Esayi 54 - U TIENU MAAMA TILI 2013

O Diedo guani ki pandi Jerusalemi

¹ Fini ki ŋoaliga, mangi a pali! Fini yua n ki mali, Yigini mi paadima yigimi, Fini yua n ki bandi maditugukoanu, Mangi a pali kelima ku puonanbangu Bila baa yaa yabi ki cie, Yua n taa ki ye leni o calo yaa bila. O Diedo n yedi yeni.

² Diadi a gbandieli fanma. Poabidi ki tandi a gbandieli caba. Tandi ŋa bonŋanla, Ki foagidi li baabi, Ki kpaa a kpakpaana lan yaa pa,

³ Kelima a baa pili ki yabidi Ganu leni jienu kuli. A puoliŋuani n baa diedi i nibuoli, Ki gbieni yaa dogi n ki den pia niba.

⁴ Da jie liba kelima a kan go le fe. Da tiibi leni fe kelima bi kan go fiagi a. A baa sundi a jafandi yogunu. A kan go tia a kpepuodi yogunu fe,

⁵ Kelima a tagido n tua a calo. O yeli yi Li Miali Diedo U Paaciamu Kuli Daano. A daafaabika n tie Isidayeli Tienu Yua n Gagidi ki ŋani. O yeli n tie: “Ki tinga kuli Tienu.”

⁶ O Diedo go tiadi a po ki yini a, Nani ban ŋaa yaa pua ke o ye leni Li paboanli yeni. A Tienu yedi: «Naani o joa baa fidi ki ñani O jawaapua?»

⁷ N den ŋaa ŋa u yogunu waamu po, Ama mi ninñincianma cuo nni Ke n baa guani ki taani a n kani.

⁸ Li pabienkandikaali nni, N den buli a n nunga yogunuba po. Ama n baa gbadi a po mi ninñima, Ki baa a po yaa buama n kan gbeni. Mini o Diedo a daafaabika n yedi yeni.

⁹ Li baa yaa tie n po nani Nowe yogunu yeni. Nowe yogunu n den poli, Ke laa ñima buolu kan go yadi ki tinga nni. N go poli leni a moko yene, N kan go bieni n pali leni a, N kan go jaligi a mo.

¹⁰ Ba a juana yaa bendi ki baali, Ba a joabila yaa begibi, N buama a po kan wadi, N yanduanma ŋantaado mo kan lengidi. O Diedo yua n gba a po mi ninñima n yedi yeni.

Jerusalemi dogu n baa faa ki tua maama

¹¹ Jerusalemi dogu yuu n den laa o falaciamo Ku tafaaciangu n pua yuu, Oba kuli n ki den baagi yuu, N baa biali u tana cilo, Ki baa tieni u tanpuuna mo leni safiri.

¹² N baa teni yaa tana n pia Mi ñuadima yo n maani Yi bilini po ki lindi yi. A buliñoana mo baa yaa tie Leni esikabukili yaa tana. A luolu mo baa yaa tie leni yaa tana Yaa dunga n pa.

¹³ Jerusalemi, a bijaba kuli baa tua o Diedo ŋoadikaaba. Bi baali mo baa yabidi.

¹⁴ A baa baa u paalu, Kelima mi teginma po. Ŋan foagidi a yuli leni ki mabinga, Kelima a kaa go jie liba kuli. Ba ti jawaanciandi mo kan go nagini a kani.

¹⁵ Bi yaa baa ŋa bu toabu, Li kan ña mini yaa kani. Yua n baa a bu toabu, Baa gbali ki baa a nintuali.

¹⁶ Diidi: mini n tagi o maano Ke o jugi a kuana ke u mu co, Ke o tagi ku jatiagu nani wan bua maama. Mini n didi go tagi yua n bolindi mo, Ke wan kua ku jatiagu yeni.

¹⁷ Ama ban tagi yaa jatiagu Ki koani leni a kuli kan fidi a, Yaa lanbu n buni leni a ti buudi kuli, A baa maadi ki guli bu. Lani n tie o Diedo naacenba faali, Lani n tie ban baa ke o Diedo saa bi po yaa moamoani. O Diedo n yedi yeni.