Esayi 35 - U TIENU MAAMA TILI 2013

Mi yemanma yogunu

¹ Mi fanpienma leni li tinwagili Pala baa guani ki mangi. U tialu mo yaa pali baa mangi, Wun guani ki puudi.

² U baa puudi bonŋanla, U pali n mangi, Wun yiini i jakoandiyani Leni i pamandanyani. Bi baa pa u Liban kpiagidi, Karimeli leni Saron jigidi. Bi baa le o Diedo kpiagidi Leni ti Tienu jigidi.

³ Pugini mani yaaba yaa nii n tadi u paalu, Paagi mani yaa duna n kuagi.

⁴ Yedi mani yaaba yaa tugusoama n tiini: «Paagi mani yi pala ki da go jie, Diidi yi Tienu n ne. O baa tuu yi po li panli. O baa pa yuakuli o panpaani, Wani o ba n kpendi ki baa faabi yi yeni.»

⁵ Lani, a juama nuni baa noanli, A woma mo baa gbadi.

⁶ O diamo baa yugi ki cii nani o kabilo yeni, O muulo mo yaa lanbu baa kpaani leni li pamanli, Kelima a ñinbuna baa pudi mi fanpienma nni, I fuani baa puubi yaa diema n kuodi yeni niinni.

⁷ Mi tantonma baa kpandi ñinbuugu, A ñinbuna baa pudi u ñinkpankpagu N ye yaa diema nni, I tanboe n yen dua naani, Ti muadi baa kpandi ki tua sabigu leni kpenkagi likani.

⁸ U sanu baa yaa ye likani, Bi baa yaa yi li sanu: «Yaa sanu n gagidi.» Yaa nilo n joagini kuli kan poandi likani. U baa yaa tie bani bebe yaa po yo. Ba bi yanluodanba yaa tagini u, bi kan bodi.

⁹ Yangbanlo kan yaa ye likani, Yanbiadigiba kuli kan tagini likani, Bi kan tuogi leni ba laa sanu nni. O Diedo yaa niba n baa yaa tagi laa sanu.

¹⁰ O Diedo n daa ki faabi yaaba baa kpeni. Bi baa pundi Siyon leni i jakoandiyani, Yaa pamanli n kan gbeni abada Baa yaa jagi bi yula po. Li pamanli leni i laayieni baa nagini, Li pabiidili leni i figindi mo n foagidi.