Esayi 5 - U TIENU MAAMA TILI 2013

O Diedo duven tiidi kuanu

¹ Cedi mani min yiini n danli po, N danlibuado yanbu o duvenkuanu po. N danli den pia o duventiidi kuanu Yaa tinga n pia ti bugidi nni.

² O den ŋanbi ki tinga, ki ñani a tana, Ki baa yaa tiidi n ŋani ki ŋuu. O den maa li diefoagili u kuanu siiga, Ki gbini u datuodikaanu, Ki sugini ke duven tiidi baa luoni Li bonluonkaŋanla. Ama li den loni yaa bonluonkaala n bedi.

³ Lanwani, moala yinba yaaba n ye Jerusalemi leni Juda, Jia mani ti buudi Mini leni n duventiidi kuanu siiga!

⁴ N go baa fidi ki tieni be yo N duventiidi kuanu po, Ke n daa tieni la? Be yaa po yo ke n den sugini ke u baa luoni Yaa bonluonkaala n ŋani, Ke u fii ki loni n po bonyuogidi?

⁵ Lanwani, n baa teni yin bandi Moala min baa soani n duventiidi Kuanu yaa tuonli. N baa fobi ku goangoangu ki lu, Yaa yandi n bua ban kua ki ŋmani, Yaa santagiba mo n baa, ban ŋmaa.

⁶ N baa lu ki diani u kuanu yeni. Oba kan coandi coandi i tiidi yeni beni. Oba kan ko ki gaani ki lindi yi. I konkoni leni a kongoaba baa pudi lienni. N baa waani a tawala mo n da go cedi Taaga n mi u niinni.

⁷ Li Miali Diedo U Paaciamu Kuli Daano Duven tiidi kuanu yeni, N tie Isidayeli buolu. Juda buolu mo n tie Wan den bua yaa tibu hali bonŋanla. O Diedo den sugini Ki le yaa bujiali n tiegi, Ama ki nan laa biadima bebe. O den sugini ki le mi teginma, Ki sua i kaani kuli janda bebe!

Yaaba n biendi o Diedo pali

⁸ Mi yebiadima baa ŋmaa Yinba yaaba n daa a diena, Ki nagindi aya po, Ki fenli i kuani ki pugidi iyii po, Hali ke fanma ki go ye. Yinba bebe n pia u yekaanu mi diema nni.

⁹ Li Miali Diedo U Paaciamu Kuli Daano N doagidi n po yaala nne: A naa dieciama ya n yabi ki go ŋani Baa tua diegbena, Oba kan yaa ye a niinni.

¹⁰ Duven tiidi kuanu yaa pundi Ekitaadi bonbitaa Laa kuanu nni bi kan fidi ki ñani Duven tiidi daama litidi piimuu. Yua mo n buli ŋalikama kilo kobiga Baa yendi kilo piiga bebe.

¹¹ Mi yebiadima baa ŋmaa yaaba N yen yagidi ki fii Ki ban ño mi dabiadima Leni yaaba n baa ki dua ki jadibi ku ñiagu Mi daama po.

¹² Bi ñu ki gaadi ki pua bi kogidiciandi, Bi lonmu leni bi yelimu, Baa faami o Diedo n tuuni yaala po, Baa faami o nii n tiendi yaala mo.

¹³ Lani n teni ke o Diedo yedi Ke bi baa taa o niba ki gedini u dolamu nni, Kelima baa bani liba, Mi koma n baa je bi bulicinba, Yi nifanba mo, u ñuñuunu n je ba.

¹⁴ Li tie lani yaa po yo ke bi tinkpiba Diema diadi mi nialu, Ki yaadi mi ñoabu boncianla. Bi bulicinba leni yaa niba n sieni kuli Baa jiidi lienni leni bi lancianbu kuli.

¹⁵ Li pundi bi niba kuli n miini bi yula, Ti japaadi danba n tibini bi yula.

¹⁶ Li Miali Diedo U Paaciamu Kuli Daano Baa baa ti pagidi o bujiali nni. U Tienu, Yua n Gagidi ki ŋani mo Baa doagidi ke o gagidi ki ŋani O teginma nni.

¹⁷ I dogi diegbena nni, i pe baa cua Ki ŋmani nani bi yankpaakaanu yeni. Bi canba baa cua ki je a piada bonpiakaala,

¹⁸ Fala baa baa yaaba yaa tuonbiadi N ñagini ba, ke bi kan fidi ki gaa bi yula.

¹⁹ Bi tua: «O Diedo jaligi, Wan jaligi ki soani o tuonli tin le, Isidayeli Tienu, Yua n Gagidi ki ŋani N jagi yaala n jaligi, Ki cua ki tieni tin le ki bandi o.»

²⁰ Fala n nandi yaaba n tua Ke yaala n bia ŋani, Ke yaala n ŋani mo bia, Ki nua ke li biigili tie yenma, Ke mi yenma mo tie biigili. Bi nua ke paboanli tie pamanli, Ke pamanli mo tie paboanli.

²¹ Mi yebiadima baa ŋmaa yaaba N nua bi yula yandanba, Ki tama ke bi tie yanfuodanba.

²² Mi yebiadima baa ŋmaa yaaba N tie dañobiema Leni yaaba n ŋanbidi mi dabiadima boncianla.

²³ Bi saagi i tagili daano po i moamoani Kelima o paabu po, Ki mundi o niteginka mo i moamoani.

²⁴ Li tie lani yaa po yo, Nani u mu n yen juu Ku moapiengu maama, Bi nani u mu n yen buoni Ti muakuondi maama, Bi jiini baa bedi, Bi puuma n suodi nani mi wagima yeni, Kelima bi yie Li Miali Diedo U Paaciamu Kuli Daano bali maama, Ki fali Isidayeli Tienu, Yua n Gagidi ki ŋani maama.

O Diedo yugidi o nuu ki baa pua

²⁵ O Diedo pali beni o niba po, Lani n teni ke o tandi o nuu ki pua ba. A juana wudi ki baa, Bi tinkpiba wuli i sani nni Nani ti baadi yeni. Ama baa leni lani kuli o pali daa kuugi, O nuu mo da li baa ki tiane.

²⁶ O yini yaa nilanbuoli yaa banli n foagi. O piebi ki yini u tinbianu yaaba kuli. Bi jaligi ki cua kaa pua biabia.

²⁷ Bi siiga nni oba kuli ki coagi, Oba ki tuudi, Oba ki gonbidi, oba ki goa, Oba kuli ciaga nni gbanñagidigu ki ñagidi, Oba kuli cacaagbansiama mo ki cie.

²⁸ Bi piemi kuli luani, Bi dabana mo kuli kpali. Bi taami taawoga naani leni a tana yeni. Bi teliti mo yaa taana n yaa tie Nani o pinpinjoa yeni.

²⁹ Bi dunli tie nani o yangbanñua. Bi duni nani a yangbanbila yeni. Bi yen cuo bi bonjekaala, ki yaa ban caa. Oba kan fidi ki gaa la mo.

³⁰ Landaali ku fuugu baa tieni Mi diema nni bi po, Nani mi ñincianma yaa fuugu yeni. Bi baa diidi mi diema nni Ki sua biigili leni paboanli bebe. Ku tawabiigu baa teni mi yenma n kpandi biigili.