Esayi 34 - U TIENU MAAMA TILI 2013

Edomi buudi jiama

¹ Yinba i nilanbuoli, nagini mani ki cengi! Bi niba na, cengi mani bonŋanla! Ki tinga leni yaala n ye ki niinni kuli, Li ŋandunli leni lin luoni yaala n cengi,

² Kelima o Diedo pali fii i nilanbuoli kuli po. O pabiencianli mo fii bi toagola kuli po. O baa kpa bikuli. O baa bolini bikuli cain.

³ Bi luni yaa niba n poagili, Bi tinkpiba bili ki nuugidi. Bi soama mo puubi a juana po.

⁴ Tanpoli toagoli baa yadi. Ti tawadi baa gbabi ki taani nani li tili yeni. O toagoli mo male nani duven tibu faagu, Bi nani ku kankanfaagu yeni.

⁵ O Diedo mangi o jugisiega tanpoli po, Ki cua ki baa Edomi, Wan bili ke o baa bolini yaa nibuolu yeni.

⁶ O Diedo jugisiega gbie leni mi soama, Ki go guo leni mi kpama, a pebila Leni a ŋuabuana soama Leni a petona cayaana kpama, Kelima li padili ye Botisira dogu nni o Diedo po. Li tuonli baa soani Edomi diema nni.

⁷ A moanaatona, a naatona leni i taami taani leni ba ki baa, Ki tinga baa ño i ne leni a naatona soama ki guo. Bi tinga wagima kuli gbie leni bi kpama

⁸ Kelima o Diedo n baa tuu o panli yaa daali n yeni. Laa binli baa tua falaciamo binli, O Diedo n baa fu ki gaa Siyon yaa binli yeni.

⁹ Edomi kpeni kpandi ki tua sinboanma, O wagima mo kpandi ki tua cidibili, Ki tinga baa tua nani yaa sinboanma n pu yeni.

¹⁰ Li baa yaa buondi u yensiinu leni ku ñiagu kuli, Ke i muñii mo fii ki luo likani yaa yogunu kuli. A bina n tuu aya, ki tinga yeni Baa yaa ye leni li paboanli. Nilo kuli kan go poandi likani abada.

¹¹ Li juuli leni li gudili n baa yendi u kaanu. Ki juubalikpendiga leni li kankali baa yaa ye likani. O Diedo baa teni mi diema yeni N kpandi fanpienma leni li paboanli kaanu.

¹² Mi diema bulicinba kan cua Ki dini bado likani, Mi badijaba mo kuli baa bodi.

¹³ Ti fatudi baa pa badidiegu nni, I konkoni leni moatoadi baa pudi mi kaanpaali nni, Likuli kpandi ki tua tanboe leni ti tataadi kaanu.

¹⁴ I coli leni i naamuuni baa yaa kadi lienni. A ŋuabuana mo baa yaa yi aya, Ku ñiagu jiindi baa cua lankane Ki baa mi fuodima kaanu.

¹⁵ O wa baa tieni o tedigu lankane Ki ŋaa o jena ki wugini a, Ki taa o bila ki kuli oba. Lankani moko yo ke ti kaciidi buoli kuli, Baa taani bongoli.

¹⁶ Cogi mani o Diedo tili ki le, Bi siiga ba bonyendo yaa baa poadi lienni. Oba kan yagi o yama o lielo po, Kelima o Diedo ñoabu n yedi yeni. O Fuoma mo n taani ba.

¹⁷ O lingi bi po mi lingima, O nuu mo biigi biigi ki tinga Leni u baabu ki boagidi ba. Bani n baa yaa die ka yogunu kuli. Bi baa yaa ye ki niinni yaa yogu n tuu yaa yogu.