Esayi 60 - U TIENU MAAMA TILI 2013

O Diedo yendi Jerusalemi

¹ Fii ki sedi ki yendi, Kelima a yenma cua, O Diedo kpiagidi cua a kani.

² Diidi, li biigili ŋoagini ki tinga, Li biigicianli mo baa i nibuoli po, Ama o Diedo cua a kani, O kpiagidi mo doagidi a po.

³ I nilanbuoli baa cuoni a yenma nni, Bi badiba mo baa cuoni A yenma fuuli nni.

⁴ Yaadi a nuni ki diidi a gaanilindima. Bi niba kuli taagi ki kpendi a kani. A bijaba ñani foagima ki bugi a bisiaba ki kpendi ne.

⁵ Mi ñincianma nni ŋalimano guani ki cua a kani, Mi nilandiema piama moko baa cua a yaa kane. Laa bonla lema baa mangi a pali hali boncianla, Ki teni a pali n yaa pua libilibi kelima li pamanli po.

⁶ A yuoyuogola baa cua ki gbie a dogu, Ki taani leni Madiani leni Efa yaa yuoyuodi. Ti baa ña Saba po yo ki cua. Ti baa tugi wula leni a dugibila, Ki kpaani ki doagidi o Diedo kpiagidi.

⁷ Kedari yaaba yangola kuli baa taani a kani. Nebayoti yaaba petona mo baa yaa tie a pada po, Bi baa padi ba a pada, n padibinbinli po, Lan yaa mani n po bonŋanla. Lanyogunu n baa teni n kpiagidi N yendi n diegu.

⁸ Ŋmenba n yugi nani a tawala, Nani yaa kpaajedi n yugi ki caa Bi dieli po yeni?

⁹ A kpendega yaaba dugi n po. Tarsisi yaa ñinbiaciandi mo n tugi yuli, Ki baa ñani yi bila hali foagima Ki kpeninni ba leni bi ŋanjilifa leni bi wula, Kelima o Diedo a Tienu yeli po Leni Isidayeli Tienu Yua n Gagidi ki ŋani, Yua n jigini a yeni po.

¹⁰ Bi canba n baa guani ki maa a dogu bilini, Bi yaa badiba mo n baa yaa tuuni a po, Kelima n den pua ŋa n pabiencianli nni, Ama n ŋanbili nni, N go gbadi a po mi ninñima.

¹¹ A buliñoana baa yaa yaa u yogunu kuli, A kan luoni u yensiinu leni ku ñiagu kuli. N baa teni mi dielanma Ŋalimano kuli n kua a kani, Ki taani leni bi badiba leni yaaba n ŋua ba kuli.

¹² Yaa nilanbuolu leni yaa diema N kan soani a po kuli baa bodi. Laa nibuoli mo baa bodi cain.

¹³ Liban diema kpiagidi baa cua a kani, Sipre tiidi, olima tiidi leni buisi tiidi kuli Baa taani ki teni n kaangagidiŋamu n yendi. N baa kpiagi n taana n ŋmaadi naankani.

¹⁴ Yaaba n faligidi a bijaba Baa gbaani a taana kani ki pugi a. Bi baa yaa yi a dogu “Li Miali Diedo dogu”, “Isidayeli Tienu yua n Gagidi ki ŋani Yaa Siyon”.

¹⁵ Yaala n bi naani ŋan yaa tie puonanbangu, Ke oba mo kuli ki poandi a kani yeni, N baa teni ŋan tua ti jigidi bonla Yaa yogunu kuli po, Li pamancianli bonla Nifiima n tuu nifiima.

¹⁶ A baa ŋadi i nibuoli biima, A baa je bi badiba piama. Lani, a baa bandi ke mini n tie Li Miali Diedo, A Candaano, a Daafaabika, Jakob Paaciamu.

¹⁷ N baa cuani wula ki lebidi ti kumoandi, Ki cuani ŋanjilifa mo ki lebidi ti kuboandi, Ki cuani ti kumoandi tin lebidi ti daadi, Ki go cuani ti kuboandi tin lebidi a tana. N baa teni mi yanduanma n yaa kubi a, Mi teginma mo n yaa gobidi a.

¹⁸ Bi kan go gbadi ke bi maadi Mabinga maama a diema nni, Bi febu leni bolinma kan yaa ye a tinga nni. A baa yini a bilini yeli “mi Faabima,” Ki go yini a buliñoana yeli mo “ti Pagidi.”

¹⁹ U yienu ka go baa yendi a po u yensiinu, O ŋmaalo mo ka go baa yendi a po ku ñiagu. Ama o Diedo n baa yaa tie A yenma yaa yogunu kuli po. A Tienu mo n baa yaa tie a kpiagidi.

²⁰ A yienu kan go baa, A ŋmaalo mo kan go kpe, Kelima o Diedo n baa yaa tie A yenma yaa yogunu kuli po. Lanyogunu a kumoe dana baa gbeni.

²¹ A niba kuli baa yaa tie niteginkaaba, Ki baa diedi mi diema hali yaa yogunu kuli. Bi tie min ŋuu yaa benkpeli yeni, Ki tie n nuu tuonli, Ki doagidi n kpiagidi.

²² Bi siiga yua n wa ki cie baa tua niba tudili, Yua n tadi ki cie mo n tua Yaa nibuolu n pia u paalu. Mini Li Miali Diedo n baa teni laa bonla kuli N jaligi ki cua li yogunu yaa pundi.