Esayi 47 - U TIENU MAAMA TILI 2013

Babilonni yaaba kpiagidi baa jiidi

¹ Yinba Babilonni dogu bisiaba, Jiidi mani ki kali ku tangbangu nni. Yinba Kalide yaaba bisiaba, Jiidi mani yi bali kalikaani po, Ki kali tiipo, Kelima yi kan go baa ban yini yi: «Yaaba n ŋani, Yaaba n mangidi bi pala mi yema po.»

² Taa mani li naali bindiliedi, Ki naani mi yoma. Libidi mani yi cabilibinkaana, Ki ka yi liada hali yi pana, Ki poandi i kpenciami nni.

³ Yi mubima baa doagidi ban le yi fe. N baa tuu n panli. Niloba mo ki ye, yua n baa yie n po.

⁴ Ti daafaabika yeli n yi, Li Miali Diedo U Paaciamu Kuli Daano, Isidayeli Tienu yua n Gagidi ki ŋani.

⁵ Yinba Kalide yaaba bisiaba, Gedi mani li biigili nni, Ki wuoni ki kali suo, Kelima bi kan go yaa yi yi “Mi diema badisiaba.”

⁶ N pali den beni n niba po, Ke n teni ke bi laa i fe, Ki den taa ba ki tieni yi nuu nni. Ama yii den gbadi bi po ninñimiba kuli. Yi den tuni ba o jakpelo yaala n kpiagi.

⁷ Yi den tua: «Tinba n li baa yaa tie Bi badisiaba yaa yogunu kuli.» Yii den tia ki kuani laa bonla yi pala nni. Yii den tiadi ke li baa baa u bianu.

⁸ Moala cengi mani line, Yinba yaaba n mangidi yi pala Leni mi yema, ki kaa ke yi jigi co. Yi tua yi pala nni: «Tinba, tinba bebe lige, Yaala n sieni kuli tie fanma. Ti kan tua kpepuona abada. Ti kan bandi maakuuga mo n tie yaala.»

⁹ Laa bonliedila baa nandi yi, Ki taani ki cua yenma dayenli nni. Lani n tie ki maakuuga leni ti kpepuodi. Yin bogini maama kuli, Yi buligbandi leni yi ñoagi n da maama kuli, Laa bonla baa baa yi leni lan pia yaa fala kuli.

¹⁰ Yi den dugi yi biadima po, Ki den tua: «Niloba ki nua ti!» Yi yanfuoma leni yi bancianma lebidi yi yula, Ki teni ke yi go den li baa ki tua yi pala nni: «Tinba, tinba bebe lige, Yaala n sieni kuli tie fanma.»

¹¹ Fala baa baa yi, Ke yii bani wan ñani naani. Fala baa ŋmaa yi, Ke yi kan fidi ki lagidi o. Mi bolinma mo baa ludi ki baa yi po, Ke yii bani man ñani naani.

¹² Yin yaa baa ki se yi buligbandi Leni yi ñoagi nni, Yin den puni yi yula yaa tuona po, Hali yi panma nni, Daalinba li fidi yin ti baa ñuadiba lienni. Bimo, li fidi bi niba n yaa jie yi.

¹³ Yi coagini yi yula leni mi lingima. Yaaba n yaadi ki nua tanpoli, Ki diidi u yienu leni i ŋmaali, Ki diidi ŋmapaano kuli, Ki wangi yaala n baa cua kuli, Coagini bi yula.

¹⁴ Diidi bi baa bodi nani u mu N juu yaa muadi yeni. Bi kan fidi ki faabi bi yula leni u mu yeni. Laa tie ban pua bi dupen leni yaa mukuana ka, Bi ban kaa ki yie yaa mu ka.

¹⁵ Yin juogidi leni yaaba hali Yi panma yogunu tie yi po yene. Yin coagini yi yula leni yaala, N baa juodi maama n yeni. Bi siiga yuakuli baa yaa puagi o kaanu, Bi siiga oba mo kan fidi ki faabi yi.