Esayi 40 - U TIENU MAAMA TILI 2013

U Tienu baagidi o niba 40—55 Paagi mani n niba gbani

¹ Yi Tienu yedi: «Baagi mani, baagi mani n niba.

² Maadi mani leni Jerusalemi yaaba Ki waani ba ke bi janjanma gbeni, Ke bi baa sugili bi tagili po, Kelima bi baa U Tienu kani Bi tuonbiadi panpaani taalimilie.»

³ U nialu kpaani mi fanpienma nni ki tua: «Bogini mani o Diedo sanu, Ki ladi ki dagini mani a gbangbana, Lan tua sanu ti Tienu po.

⁴ Ban gbieni ti joaloandi kuli Ki jiini joacianli leni joabiga kuli Ki ladi ki dagini. Ti buodi mo n piini ki dagini, Naani n bi kpedi mo n tua joaloangu.

⁵ Lani, o Diedo kpiagidi baa doagidi Ke pia miali kuli baa taani ki le ti, Kelima o Diedo yaa ñoabu n maadi.»

⁶ U nialu yedi: «Kpaani!» Ke nmo guani ki buali: «N baa kpaani ki yedi be?» U nialu yeni guani ki yedi: «Gbanandi kuli tie nani ti muadi yeni, Ti ŋamu mo nani i kuani nni puuma yeni.

⁷ O Diedo faalu yaa figi yaa yogunu, Ti muadi baa kuodi, mi puuma mo n suodi. Moamoani de! Bi nisaaliba tie nani ti muadi yeni.

⁸ Ti muadi kuodi, mi puuma mo suodi. Ama U Tienu yaa maama wani Baa yaa ye hali yaa yogunu kuli.»

O laabaalimano waanma

⁹ Yinba Siyon yaaba, O laabaalimano tonda, Do mani yaa juali n kpedi po, Ki kpedi yi niali lan yaa pa. Yinba Jerusalemi yaaba, O laabaalimano tonda, Kpedi mani yi niali ki da jie Ki yedi Juda yaaba dogi: «Diidi mani yi Tienu nne!»

¹⁰ Diidi mani o Diedo, wani U Tienu, O kpendi leni u paalu, O nuu paalu n baa teni wan diedi. Diidi o kubi o ŋmapani, O panpaani mo ye o liiga.

¹¹ O kpaa o yangoli nani o yankpaalo yeni. O gobidi ki taani a pebila leni o buagu, Ki taa ba ki ŋmabi. O gobidi yaa peñoe n da ŋaandi.

O Tagido yabinu leni o yanfuoma

¹² Ŋme n biigi o nupuogu nni mi ñincianma ñima? Ŋme n biigi leni o nubadiyaagu ki bandi Tanpoli pianu n da maama? Ŋme n fidi ki taani ki tinga tama kuli Ki biigi ma? Ŋme n joani a joaciama leni a joabila Ki baa biigi ki bandi a kpiagu?

¹³ Ŋme n bili o Diedo Fuoma po u bianu, Ki waani o wan jagi yaala?

¹⁴ O den kpa buni ŋme yo ke wan pa o fanuba? Ŋme n den bangi o ti buudi n ja maama? Ŋme n den bangi o mi bangima Ki teni wan bandi mi yanfuoma sanu?

¹⁵ Diidi i nibuoli tie nani yaa ñinboali N ñani ku tiagu nni ki condi yeni. Bi kpiagu mo tie nani yaa wagima N suodi u kpiagu bonbiigikaala nni yeni. Diidi ki le: A kpendega mo tie nani Yaa tangunjuanu n yugi yeni.

¹⁶ Liban fuali daadi kan dagidi u mu po, O yandi kuli mo kan dagidi li padijuukaali po.

¹⁷ I nilanbuoli kuli tie o nintuali nani fanma yeni. Baa pia fuoma ki pundi fanma yaala n ki ye.

U Tienu ki pia ban baa boagini o leni yua

¹⁸ Yi bua ki boagini U Tienu leni ŋme yo? Yi baa nandi o leni be?

¹⁹ Leni o bulo bi? O tuonsoanbando n duadi o, Ke yua n tuuni leni wula mo boali o, Ki go tabini tabini o po ŋanjilifa laani.

²⁰ Yua n ki pia yaa paalu n baa tieni yeni, Yen lingi a luluga n kan kua yaa daagu, Ki ban juogi leni o tuonsoanbando, Wan kpie o po yaa bulo n baa waagi Ki pia u fidu.

²¹ Yii go bandi o? Yii gba o maama? Baa den waani yi o hali mi cilima? Yii fidi ki bandi ki gagidi Ki tinga Tagido n tie yua?

²² Wani n tie yua n ye ki tinga Gaanilindima tanpoli, Ki nua bi niba nani i naaci yeni. O yen ladi ti tawadi nani yaa cabili n faali yeni, Ki dadi ki tandi tanpoli mo nani li gbandieli yeni, Lan tua o yekaanu.

²³ Wani n jiini bi badiba ke baa tie puu, Ki teni ke ki tinga bujiaba mo tua fanma.

²⁴ Ban li ŋuu ba, ki buli ba, Ke bi ñiali tieni i jiini yaa yogunu yo, Ke o Diedo piebi ba ke bi kuodi. O pinpinjoa tugi ba nani mi fenma yeni.

²⁵ U Tienu yedi: «Yi boagindi nni leni ŋme, Ke n baa yaa naani leni o?» Yua n Gagidi ki ŋani n yedi yeni.

²⁶ Yaadi ki diidi mani tanpoli! Ŋme n tagi laa bonla kuli? Li tie wani yua n yen teni a ŋmabila Kuli n taani ki ña nani a toagola yeni. O yen taagi akuli yela ki yi ŋa, O paalu leni o fidiciamu po, Ba yenli kan sieni kaa cua.

Yaaba n tadigi guani ki baa u fidu

²⁷ Be yaa po ke Jakob puoliŋuani tua, Be yaa po ke yinba Isidayeli yaaba tua Yogunu kuli: «O Diedo naa bani yaa yema n faadi ki ye ti po, U Tienu mo ki faami ti teginma po.»

²⁸ Yii bandi o? Yii gbadi o maama? Li tie Li Miali Diedo U Tienu yua N ye hali yaa yogunu kuli, Yua n tagi ki tinga biani, Waa coagidi, waa tadigidi, O yanfuoma mo ki pia bianu.

²⁹ O puuni yua n coagi u fidu, Ki pugidi yua n tadigi mo u paalu.

³⁰ A bonwaala coagidi ki go tadigidi, Ba bi jakoandimoanba mo tuudi yogunuba.

³¹ Ama yaaba n dugi o Diedo po, Bi fidu baa yaa pugidi. Bi yen yugi nani jiebani yeni. Bi tiini, ama baa tadigidi, Bi cuoni, ama baa coagidi.