Esayi 43 - U TIENU MAAMA TILI 2013

U Tienu tie Isidayeli candaano

¹ O Diedo yua n tagi Isidayeli yaaba, wani yua n tie bani Jakob puoliŋuani yeni yedi yaa maama n tie ne: «Da jie mani liba, Kelima n daa ki faabi yi. N den taa yi yela ki yini yi. Yi tie min die yaaba.

² Yi yaa baa duodi mi ñincianma, N baa yaa ye leni yi. Yi yaa baa duodi i kpenciami, i kan milini yi, Yi yaa baa cuoni u mu nni, U kan juu yi, U mupienu mo kan sia yi.

³ N tie Li Miali Diedo yi Tienu, Isidayeli Tienu yua n Gagidi ki ŋani, Yi Candaano. N daa yi Ejipiti kani ki faabi yi. Etiopi leni Seba mo n lebidi ki gaa yi kaanu.

⁴ Nani yin pia n po li mayuli yeni po, Nani yin pia ti jigidi ke n go bua yi yeni po, N baa taa bi jaba ki ban lebidi ki gaa yi kaanu, N baa taa i nibuoli ki pa ki gaa yi miana.

⁵ Da jie mani liba, kelima n ye leni yi. N baa ñani yi puoliŋuani puoli po ki guani yi, N baa yini ki taani yi nintuali po.

⁶ N baa yedi nujienu po diema: ‹Guani ba!› Ki yedi nuganu po diema mo: ‹Da baa ki kubi ba!› Teni n bijaba n ña yaa diema N ye foagima ki kpeni, Ki ñani n bisiaba mo hali U tinbianu ki guani ba.

⁷ Mini leni yua n taa yeli kuli, Min n tagi yua ki go ŋanbi o n kpiagidi po yeni, guani o mani.»

O Diedo bebe n tie o candaano

⁸ Teni mani yaa nibuolu n joa yeni n ña, Ba ke bi pia i nuni. Bani a woma, yaaba n pia a tuba yeni.

⁹ Mi diema yaaba kuli mo n taani, Ke i nibuoli kuli mo n taani yenma. Bi siiga ŋme n den tuodi ki pua Saawali laa bonla po? Bi siiga, ŋmenba n den bangi ti Yaala n kpa tieni? Ban cuani bi siedinba, ban saa bi po i moamoani.

¹⁰ O Diedo yedi: «Yinba n tie n siedinba, Yinba n tie n naacemo min gandi yua, Ki bua yin bandi ki yaa dugi n po. N bua yin bandi ke li tie mini. Toa ki den kpa ye ki ŋaa nni, Ke n puoli po mo, toa kan tieni, abada.

¹¹ Mini de! Mini n li tie Li Miali Diedo, Mini yaa ka, Candantoa ki ye.

¹² Mini n kpendinni mi faabima, Mini n puuni li laabaalo, Mini n go wangi la. Nilanbuloba kan yaa ye yi siiga, Kelima yinba n tie n siedinba. O Diedo yedi: ‹Mini mo n tie U Tienu.›

¹³ N li bi tie wane hali ke puu kuli daa cili, Oba mo kan fidi ki gaa min muubi Yaala n nuu nni. N yaa tieni, ŋme n baa fidi ki yie n po?»

N soani yi po o nilo

¹⁴ O Diedo yua n daa ki faabi yi, Isidayeli Tienu yua n Gagidi ki ŋani Yedi mine: «Li tie yi yaa po yo Ke n soani o nilo wan tuogi leni Babilonni yaaba. Bani Kalide yaaba, yaaba n sani yeni, N baa cibi bi pamanli ñinbiaciandi, Ki teni bikuli n tingi mi ñincianma nni.

¹⁵ N tie Li Miali Diedo yi Tienu Yua n Gagidi ki ŋani, Yi bado yua n tie Isidayeli yaaba tagido.»

¹⁶ O Diedo yua n tieni li sanjali Mi ñincianma nni leni li sanbili, Yaa ñima n puubi po, yedi:

¹⁷ «Wani yua n caa bu toabu leni Ti toateliti, i taami, li toagoli Leni a jakoanda li tuogili po, Bi duani o ke o kan go fii, Bi gbindi o nani li fidisancabili yeni.

¹⁸ Yin da go tiadi yaala n den kpa tieni, Ki da go kpaagi li bonkpelila po.

¹⁹ Diidi, n baa tieni yaa bonla n paani, Li cili no moko. Naani yi kan bandi la? N baa tieni yi po u sanu mi fanpienma nni, Ki teni i kpenciami n pudi ki tinkuonga nni.

²⁰ Ti fuayandi, i tanboe leni ti tataadi kuli, Baa yaa kpiagidi nni, Kelima n baa teni mi ñima n pudi Mi fanpienma nni, I kpenciami mo n pudi ki tinkuonga nni, Ki yaa ñundi n niba, min gandi yaaba.

²¹ Min tagi ki go tieni yaa niba n yuli po yeni, Bi baa yaa kpaani ki pagi nni.»

U Tienu buni leni Isidayeli yaaba

²² O Diedo yedi: «Jakob buolu! Yii taagi ki miadi mini ka, Kelima yinba Isidayeli yaaba, yii miadi nni.

²³ Yii den taa yi pebila ki padi n po a padijuukaana. Yi pada mo naa den kpiagidi nni. Mii den tieni yi paalu ka, Ke yin cuani n po bu paabu, Mii didi den coagini yi mo, Ke yin yaa juugi n po a dugibila.

²⁴ Yii den taa yi ligi ki da n po Yaa tibidi n pia u nuulumanu. Yii go den teni ke n guo leni yi pada kpama, Ama yi kuani nni ti yonbidi nni Kelima yi tuonbiadi po, Ki coagini nni leni yi tagili.

²⁵ Li li tie mine! Mini n duuni ki ñani yi tagili. N kan go tiadi yi tuonbiadi po, Kelima min bua yi maama po.

²⁶ Guani ki tiadi nni mani, Ke tin taani ki bu leni tiyaba. Maadi mani yiba, Ki saa yi yula po i moamoani.

²⁷ Yi yaajakpialo den tieni ti tuonbiadi, Yaaba n gaani n maama ki soagindi yi Den fiini n po mi yiema.

²⁸ Li tie lani yaa po yo ke n den teni Ke u kaangagidiŋamu kopadicianba kuli joagini, Ki ŋaa ke yibali bolini Jakob buolu, Ki fiagi bani Isidayeli yaaba.