Esayi 42 - U TIENU MAAMA TILI 2013

O Diedo naacemo

¹ Diidi n naacemo, Min kubi yua ke o se bonŋanla, Min gandi yua, N pali n mani yua yaa po. N kuani n Fuoma o niinni, O baa yaa wangi i nibuoli mi teginma.

² O kan tiani, O kan kpedi o nialu, Ki teni ban gbadi u i sani nni.

³ O kan kua ki dudi yaa ñinmuagu n diegi, O kan gbindi yaa fidisancabigu n ŋubidi. O baa doagidi yaa bujiali n tiegi Leni i moamoani.

⁴ O kan tadigi, O kan suli ki guani puoli, Hali wan baa cuani ŋanduna nni, Yaa bujiali n tiegi Ke a kpendega mo n jigini o bali maama.

⁵ Li Miali Diedo U Tienu yua n tagi tanpoli, Ki tandi tanpoli leni li fanma, Ki ladi ki tinga leni yaala n pudi ki po kuli, Ki puuni yaaba n ye ki po kuli mi fuoma, Ki go puuni yaala n cuoni ki po kuli li yaa fuoma, Maadi yaa maama n tie ne:

⁶ «Mini Li Miali Diedo, n yini a mi teginma po, N baa muubi a nuu, ki kubi a, Ki puogi a ŋan kuani o ŋantaado Mini leni n niba siiga, Ki go teni ŋan tua i nilanbuoli yenma.

⁷ Lani, a baa noadi a juama nuni, Ki teni a kpaada n ña li kpaadidieli nni, Ki go teni yaaba n lo li biigili nni N ña li niinni.

⁸ N tie Li Miali Diedo, n yeli n yeni. N kan teni toa kuli n kpiagidi. N kan teni nannanliba n pagidi.

⁹ Diidi yaala n kaa den kpa tieni, Tieni ki gbeni. N go waani yi laabaalipaano, Hali ke li daa cua N tuodi ki waani yi la.»

O Diedo n tieni yaala

¹⁰ Yiini mani o Diedo po bu yanpanbu! Yiini mani ki pagi o, Yinba yaaba n ye hali u tinbianu, Yinba yaaba n ye mi ñincianma gbanu po, Ki wuli ki ladi mi po, Ki taani leni yinba yaaba n ye a kpendega po!

¹¹ Yaaba n ye mi fanpienma nni Leni mi dogi nni kpedi bi niali, Ki taani leni Kedari buolu, yaaba n ye a dobila nni! Sela dogu yaaba n kpaani li pamanli kpaani. Yaaba n ye a juana yula po mo N yigini li pamanli yigimi.

¹² Bikuli n yaa kpiagidi o Diedo, Ki yaa kpaani ki pagi o a kpendega po.

¹³ O Diedo baa ña ki cuoni nani o jakoando, Ki mua mi jama nani o toatielo yeni. O baa kpedi o nialu ki yaa tangi Ki paadi o yibalinba.

O Diedo n jagi ke o baa tieni yaala

¹⁴ N ŋmini ke li waagi, N ŋmini suo ki ñii n pali, N duni nani yaa pua n baa maa yeni. N duni ki go fuo ki dogi.

¹⁵ N baa bolini a juana leni a joabila, N baa teni yaa bonsoangila n ye li po kuli n kuodi, N baa lebidi i kpeni yin tua kpendega, Ki teni ti ñinbuudi n kuodi.

¹⁶ N baa teni a juama n tagini Ban ki den bani yaa sanu, Ki gobidi ba yaa sanbila n den boani ba niinni. N baa teni yaa biigili n ye bi liiga N lebidi ki tua yenma. N go baa teni yaa sani n tie Gbangbana mo n ladi ki dagini. N kan ŋaa ba, Lani n tie min baa tieni yaala.

¹⁷ Ama yaaba n bili bi dugidi Ban tagi yaa buli nni, Bani yaaba n yedi ban duadi yaala: «Yi tie ti tieni!» Bi baa suli puoli, bi baa fiagi.

¹⁸ A woma, cengi mani! A juama, nuali mani ki le!

¹⁹ Ŋme n joa, li yàá tie n naacemo yaa ka? Ŋme mo n womi nani n tondo, Min soani yua yeni? Ŋme n joa nani yua n baa mi yanduanma, Ki joa nani o Diedo naacemo yeni?

²⁰ A laa li bonla boncianla, Ama ŋaa den kpaagi li po. Bi tuba pigidi, ama baa gba liba.

²¹ O Diedo den bua ki teni O bali maama n yabidi ki go yaa ŋani Hali bonŋanla, kelima o teginma po.

²² Ama bi tie ban fie ki go fagi yaa niba. Bi cuo bikuli leni ti dadi ti buodi nni, Ki luoni ba a kpaadidiena nni. Bi fagi ba ke niloba ki gaa ba, Bi kpabidi ba ke niloba ki yedi: «Guani ba mani.»

²³ Ŋme yi siiga n baa diadi o tubili Ki cengi laa bonla? Ŋme n baa tuo ki cengi ki bangi saala bonla?

²⁴ Ŋme n den taa Jakob puoliŋuani Ki teni yaaba n kpabidi ba? Ŋme n den taa bani Isidayeli yaaba Ki teni yaaba n fagi ba? Naani laa tie o Diedo, Tin tieni yua yaa po ti tuonbiadi yeni ka? Baa den bua ki cuoni o sani nni, Baa den cengi o bali maama.

²⁵ Lani yaa po o pali den beni Isidayeli yaaba po ke o den wuli bi po O pabiencianli falabiado Leni bu toabu falabiado. Bu toabu den pebidi bi po i kaani kuli, Ke bi naa den bua ki bandi liba kuli. Bu den buoni ba, ama baa den kpaagi li po.