Esayi 6 - U TIENU MAAMA TILI 2013

Esayi tuo o Diedo yiinu

¹ O bado Osiasi n den guani yaa binli, n den laa o Diedo, ke o kaa yaa bali kalikaanu n kpedi hali boncianla po. O liadicianli den wuli ki ladi ki gbieni li jaandieli.

² Serafininba den yiini o yuli po. Yuakuli den pia fiabiluoba: bi den pini bi nunmu leni fiabilie, ki pini bi taana leni fiabilie, ki yugi mo leni fiabilie.

³ Bi den kpaani ki tua biyaba: «O gagidi ki ŋani! O gagidi ki ŋani! Li Miali Diedo U Paaciamu Kuli Daano Gagidi ki ŋani. Ki tinga kuli gbie leni o kpiagidi.»

⁴ Li jaandieli buliñoana tanpuuna den begibi, kelima yaaba n den kpaani nialu po. Li jaandieli mo den gbie leni i muñii.

⁵ N den yedi: «Ŋain, n bia n yeni! N tie yua yaa ñoacuuna n joagini, ki go ye yaa nibuolu yaa ñoacuuna n joagini siiga. N nuni mo laa o Bado, Li Miali Diedo U Paaciamu Kuli Daano.»

⁶ Serafininba siiga nni, yendo den yugi ki cua n kani ki muubi li mukuanmoanli, wan den taa yaali li padibinbinli po leni u babu.

⁷ O den sii n ñoabu leni li mukuanli yeni ki yedi: «Line sii a ñoacuuna. A tagili ñani, a baa a tuonbiadi sugili.»

⁸ N den gbadi o Diedo nialu ke o tua: «N baa soani ŋme? Ŋme n baa tua ti tondo?» N den guani ki yedi: «Mini nne, soani nni.»

⁹ Lanwani, o den yedi nni: «Gedi ki ban yedi u nibuolu na: Cengi mani bonŋanla, ama yi kan gaa liba! Diidi mani bonŋanla, ama yi kan le puu!»

¹⁰ Teni bi naa niba pala n juagi, Biini bi tuba Ki pigini bi nuni. Lani n tie ban da le leni bi nuni, Ki da gbadi leni bi tuba, Bi pala n da gaa liba. Lani n tie ban da lebidi bi pala, Min paagi ba.

¹¹ N den yedi: «O Diedo, hali u laa yogune?» O den guani ki yedi: «Hali fala n baa nandi i dogi leni Bi niba ki gbeni yaa yogunu. Yaa yogunu ke ti diedi baa luo bi niba, Ke ki tinga mo baa pua nufanu ki kuodi.»

¹² Lanyogunu o Diedo baa gedini Bi niba hali foagima. Bi baa ŋaa mi diema cain.

¹³ Ba li yaa sua ke niba piiga siiga kuli, Niyendo yendo n sieni ki ye mi niinni, Bi baa lu bani moko u mu nni. Ama nani telebinti leni seni tiidi, Bi yaa pedi i ñiali, Yin go yen guani ki kpeli maama yeni, Bi yaa ñiana moko baa guani ki bundi Ki tieni yaa puoliŋuani n gagidi Ki ŋani yene.