Esayi 46 - U TIENU MAAMA TILI 2013

Babilonni buli tingbali

¹ O bulo Beli gbaani, O bulo Nebo mo buani, Bi taa bi nannana ki tuni a ti yandi. Yin li duondi yaaba yeni, Bi ji tugi bane ke bi tua tugikpiagili Yaa yanga n coagi po.

² I buli yeni buandi ki go gbaandi, Ki kan fidi ki faabi ban tugi Bi nannana ya yeni. Bi baa gedini bani mo ti yonbidi.

³ Cengi mani nni yinba, Jakob puoliŋuani, Leni yinba Isidayeli buolu siiga Yaaba n sieni yeni, Min den taa yaaba yaa tugili hali Ke bi da ye bi naa tugu nni. N tugi yi hali yi maadaali!

⁴ N li baa yaa tie yenme hali yi podi nni, N baa yaa kubi yi hali yi yukobipiendi nni. Mini n den tugi yi, n go baa tugi yi, Ki kubi yi ki go faabi yi.

⁵ Yi boagindi nni leni ŋme, Ke mini leni wani n yaa da? Yi baa nandi nni leni ŋme, Ke mini leni wani n fidi ki yaa naani?

⁶ Bi yogidi ki ñani bi boagili nni Wula yua n bi ye lienni, Ki biigidi bi ŋanjilifa U kpiagu bonbiigikaala po. Bi pa yua n tuuni i panpaani, Ke wan duadi bi po u bulo, Ban baa yaa ñuandi ki kpiagidi, Ki go gbaandi ki pugi yua.

⁷ Bi yen bugi o bi boacaba po, Ki tugi o ki ban bili o wan baa yaa ye naani. O kan fidi ki ŋmiagi o kaanu. Bi yaa yi o O kan fidi ki tuo, O kan fidi ñani oba kuli li paboanli nni.

Mi faabima naa go foagi

⁸ Tiadi mani lipo ki nan tua jaba, Yinba bi niyiekaaba yeni. Kpaagi ki faami mani li bonla yeni po bonŋanla.

⁹ Tiadi mani hali yogu yaala n den kpa tieni, Kelima mini n tie U Tienu. Tientoa ki ye, n tie U Tienu! Liba mo ki naani leni nni.

¹⁰ Hali mi cilima n den wangi yaala N baa faa ki cua, Hali yogu mo, n den tuodi ki wangi Yaala n daa tieni. N yedi: n yanjagili baa tieni. N baa tieni min bua yaala mo.

¹¹ N yini o kaabo ke o ñani puoli po, Ki yini yaa nilo n ñani yaa diema N foagi leni ne, ke wan kuani Min den jagi ke n baa tieni yaala. Min yedi yaala, n baa teni lan tieni. Min tia yaala mo, n baa tieni la.

¹² Cengi mani nni, Yinba yaa niba yaa pala n juagi Ki go foagi leni mi teginma yeni.

¹³ N teni ke n teginma nagini. Maa go ye foagima. Li kan go waagi ke n faabima baa cua. N baa kuani ma Siyon nni, Ki pa Isidayeli yaaba n jigidi.