Esayi 44 - U TIENU MAAMA TILI 2013

O Diedo bebe n tie U Tienu

¹ Moala cengi mani, Yinba Isidayeli yaaba, N naacemo Jakob puoliŋuani, Min gandi yinba yaaba yeni.

² O Diedo yua n tagi yi, Yua n den tagi yi hali yi naa tugu nni, Yua n tie yi kubido Yedi yaa maama n tie ne: ‹Da jie mani yinba n naacemo Jakob puoliŋuani, Fini Yesuruni min gandi yua.

³ N baa wuli mi ñima ki tinkuonga po, Ki tieni i fuani yaa tinga n kuodi nni. N baa yadi n Fuoma yi puoliŋuani po, Ki go maani n seli yi madi kuli po.

⁴ Bi baa pa ti kpenmuadi siiga, Nani i kpentiidi yii n baali i ñinsani yeni.›

⁵ One baa yedi: ‹N tie Li Miali Diedo yua yo.› One mo n yedi ke wani leni Jakob n taa yeli. Toa mo baa badi o nuu po i be ki yedi Ke o Diedo n die o, Isidayeli yeli mo baa yaa tie o po kpiagide.»

⁶ O Diedo Isidayeli bado, Wani Li Miali Diedo U Paaciamu Kuli Daano Yua n daa ki faabi ba, Yedi yaa maama n tie ne: «N tie o kpialo leni o juodika Mini yaa ka, toa ki ye.

⁷ Ŋme n baa fidi ki maadi nani mini yeni, Ki doagidi ki waani nni, Hali min den tagi bi niba yaa yogunu? Wan go waani nni yaala n den tieni Leni yaala n baa faa ki tieni.

⁸ Da jie mani, da digibi mani, Mii den teni ke yi gbadi Ke n go waani yi la hali yogu te? Yinba n tie n siedinba: Naani toa go ye ke laa tie mini? Tanciantoagu kuli ki ye Min ki bani yaagu yaa po.»

I buli tie faama bebe

⁹ Yaaba n tagi i buli kuli tie fanma, Ban ŋanbi yaala ke li ŋani ki cie mo Kan todi puu kuli. Bi tie i buli yeni siedinba, Baa pia nuni, baa pia yama mo. Bimoko fiagi n yeni.

¹⁰ Ŋme n baa tagi o bulo, Bi ki duadi li nannanli, Ki naa baa baa kuli yaala N baa fuoni o lienni?

¹¹ Yaaba n tuuni laa tuonli kuli baa fiagi. Li tuonsoanbanda mo kuli li tie nisaalibe. Ban taani bikuli ki cua o kani, Bikuli baa digibi leni i jeje ki yaa ye Leni i fe boncianla.

¹² O maano maa li yali ki tuuni leni a kuana, Ki pua leni ki tuatuaga ki tagi o bulo. O tuuni leni o nuu yuu n pa. Mi koma yaa cuo o, se wan tadigi. O yàá baa ñima ki ñuni, se wan coagi.

¹³ O kpagikpielo tandi u baabibiigiko Ki diani o bulo yeni jiama bianu leni o kaalo, Ki kpie wan baa tagi yaa bulo yeni. O kpie ki duli ki baa nandi o Leni o nilo yaa bugima, Ki teni wan yaa naani leni o nisaalo, Ki yaa ye dieliba nni.

¹⁴ O pe o yuli po sediri tiidi, O taa telebinti leni seni tiidi Ki gandi yii n ŋani li fuali tiidi siiga, O ŋuu pen tiidi Ke ki taaga mi ke i kpedi.

¹⁵ Laa tiidi kuli tie o nilo n baa juu yaala, O taani yii ki juu ki yie u mu, O taani yi ki cuondi u mu, Ki ŋaandi mi jiema. O go taani yini yo ki tagi i buli, O tieni li nannanli ki ñuandi Li nintuali ki kpiagidi li, Ki gbaandi ki pugi li.

¹⁶ O taa o daadi boagidima ki juu u mu nni. Leni laa boagidima, o ŋoabi wan Baa ŋmani yaa nandi. O sagi ti nandi ki ŋmani ki guo. O go yie u mu ki yedi: «Li mani! N nandi nba, n nua u mupienu!»

¹⁷ Leni yaa daadi n sieni Ke o baa kpie ki tagi o bulo, Ki tieni la o bulo, Ki yaa ñuandi o nintuali ki kpiagidi o, Ki gbaandi o nintuali ki pugi o, Ki miadi o ki tua: «Faabi nni, Kelima a tie n tienu!»

¹⁸ Baa bani liba, baa pia yanfuoma, Kelima bi pigini bi nuni ke ban da le, Ki pigini bi pala mo, Ke ban da gaa liba kuli fuuli.

¹⁹ Baa kpaagi li bonla yeni po, Baa pia yaa bancianma Leni yaa yanfuoma n dagidi ki baa yedi: «N den juu boagidima u mu nni, Ki den ŋanbi n jiema a mukuana po, N den sagi ti nandi ki ŋmani ti, Leni yaa boagidima n sieni. N yaa ñuani li dajenli nintuali Ki kpiagi li, n tieni yaala n gundi.»

²⁰ O di mi fantanpienma, O yanpiima teni ke o yaadi. O kan fidi ki gaa o miali. O kan fidi ki yedi: «Min kubi yaala n nuu nni tie boandi.»

Da sundi ke a tie n naacemo yo

²¹ Yinba Jakob puoliŋuani Isidayeli yaaba, Tiadi mani yaa bonla n tie ne po, Kelima yi tie n naacenbe. Mini n tagi yi, ke yi tie n naacenba. Yinba Isidayeli yaaba, n kan sundi yi po.

²² N bolini yi tagili nani ku tawaligu yeni, Ki bolini yi tuonbiadi mo Nani ku gbangbadigu yeni. Guani ki cua n kani, Kelima n den daa ki faabi yi.

²³ Tanpoli, mangi a pali, Kelima o Diedo soani o tuoncianli. Ki tinga ñuanlu nni mo N kpaani li pamanli kpaani. A juana, yigini mani li pamanli yigimi. Taani mani leni a fuana leni yi tiidi kuli, Ki yigini, kelima o Diedo daa ki faabi Jakob puoliŋuani, ki doagidi o kpiagidi Isidayeli diema nni.

²⁴ O Diedo yua n daa ki faabi yi, Wani yua n den tagi yi hali ke Yi da ye yi naa tugu nni, Yedi yaa maama n tie ne: «Mini Li Miali Diedo n tagi yaala n ye kuli, Mini bebe n dadi ki tandi ti tawadi, Mini n ba n tagi ki tinga.

²⁵ N biandi tuofaa-sinankeene fanma, Ki jiendi a baayuadiida. N teni ke a banda suligi ki goa puoli, Ki lebidi bi bancianma ke mi tua yanpiima.

²⁶ N saagi o naacemo maama po i moamoani. N tonda n pua saawali yaali yaa po mo, N tiendi la. N yedi Jerusalemi dogu po: ‹U baa guani ki baa bi niba,› Ki go yedi Juda diema dogi mo: ‹Bi baa guani ki maa bi diebuona nni.›

²⁷ N yedi yaa ñima n ñua: ‹Ñuudi.› N baa teni i kpenciami mo n ñuudi cain.

²⁸ N maadi Sirusi ki yedi ke o tie n yankpaalo. O baa yaa tiendi n yanbuama kuli. O baa yedi Jerusalemi dogu po: ‹Ban guani ki maa u!› Ki go yedi U Tienu diegu po mo: ‹Ban cili ku tanpuuli!› »