Esayi 59 - U TIENU MAAMA TILI 2013

Ti tuonbiadi n paadi yi leni U Tienu

¹ O Diedo nuu naa koabi ki kandi Ki kan fidi ki faabi! O tubili mo naa kpagi ki kandi Ki kan fidi ki gbadi.

² Ama yi tagili n den cuani mi paadima Yinba leni yi Tienu siiga. Yi tuonbiadi n den pigindi yi o nunga, Ki teni ke waa cengi yi.

³ Yi nii joagini kelima mi soama po, Yi nibila mo ye leni i tagili. Yi ñoacuuna maadi i boandi maama Ke yi landi mo bunbidi mi biadima.

⁴ Oba kuli ki jaligidi o lielo leni teginma, Oba mo ki koa ti buudi nni leni teginma. Bi dugi yaala n tie fanma fanma po, Ki yieni yaala n ki pia mayuli. Bi punbi tugutongu, Ki mali yaala n ki tiegi.

⁵ Bi wugini a waalabijena ki poadi, Ki lu i diandiagaali. Yua n ŋmani bi jena kuli baa kpe. Ban wuugi yaa jenli yaa wogidi, Duduuno n baa ña.

⁶ Bi caba kan tuo ki tieni tiayiekaagu. Bi kan fidi ki lu ki pini biba. Bi tuona kuli tie yaa tuona n ki tiegi. Bi tugutongu mo ye bi nuu nne.

⁷ Bi taana tiini ki caa mi biadima po, Ki jaligi ki bua ki wuli yaa soama n ki pia tagili. Bi yantiana kuli tie yaa yantiana n ki tiegi. U nufanu leni mi bolinma ye bi sani nni.

⁸ Baa bani mi yanduanma sanu, Yaa bujiali n tiegi kuli ki ye bi fuuli nni. Bi koadi bi yula po i sangolimi, Yua n tagini laa sani kuli kan baa yanduanma.

U Tienu niba tuo bi tagili

⁹ Li tie lani yaa po yo ke yaa bujiali N tiegi foagi leni ti, Ke mi teginma mo ki pundi ti kani. Ti bi sugini ki baa mi yenma, Ama li tua biigili. Ti bi sugini lan yaa yieni Ama ti cuoni li ciñuuli nni.

¹⁰ Ti baali u bilinu ki tulibi Nani a juama yeni. Ti tulibi nani yaaba n luo i nuni yeni. Ti tuudi u yensiinu, Nani ku yenjuaboandigu yeni. Ba ke ti pia laafia, Ti naani leni bi tinkpiba yene.

¹¹ Tikuli duni nani ki fuayanbiadiga ursi yeni. Ti bunbidi yogunu kuli mo Nani mu kpaajiemu yeni. Ti bi sugini yaa bujiali n tiegi, Ama tii baa puu kuli. Ti bi sugini mi faabima, Ama mi foagi leni ti.

¹² Ti biadima yabi a nintuali, Ke ti tuonbiadi mo bu leni ti. Ti biadima yegi leni ti, Ti bani ti tagili.

¹³ Lani n tie tin tiendi yaa biadima Leni yaa yiema o Diedo po, Ki foagidi leni ti Tienu. Mabinga, yiema tuofaamaama Leni bunbidi li pali nni,

¹⁴ N teni ke yaa bujiali n tiegi sani ki foagidi, Ke mi teginma mo joandi, Kelima i moamoani tuudi Ki baa ki daaga nni. Yaa bujiali n tiegi mo kan fidi ki nagini.

¹⁵ I moamoani bodi ke bi fagi yua N sani ki foagidi leni mi biadima. O Diedo diidi ki sua ke li gundi Leni teginma n ki go ye.

¹⁶ Lani, o pali biidi leni ba niyendo n ki ye, Yua n baa jaandi ki mia o sugili. Lanwani o buagu n todi o, Ke o teginma mo n tie o dabanjali.

¹⁷ O lani mi teginma nani ti kudi liadili yeni, Ki cibini o yuli po mi faabima kusanli. O lani li pantuuli nani ki liaditediga yeni, Ki lani li nunponli mo nani li liadijali yeni.

¹⁸ O baa pa yuakuli o tuona panpaani. O baa wuli o pabienli o koanginkaaba po, Ki faligi o yibalinba nani lan dagidinni maama, Ki go pa a kpendega yaaba bi tuona panpaani.

¹⁹ Lani, nintuali yaaba baa yaa fangi o Diedo, O kpiagidi mo baa doagidi, U yienu n pudi naanpo yaaba po. Yibali yaa puubi ki cua nani u kpenu yeni, O Diedo Fuoma baa deli o.

²⁰ O daafaabika kpendi ki baa faabi Siyon leni Jakob buolu, Yaaba n lebidi ki ŋaa bi biadima. O Diedo n yedi yeni.

²¹ O Diedo yedi: «Diidi, mini wani n baa kuani Yaa ŋantaado leni ba: N Fuoma yaama n ye a po Leni n maama min kuani yaama A ñoabu nni yeni, kan ña a ñoabu nni, Bi a bila ñoana nni, bi a yaabila ñoana nni.» O Diedo n yedi yeni, Moala leni yaa yogunu kuli po.