Esayi 49 - U TIENU MAAMA TILI 2013

O Diedo naacemo

¹ Cengi mani nni, yinba yaaba n ye A kpendega po! Cengi mani bonŋanla, Yinba yaa nibuoli n ye hali foagima! O Diedo den yini nni Hali ke n da ye n naa tugu nni, Ki taa n yeli min ñani n naa tugu nni yaa daali.

² O den teni ke n ñoabu tua Nani yaa jugisiega n mani yeni. O den wuoni nni o nuu nni, Ki teni ke n tua nani yaa piemu n sondi, Ki ye o luoli nni.

³ O den yedi nni: «A tie n naacemo, Fini Isidayeli, min baa doagidi N kpiagidi fini yua yaa kani.»

⁴ Ama n den yedi: «N coagini n yuli fanma fanma bebe, Ki biandi n fidu yaala n ki ye po Leni fanma fanma po. N teginma ye o Diedo kani, N panpaani mo ye n Tienu kani.»

⁵ Moala o Diedo yua n tagi nni Hali n naa tugu nni, Yedi min tua o naacemo, Ki guani Jakob puoliŋuani o kani, Ki taani Isidayeli yaaba o kani. N baa mi yulolima o Diedo kani, Kelima U Tienu n tie n fidu.

⁶ O den yedi nni: «Min teni ke a tua N naacemo yeni daa dagidi. A baa fiini Jakob buoli yaaba, Ki guani bani Isidayeli yaaba, yaaba n sieni. N go gandi a ke ŋan tua mi yenma i nilanbuoli po, Ki teni n faabima mo n talini, Ki pundi hali ŋanduna banlu.»

Yaaba n gedi ti yonbidi guani ki kpeni

⁷ O Diedo Isidayeli Tienu Yua n Gagidi ki ŋani, Bi daafaabika yedi: «Ban fali yua, I nibuoli kuli n nua ke yua n joagini, Ki tie bi tugutondanba yonbo, Bi badiba baa le o ki fii ki sedi, Bi badijaba mo yaa laa o, Bi baa gbaani ki pugi o, Kelima o Diedo yua n tie dugika po, Leni wani Isidayeli Tienu yua n Gagidi Ki ŋani ki gandi o po.»

⁸ O Diedo yedi mi naa maama: «Li ŋanbili yogunu, n den guani a miabu. Mi faabima daali, n den faabi a. N kubi a, ki dini a ke ŋan danli leni bi niba, Ki fiini mi diema, ki guani ban den fie yaa tinmu.

⁹ N yedi a kpaada mo: ‹Ña mani!› N yedi yaaba n ye li biigili nni mo: ‹Doagidi mani ban le yi!› Bi baa fidi ki yaa kpaa i sankuni Ki baadi bi jiema a juana po.

¹⁰ Koma kan go cuo ba, Ñuñuunu moko kan go cuo ba. U faalu leni u yienu kan go duoli ba, Kelima yua n gba bi po mi ninñima N baa gobidi ba. O baa yaa cangi ba a ñinbuna kani.

¹¹ N baa lebidi n juana kuli, ŋan tua sani, Ki guani ki ŋanbi n sanjala.

¹² Bani nne: bi ña hali foagima ki kpendi, Bine ña nujienu leni nintuali po, Bine mo ña Sinimi diema po.»

¹³ Tanpoli, yigini leni li pamanli! Ki tinga n yaa ye leni li pamancianli! A juana mo n kpaani li pamanli kpaani, Kelima o Diedo baagidi o niba, Ki gba mi ninñima bi ninñinniba po.

Mini, n kan sundi yi po

¹⁴ Siyon yaaba den tua: «O Diedo ŋaa ti, O Diedo sundi ti po!»

¹⁵ Naani o pua baa sundi Wan ŋaandi yaa biga po? Naani waa gba o tugu nni biga po mi ninñima? Ba li yaa tie ke o pua baa sundi o biga po, Mini wani, n kan sundi yi po.

¹⁶ Diidi, n diani yi yela n nii po, N nua yi bilini u yogunu kuli.

¹⁷ Yi bijaba n tiini ki kpendi yeni. Yaaba n den teni ke yi dogu tua Diegbengu leni fanpienma yeni kuli, N tiini ki ña yi dogu yeni niinni.

¹⁸ Yaadi ki diidi mani yi gaanilindima kuli, Bikuli taani ki kpendi yi kani. O Diedo yua n fo poli ki yedi: «Bi baa tua a po nani ti kpiagidi bonyilikaala. Ŋan yie ba nani o puocaano N yie o tiadi maama yeni.

¹⁹ Yi dogu yuu n tua diegbengu, Yienbaadi, paboanli leni fe bonla yeni, Baa yaa wa moala u niba po. Yaaba n den duoliti yimo baa sani ki foagidi.

²⁰ Ban den fie yi bila yaaba, Baa yaa tua yi tuba nni: ‹Mi fanma wa ki kandi ti po, Ŋmiagi mani timo n baa ki kali.›

²¹ Yi baa yedi yi pala nni: ‹Ŋme n mali ti po ba, Kelima tii den pia biga. Ti den tie ŋoalimu, ti den ye ti yonbidi, Ke bi go ñani ti mo bi niba siiga. Ŋme n nan wubi bine? Diidi, ti den ye ti bebe. Bine mo nan den ye le?› »

²² Li Miali Diedo U Tienu yedi mine: «N baa tandi n buagu i nilanbuoli po, Ki sieni mi jakoandicabili i nibuoli po. Lanwani, bi baa pii yi bijaba bi buadi nni, Ki guani ba, Ki bugi yi bisiaba mo bi boacaba po, Ki guani ba.

²³ Bi badiba n baa yaa yua yi bila, Bi badisiaba mo n baa yaa tie yi biyuala. Bi baa gbaani tiipo ki pugi yi, Ki yaa liagi yi taatama. Lani, yi baa bandi ke n tie Li Miali Diedo, Ke yaaba n dugi n po kuli kan fiagi.

²⁴ Naani bi baa fie o jakoando n fagi yaala? Naani o niteginka n muubi yaala go baa ŋmadi o?»

²⁵ Lanwani, o Diedo yedi: «Bi baa fie o jakoando n fagi yaala, O tugutondaano n cuo yaala mo baa ŋmadi, N baa koani leni yi yibalinba Ki faabi yi bila.

²⁶ N baa teni yaaba n mabindi yi, N ŋmani bi gbananceli. Bi baa ño bi soaceli, Ki gaadi nani mi daama yeni. Lanwani, nisaalimiali kuli baa bandi Ke n tie Li Miali Diedo yi Candaano, yi daafaabika, Jakob puoliŋuani Paaciamu.»