Esayi 48 - U TIENU MAAMA TILI 2013

U Tienu waani yaala n baa tieni ki tie bonpanla

¹ Cengi mani line yinba Jakob puoliŋuani, Yinba yaaba n kubi Isidayeli yeli, Ki ñani Juda buolu nni. Yinba yaaba n polini o Diedo yeli nni, Ki jaandi ki miadi Isidayeli Tienu, Ki naa ye moamoani leni teginma nni.

² Bi yi bi yula u dogagidiŋamu yaaba, Ki dugi Isidayeli Tienu po, Yua yaa yeli n tie Li Miali Diedo U Paaciamu Kuli Daano.

³ N den tuodi ki waani hali yogu Yaala n den tieni hali mi cilima. Li den ñani n ñoabu nni, Ke n teni ke yi gbadi la. N ludi ki tieni laa bonla kuli yenma.

⁴ Ama nani min bani ke yi tie nipaaba, Ke yi tuli mo tie nani i kudopandi, Ke yi yutuna mo tie nani ti kumoandi yeni,

⁵ N den tuodi ki waani yi laa bonla hali yogu, Ki den teni ke yi gaa li laabaalo Hali ke li daa cua ke yin da ti yedi: «Ti bulo n tieni la, Li tie tin kpie yaala, bi tin duadi yaa nannanli, N teni ke li tieni.»

⁶ Yi tuodi ki bandi! Yin faami laa bonla kuli po! Yimo, yi kan pa li laabaalo? Moala n baa teni yin gbadi li bonpanla, Yaala n bi ye ŋasiili nni ke yi daa bi bani la.

⁷ Li tie moala ne ke laa bonla tagi. Laa tie hali yogu ka, Kelima ki taa ki pundi hali dinla, Yi daa bi gbadi liba kuli lipo, Ke yin da ti yedi: «Diidi! Ti bi bani la.»

⁸ Yi daa bi gbadi liba kuli lipo, Yi daa bi bandi liba kuli mo, Yi tuba mo daa den gaa li laabaalo, Kelima n bani ke yi tie janbiciami danba. Yi den tie niyiekaaba hali yi naa tugu nni,

⁹ Kelima n yeli po, n sieni n pabienli. Li tie ke min bi dagidi ki baa Yaa kpiagidi po yo, Ke n cedi yi.

¹⁰ N den tongi, ki nandi yi ki baa biigi, Ke laa tie nani ban nandi ŋanjilifa maama ka. Ama n den biigi yi leni fala.

¹¹ Li tie mini yaa po, Li li tie mini yaa po lige ke n tieni yeni, Kelima n yeli baa gaa lede ki biidi yeni? N kan tuo ki taa n kpiagidi ki ban teni nitoa.

Yua n tieni U Tienu yanjagili

¹² Cengi mani nni yinba Jakob puoliŋuani! Min yini yinba yaaba Isidayeli yaaba! Mini lige, mini n tie o nikpialo, Mini n go tie o nijuodika.

¹³ N nuu n bili ki tinga tanpuuli, N nujienu mo n dadi ki tandi tanpoli. N yaa yini tanpoli leni ki tinga, Bikuli yen taani ki cua yenma.

¹⁴ Yikuli, yin taani ki cengi mani! Yi siiga ŋme n den puni laa bonla laabaalo? O Diedo n bua yua yeni, N baa tieni U Tienu n bi bua ki tieni Babilonni yaala. O nuu baa pua bani Kalide yaaba.

¹⁵ Mini de, mini n li maadi yeni! Mini n yini o ki teni ke o cua. O tuonli mo baa cuoni o po.

¹⁶ Nagini mani nni ki cengi! Hali mi cilima, mii den maadi wuoli nni, Hali laa bonla cilima yogunu mo, N den ye likani. Moala mo o Diedo U Tienu N soani nni leni o Fuoma.

¹⁷ Isidayeli Tienu yua n Gagidi ki ŋani, O Diedo yi Daafaabika yedi: «Mini Li Miali Diedo yi Tienu N baa tundi yi, ki gobidi yi, Yin baa yaa cuoni yaa sanu nni. Li tie yi ŋamu po yo.

¹⁸ Yi yaa bi cengi n ñoamabona yo, Yi yanduanma bi baa yaa tie nani u kpenciamu yene. Yi teginma mo n yaa bi tie Nani mi ñincianma ñingola yeni.

¹⁹ Yi puoliŋuani bi baa yaa yabi, Yi bila mo n yaa yabi nani i tanbiili yeni. Bi yela mo kan bi bodi n nintuali.»

²⁰ Ña mani Babilonni nni, Sani mani ki ña Kalide yaaba siiga. Leni li pamanli kpaani, Yin kpaani ki waani laa laabaalo, Hali yaaba n ye u tinbianu n gbadi. Yin yadi li laabaalo ki yedi: «O Diedo daa ki faabi o naacemo, Jakob puoliŋuani.»

²¹ Ñuñuunu kan go cuo ba, Wan baa kuani ba yaa tinkuonmu nni yeni. O baa yagidi ku tangu, Ki teni mi ñima n pudi bi po ku tangu yeni po, Ki yaa puubi.

²² O Diedo yedi Ke yanduanma ki ye bi nibiadiba po.