Esayi 36 - U TIENU MAAMA TILI 2013

O Bado Esekiasi togida 36—39 Asiiri bado mua mi jama Jerusalemi po

¹ Juda bado Esekiasi bali piiga n binnaali binli, Asiiri bado Senakeribi den gedi ki baa Juda diema leni o dopaali bu toabu ki paadi yi.

² Asiiri bado den kali Lakisi ki soani o guudikaaba yudaano Jerusalemi, o bado Esekiasi kani leni yaa toagoli n pia u paalu. O den gedi ki sedi mi ñima n ña naani ki wuliti ke likani kpedi ki tiegi yaa sanu n caani o siekuodo kuanu po.

³ Lanwani, Hilikiya bijua Eliakim yua n den tie badidiegu cenli ŋamu yudaano den ñani ki tuogi o, ki yegi leni o tidianlo Sebina leni Asafi bijua Yoa o tikubilo.

⁴ Asiiri guudikaaba yudaano den soani ke ban yedi Esekiasi ke o badiciamo, Asiiri bado yedi: «Amo dugi be yaa po yo?

⁵ A yedi ke mi yanfuoma leni u fidu tie yaala n dagidi bu toabu po, ama a maadi mafanma bebe. A jigini ŋme ki yie, ki yedi ke n kan go yaa die ŋa?

⁶ A taa a dugidi kuli ki bili Ejipiti po, yaa kpenkagili n kua ki muu ki suali yua ñii li yeni. Ejipiti bado Faraon tie yene yaaba n dugi o po kuli po.

⁷ Daalinba a baa yedi nni: ‹Li Miali Diedo ti Tienu n tie tin dugi yua yaa po.› Naani Esekiasi ki bolini o yaa padibinbina, ya n den ye a juana po, ki yedi Juda leni Jerusalemi yaaba: ‹Yi baa yaa gbaandi li naa padibinbinli kani.›

⁸ Moala n baa mia bonyenla: danli leni n daano Asiiri bado, lani n tie min pa ŋa taami tudalie (2 000) a yaa baa fidi ki baa bi tanjagiba bikuli po.

⁹ A baa tieni lede ki fidi ki paadi n canbaa toatieba yudanba siiga nni ba yendo, ba yaaba n ki tie jakoandiciama? A bili a dugidi Ejipiti toateliti leni bi tanjagiba po!

¹⁰ Bontoala moko ye. Naani laa tie Li Miali Diedo yanbuama po ka, ke n cua ki tuogi leni yaa dogu n tie ne bu toabu, ki baa bolini u? Li Miali Diedo yedi nni: ‹Fii ki baa u dogu ne bu toabu ki bolini u.› »

¹¹ Eliakim, Sebina leni Yoa den yedi Asiiri bado guudikaaba yudaano: «Maadi leni tinba a naacenba Arameyen maama nni, kelima ti gba ma. Ŋan da go maadi leni ti Hebilu maama nni, ke yaaba n jagi u dogu bilinciamu po n da gbadi.»

¹² O bado guudikaaba yudaano yeni den guani ki yedi ba: «Naani n canbaa den soani nni ke min maadi leni a canbaa leni fini bebe yo? Naani laa tie leni yaa niba n kaa u dogu bilinciamu yuli po, ki baa je bi bindi ki go ño bi ñanma leni yi ka yo?»

¹³ Lani, Asiiri bado guudikaaba yudaano den yaadi ki sedi ki kpaani Hebilu maama nni, ki yedi: «Yin cengi mani o badiciamo, Asiiri bado maama.

¹⁴ O yedi Esekiasi n da boandi yi, kelima o kan fidi ki faabi yi.

¹⁵ Yin da tuo Esekiasi n teni yin dugi Li Miali Diedo po, ke wani Li Miali Diedo baa gaa yi, ki go teni ke yaa dogu n tie ne kan baa wani Asiiri bado nuu nni.

¹⁶ Da cengi mani Esekiasi, kelima Asiiri bado yedi nanda: ‹Danli mani leni nni, taa mani yi yula ki teni nni, lani n tie yuakuli n baa ki je o duventiidi leni o kankandi bonluonkaala, ki ño o caali ñima,

¹⁷ hali min baa cua ki gedini yi yaa diema n naani leni yi yaama yeni, duven leni ŋalikama diema, mi jiema leni duven tiidi n ye naani.

¹⁸ Yin da cengi mani Esekiasi maama, kelima o fidi ki boandi yi, ki yedi ke Li Miali Diedo baa gaa yi. Naani yaa nibuoli n sieni tieni fidi ki teni ke Asiiri bado ki diedi bi diema?

¹⁹ Hamati leni Alipadi tieni ye le? Sefaravayimi tieni ye le? Naani yi fidi ki faabi Samari n nuu nni?

²⁰ Laa diema tieni kuli siiga, ile n fidi ki faabi i diema n nuu nni, ke Li Miali Diedo wani nan baa faabi Jerusalemi n nuu nni?› »

²¹ Ama bi den ŋmini suo kaa guani o liba kuli, kelima o bado Esekiasi den teni ba yaa ñoamabonli n tie: «Yin da liegi o mani!»

²² Hilikiya bijua Eliakim yua n den tie badidiegu ŋalimankubilo, Sebina o tidianlo leni Asafi bijua Yoa o tikubilo den guani Esekiasi kani leni a liadipadima ki togidi o Asiiri bado guudikaaba yudaano maama.