Esayi 61 - U TIENU MAAMA TILI 2013

Mi faabima tondo

¹ O Diedo U Tienu Fuoma ye n niinni, Kelima o Diedo gandi nni, Ke min yaa wangi bi ninñinniba O laabaaliŋamo. O soani nni ke min baagi yaaba N ye li paboanli nni, Ki waani i yonbi ke bi diedi bi yula, Ki go waani a kpaada mo ke bi baa mi faabima.

² O soani nni ke min kpaani ki waani, O Diedo ŋanbili binli cuama, O go soani nni ke min kpaani ki waani, Ti Tienu pantuuli daali cuama, Ki baagi yaaba n ye li paboanli nni kuli.

³ N baa lebidi Siyon yaaba paboanli maalima, Ki teni ba ti kpiagidi lan lebidi Mi fantanpienma kaanu. N baa teni li pamanli tulale n gaa Li paboanli kaanu, Ti kpiagidi tiayiekaadi mo n gaa Li pabiidili kaanu Ke ban yaa yi ba mi teginma ticiandi, O Diedo tiŋuuke, yii n baa doagidi o kpiagidi.

⁴ Bi baa guani ki maa a diegbenbuona nni. Bi baa guani ki maa ki fiini Ban den bolini yaa kaani hali yogu. Bi baa guani ki maa ki ŋanbi Ban den bolini yaa dogi, Yii n den bodi hali yogu yeni.

⁵ Bi canba n baa cua ki yaa kpaa yi po yi yandi. Bi canba bijaba n baa yaa tie Yi kpakpaaba leni yi koaguudiba.

⁶ Ama yinba, bi baa yaa yi yi “Li Miali Diedo yaa kopadicianba”, Ki go yi yi “ti Tienu naacenba”. Yi baa je mi nilandiema kuli ŋalimano, Ki yaa jigini yi yula leni bi yaa kpiagidi.

⁷ Yi baa baa yaa kpiagidi n yabi tin lebidi yi fe. Bi den fiagi yi, ama moala, Yi pala mangi yin baa yaala yaa po. Yi diema nni, yi baa baa ki pugini. Yi pamanli mo baa yaa ye hali yaa yogunu kuli.

⁸ Mini Li Miali Diedo, n bua mi teginma, N nani bu subu leni mi biadima. N baa pa n niba bi tuona panpaani, Ki go kuani leni ba yaa ŋantaado n ki pia fidima.

⁹ Bi puoliŋuani yeli baa kpedi i nilanbuoli siiga. Bi bila yela mo n ña i nibuoli siiga. Yaaba n baa le ba kuli baa bandi Ke bi tie o Diedo n seligi yaa buolu.

Mi ŋanma tiadima yanbu

¹⁰ N baa mangi n pali o Diedo po, N pali baa mangi n Tienu po hali lan kandi, Kelima o lani nni mi faabima tiadi, Ki golini nni mi teginma kpalibu, Nani o puocaano calo n bobi, Bi nani o kopadiciamo n bobi, Bi nani o puocaano n yie o tiadi maama yeni.

¹¹ Nani ki tinga n yen teni Ki bonbulikaala n pudi maama, Ke u kuanu mo teni u bonbii pudi maama, Li Miali Diedo U Tienu baa teni mi teginma Leni ti pagidi n pudi I nilanbuoli kuli nintuali yene.