Esayi 4 - U TIENU MAAMA TILI 2013

¹ Landaali, puobilele baa sani ki joali jayendo ki yedi o: «Tinba n baa lingi ti jiema, Tinba n baa yieni ti yula. Taa ti tin tua a puoba, Ñani ti po ti fe.»

Jerusalemi niba yaaba n ciadi

² Landaali, o Diedo baa teni li benkpeli N toa ki tua pagidi leni kpiagidi, Mi diema bonluonkaala mo N tua jigidi leni ŋamu, Isidayeli yaaba, yaaba n ciadi po.

³ Li daali kpendi ke ban ŋaa yaaba Siyon Leni Jerusalemi nni, Bi baa yini ba bi nigagidiŋanba, Kelima bi diani bi yela Jerusalemi nni, Ke ban yaa ye yaa yogunu kuli.

⁴ O Diedo bujiali fawaama leni li fantama, Baa ŋuudi ki ñani Siyon bisiaba joagindi, Ki go ñani ban den wuli yaa soama Juda nni.

⁵ Lani, Siyon juali leni li nitaanli po, O Diedo baa doagidi o yuli ku muñiigbangbadigu U yensiinu, Ku ñiagu mo yaa mu n co nni. Lani kuli yaa yuli po, O Diedo kpiagidi baa yaa ye.

⁶ U wuonkaanu baa yaa ye U yensiinu wulugu po, Ki tua wuonkaanu leni denkaanu Ku tafaagu leni ki taaga po.