Esayi 53 - U TIENU MAAMA TILI 2013

¹ Ŋme n den daani ban den togidi ti yaala? O Diedo nuu paalu den doagidi ŋme yaa po yo?

² O den kpeli o nintuali nani li benkpeli yeni, Nani yaa jiinu n pudi ki tinkuonga nni yeni, Waa den pia bugima, bi ŋamuba Hali ke ti baa bua ki diidi o. Wan naani maama mo ki den tie Tin baa bua ki ñuadi yaala.

³ Bi niba den fali o, ki ŋaa o, Wani o falabiado nilo, yua n maani fala, O den naani leni ban den buli yua ki nunga. Ti den fali o ki nua ke waa tie puu.

⁴ Ama o den gaa ti yaa fala ki tugi. O den tugi ti yaa paboanle. Ama tinba, Ti den nua ke U Tienu n den guandi o, O biadima panpaani ki duoliti o ki faligidi o.

⁵ Ama bi den muu ki cibi o ti yaa yiema po yo. Bi den pua ki moagi o, Kelima ti yaa tuonbiadi po yo. Yaa fala n cuani ti po mi yanduanma yeni, Den baa wani yaa po yo. Li tie o yaa poagilima po yo, ke ti faabi.

⁶ Tikuli den yaadi nani i pe yeni. Yuakuli den tagi wan bua yaa sanu. Ama o Diedo den tuni wane ti tagili kuli.

⁷ Bi den faligi o, ki fiagi o, Ke o naa den yaadi o ñoabu, Nani ban caani yaa pebiga U yankodikaanu yeni. Nani ban moagi o pia kobidi ke O ŋmini maama yeni, Waa den yaadi o ñoabu.

⁸ Ban den jia o buudi Leni yaa tugutongu den kpa o. O nifiima siiga, Ŋme n den yagi o yama ban den ñani o yeni po? Bi den ñani o bi nifuodiba siiga, Kelima n niba biadima po Leni yaa fala n den baa baa ba po.

⁹ Bi den gbini o takuli bi nibiadiba siiga. O takuli den ye a piada siiga. Ba ke waa den tieni biadimiba kuli, Ke boandiba mo ki den ñani o ñoabu nni,

¹⁰ O Diedo den tuo ke bi pua ki moagi o, Ki waani o fala. Wan puni o miali ke li tua li padili yeni, O baa le o puoliŋuani, O miali baa foagidi, O Diedo yanbuama mo n tieni o nuu nni.

¹¹ Wan laa yaa fala li po yeni, O baa le li ñuadi, ban bandi o. Wani n naacemo yua n tiegi yeni, Baa saa niba boncianla po i moamoani, Ki taa bi tagili ki tugi.

¹² Li tie lani yaa po ke n baa teni Wan kali ti kpiagiciandi danba siiga, O baa taani leni bi paatieba Ki boagidi ti fagidi. Wan den puni o miali ki kpe yeni, Bi den coadi ki taani o leni i tagili danba, Kelima o den tugi niba boncianla tuonbiadi, Ki baa i tagili danba po ti candandi.