Esayi 45 - U TIENU MAAMA TILI 2013

Sirusi, U Tienu n gagidi yua

¹ O Diedo maadi wan gandi Sirusi yua yeni po, Wan cuo yua yaa nujienu, Ki baa guli i nilanbuoli o nintuali, Ki baa cebidi bi badiba gbanñagiditi, Ki baa luodi o po ti buliñoa-luodiliediti Ke tin da go luoni. O Diedo yedi yaa maama n tie ne o po:

² «N baa yaa cuoni a liiga, Ki tiali ki dagini a po a gbangbana, Ki mudi a po ti kumoandi buliñoana, Ki mudi ti kuboandi bonluoditi yomi yomi.

³ N baa pa ŋa yaa ŋalimano n wuo Leni yaa piama n wuo. Yeni, a baa bandi ke n tie Li Miali Diedo Isidayeli Tienu yua n taa a yeli ki yini a.

⁴ N taa a yeli ki yini a, Kelima n naacemo Jakob puoliŋuani po. Isidayeli yaaba, min gandi yaaba yeni po. N puni a yaa yeli n ŋani, Ba ke a daa bani nni.

⁵ N tie Li Miali Diedo, dieditoa ki ye, Mini yaa ka, toa mo ki ye. N ñagini a ki jugisiega ba ke a daa bani nni.

⁶ N bua ban bandi ki cili u yienu N pudi naani, ki yaa caa hali Wun baali naankani, Ke mini yaa ka, tiento ki ye. N tie Li Miali Diedo, toa ki ye.

⁷ N tagi mi yenma ki go tagi li biigili. N puuni mi yanduanma Ki go kpendinni mi yebiadima. Mini Li Miali Diedo n tiendi laa bonla kuli.

⁸ Tanpoli n cedi ku mangu n jiidi, A tawala mo n teni ke mi teginma n puubi. Ki tinga n luodi ki cedi mi faabima N luoni li bonluonkaala. Mi teginma mo n pa, ke likuli n taani ki kpedi. Mini Li Miali Diedo n tie li Tagido.»

Ku yoagu leni o maado

⁹ Fala n baa yua n fu leni yua n tagi o, Yua n tie sanli, yaa sana n sieni siiga. Naani ku yoagu baa yedi yua n nugi ku: «A tiendi be?» Naani li tuonli mo baa yedi yua n tuuni li: «Ŋaa bani li tuonli yo?»

¹⁰ Fala n baa yua n baa yedi o baamado: «Be n teni ke a mali nni?» Ki go baa yua n baa yedi o naamado: «Be yaa po ke a gbaani ki mali nni?»

¹¹ O Diedo, Isidayeli Tienu Yua n Gagidi ki ŋani, Yua n tagi a, yedi yaa maama n tie ne: «Naani a baa buali nni ki bandi yaala N baa faa ki tieni a bila po? A bua ki bili n po li bali maama, N nii n soani yaa tuona po?

¹² Mini n tagi ki tinga, Ki go tagi o nisaalo ke o ye ki niinni. N yaa nii n dadi ki tandi ti tawadi, Ki gobidi tanpoli toagoli kuli.

¹³ N tigini Sirusi ke o fii, Kelima mi teginma po. N baa teni o sani kuli n pendi. Wani n baa guani ki maa n dogu, Ki faabi n niba ban cuo yaaba ti yonbidi. O kan tieni la panpaani leni suuli po. Mini Li Miali Diedo U Paaciamu Kuli Daano N yedi yeni.»

Isidayeli yaaba, U Tienu ye yi yaa kane

¹⁴ O Diedo yedi yaa maama n tie ne: «Ejipiti yaaba tuonli ñuadi Leni Etiopi yaaba kpendu baali, Leni Sabe yaaba, yaaba N kpedi boncianla yeni piama, Laa bonla kuli baa cua fini Sirusi kani, Ki tua a yaala. Laa nibuoli kuli baa ŋoadi a puoli po Ki luo luo, Ki gbaani a nintuali ki pugi a, Ki mia ŋa ki yedi: ‹U Tienu ye fini bebe yaa kane, Tientoa kuli ki ye, Yaala n sieni kuli tie fanma!

¹⁵ Moamoani, a tie yaa Tienu n wuondi u yuli, Fini Isidayeli Tienu o Candaano!›

¹⁶ Bikuli fiagi ki ye leni i fe, Bikuli foagidi ki tibini bi yula Bani yaaba n tagi i buli yeni.

¹⁷ Isidayeli yaaba wani, bi baa baa Mi faabima kelima o Diedo po. Yaa faabima n baa yaa ye hali yaa yogunu kuli, Yi kan go fiagi, yi kan go yaa ye Leni i fe hali yaa yogunu kuli po.»

¹⁸ O Diedo, wani U Tienyendu Yua n tagi ki tinga, wani n tieni ka, Waa den tagi ka tinkuonga ka, Ama o den n tagi ka ke bi niba n yaa ye ki niinne. O yedi yaa maama n tie ne: «Mini n tie Li Miali Diedo, tiento ki ye.

¹⁹ Mii maadi wuoli nni, Naankani n biigi ki ye ki tinga nni ka. Mii den yedi Jakob puoliŋuani: Lingi mani nni u damu nni. Mini o Diedo n yedi yeni yaala n tiegi, Ki doagidi yaala n dagidi.»

²⁰ Yin taani ki cua mani ne, Taani ki nagini mani, Yinba i nibuoli siiga yaaba n cia. Yaaba n tugi bi bulo daagu yeni, Baa bani liba kuli. Bi miadi o bulo mi todima Yua n kan fidi ki gaa ba.

²¹ Cua mani ki doagidi yi moamoani. Bani mo n tundi biyaba. Ŋme n den puni li laabaalo hali mi cilima? Ŋme mo n den waani laa bonla hali yogu? Naani laa tie mini Li Miali Diedo ka? Mini yaa ka, tientoa ki ye. N tie yaa Tienu n tiegi ki go faabidi, Min yaa ka, tientoa ki ye.

²² Yinba yaaba n ye hali i tinbiani kuli, Jigidi mani ki nuali nni Ki baa mi faabima, Kelima mini n tie U Tienu, Tientoa ki ye.

²³ N poli leni n yuli, Ke i moamoani mo ña n ñoabu nni. Yaa maama n tie ne mo kan lebidi: «Dunli kuli baa gbaani n nintuali. Lanbu mo kuli baa poli n yeli nni.»

²⁴ Lanbu mo kuli baa yedi: «Mi teginma leni u fidu ye mini O Diedo bebe yaa kane.» Yaaba n den bieni bi pala o po kuli, Bi baa cua o kani ki yaa ye leni i fe.

²⁵ Isidayeli yaaba puoliŋuani kuli Baa baa o Diedo kani mi teginma leni ti kpiagidi.