Esayi 39 - U TIENU MAAMA TILI 2013

Esekiasi gaa Babilonni bado tonda cangu

¹ Lanyogunu Baladani bijua Melodaki-Baladani, Babilonni bado den soani li tili leni bu paabu Esekiasi po, kelima o den gbadi o yianu leni o paagima.

² Esekiasi pali den mangi, ke o den waani a tonda o bonmoanla kuli n ye naankani, ŋanjilifa, wula, yaa tibidi n pia u nuulumanu, yaa kpama yaa dunga n pa, o toatiadi kuli n ye naani leni wan den pia yaala kuli ke li ye o ŋalimano nni. Waa den wuoni ba liba o diegu nni leni o diema nni kuli.

³ O saawalipualo Esayi den yuandi, ki cua o bado Esekiasi kani, ki yedi o: «Bi naa niba ñani le? Bi cua ki yedi a be yo?» Esekiasi den guani, ki yedi o: «Bi ñani yaa diema n foagi, bi ñani Babilonni po yo.»

⁴ Esayi go den buali: «Bi laa be a diegu nni?» Esekiasi den guani, ki yedi: «Bi laa yaala n ye n diegu nni kuli. Mii pia n ŋalimano siiga min kaa teni ke bi laa yaala.»

⁵ Li yaa puoli, Esayi den yedi Esekiasi: «Cengi Li Miali Diedo U Paaciamu Kuli Daano maama.

⁶ Diidi u yogunu kpendi, ke bi baa tugi ki gedini Babilonni, yaala n ye a diegu nni kuli, a baanba n den dogini yaala ki taa ki ti pundi hali dinla, puu kuli kan sieni. O Diedo n yedi yeni.

⁷ Bi go baa cuo a bijaba, a bimadimu, ki ban teni ban tua moagilimu Babilonni bado diegu nni.»

⁸ Esekiasi den guani, ki yedi Esayi: «Ŋan maadi o Diedo maama yaama yeni mani.» Esekiasi den tua o pali nni: «Mi yanduanma leni laafia baa yaa ye n miali dana nni.»