.

¹⁵ Diidi, o Diedo ye u mu nni ki kpendi, O toateliti tie nani o pinpinjoa yeni, Ki baa tuu o panli leni li pabiencianli, Ki tuu o panli mo leni u mu.

¹⁶ O Diedo baa jia ti buudi leni u mu. Li tie leni ki jugisiega yo, Ke o baa faligi nisaalimiali kuli. Li daali, o Diedo baa kpa niba boncianla leni o jugisiega.

¹⁷ Yaaba n gagidi ki ŋanbidi Ki go ŋuudi ki ŋanbidi biba, Ki kua i kuani nni, Ki ŋua yua n tie o nicilika puoli, Bani yaaba n ŋmani ti duonandi, Yaala n tie ti cagindi bonla Leni ti daponandi, Bani kuli baa bodi. O Diedo n yedi yeni.

¹⁸ Mini, n bani bi tuona leni bi yantiana. U yogunu pundi ke min taani i nibuoli Leni i mabuoli kuli, ban cua ki le n kpiagidi.

¹⁹ N baa tieni mi maalima bi siiga Ki soani bi siiga yaaba n sani ki cia Yaa diema n tie ne po: Tarsisi, Puli leni Ludi diema a dabantuada po. Tubali Yavan leni yaa kpendega N ye hali foagima, Yaaba n daa gbadi ke bi maadi n maama, Ki nan daa laa n kpiagidi mo. Bi baa togidi n kpiagidi i nilanbuoli siiga.

²⁰ Bi baa ñani yi kpiiba i nilanbuoli kuli siiga, Ki tugi ba i taami leni ti toateliti po, yaa toateliti n liibi, I buomi leni ti yuoyuodi po ki cuani ba, N joagagidikaali Jerusalemi kani. Bi baa tua pienma padili o Diedo po, Nani Isidayeli yaaba n kpendinni bi pienma pada Leni yaa tiagu n ŋani bonŋanla nni O Diedo diegu po maama yeni. O Diedo n yedi yeni.

²¹ N baa gandi bi siiga bi kopadicianba moko, Bani Levi buolu. O Diedo n yedi yeni.

²² Lanwani, nani min tieni Yaa tanpopaano leni yaa tinpanga Ke bi baa yaa ye n nintuali maama, Yi puoliŋuani leni yi yeli mo baa yaa ye yene. O Diedo n yedi yeni.

²³ Ŋmapaano n tuu ŋmapaano, Fuodima daali n tuu fuodima daali, O Diedo yedi ke mialifo kuli, Baa cua ki gbaani o nintuali ki pugi o.

²⁴ Lanwani, yi yaa ña, yi baa le Ke yaa niba n den fiini n po mi yiema yeni kuli, Kpe ki bili laalaa, Kelima bi sidibila kan kpe, Bi mu mo kan gbindi. Lanwani, li baa yaa tie nisaalimiali kuli po, Yaa bonla n gundi.»