Esayi 33 - U TIENU MAAMA TILI 2013

U nufanu baa pua yua n bolindi

¹ Fala baa nandi fini yua bolindi Ke bi naa bolindi a, Ki janbidi ke bi naa janbi a! A yaa bolini ki gbeni, bi baa bolini a mo. A yaa janbi ki gbeni, bi baa janbi a mo.

² O Diedo, gbadi ti po mi ninñima! Ti dugi a po ŋan yaa tie ti gbanmanu tiŋaagu kuli, Ki go tua ti gaapo li paboanli daali!

³ I tatantani fuugu deli i nibuoli, A yaa fii yaa yogunu, I nilanbuoli yen sani ki yadi yadi.

⁴ Bi wodi ti fagidi nani a dondoba N yen jiidi ki ŋmani maama yeni, Bi jiidi nani i naaci n yen jiidi maama yeni.

⁵ O Diedo kpedi bonŋanla Kelima o ye tanpole. O gbieni Siyon leni mi teginma Leni yaa bujiali n dagidi.

⁶ A miali yema dana baa yaa pia mi yanduanma. Mi yama leni mi banma tie Yaa ŋalimano n faabidi, O Diedo fangili mo n tie o ŋalimanmoano.

O Diedo n tieni yaala

⁷ Diidi, Arieli jakoanda n buudi i sani nni yeni. Mi yanduanma tonda mo n buudi ki yalini yeni.

⁸ Oba kuli ki ye a sanjala nni, Mu sanbimu nni ki go pia yua n poandi, O biidi o ŋantaado ki fali i dogi. Waa pia fangili oba kuli po.

⁹ Mi diema ye leni li paboanli ki kuodi, Liban diema ye leni i fe ki duni. Saron naani leni u tialu. Basan leni Karimeli tiidi kuli faadi suodi.

¹⁰ O Diedo yedi: «Moala n baa fii, Moala n baa fii ki sedi, Moala bi baa kpiagi nni.

¹¹ Yi jaga kuli tie nani ti muadi, Laa jaga n cuani yaala mo Baa yaa tie nani ti muadi yeni. Yi miani nni fuoma n tie yaa mu n baa je yi.

¹² Yaa nibuoli n sieni, u mu Baa juu ba ban tua nani o kaalo, Bi baa tua nani ban jia yaa konkoni Ke i buodi u mu nni yeni.

¹³ Yinba yaaba n ye foagima, Cengi mani min tieni yaala! Yinba yaaba n ye koanma nni mo N diidi n paalu!»

¹⁴ Ti jawaandi cuo ti tuonbiadi danba Siyon tugu nni, Mi digibima cuo a suuda. Ti siiga ŋme n baa fidi ki sedi Yaa mu n buondi kani? Ti siiga ŋme n baa fidi ki sedi Yaa mu n kan gbindi kani?

¹⁵ Se yua n cuoni mi teginma nni Ki maadi ke li tiegi, Kaa bua ban fie yaala leni u paalu, Kaa bua ki gaa suuli, Ki biindi o tuba kaa bua Ki cengi nikpaba maama, Ki pii o nuni kaa bua ki diidi yaala n bia.

¹⁶ Landaano baa yaa ye yaa kaani n kpedi, Yaa tanciangu n juagi n baa yaa tie o wuonkaanu, O baa yaa baadi mi jiema, Ñima mo kan poadi o.

Jerusalemi baa faabo

¹⁷ A nuni baa le o bado o ŋamu nni, A nuni yeni baa le mi diema N tandi ki pundi naani kuli.

¹⁸ A baa tiadi yaala n den jiendi a po ki yedi: «Yua n den goandi yeni kua le? Yua n den diidi yeni kua le? Yua n den goandi i kaanpaali yeni kua le?»

¹⁹ A kan go le ti japaadi nibuoli, Yaa buolu yaa maama n ki pia gbadima, Yaa nibuolu yaa maama n tie kala Ke mi gbadima ki dingi.

²⁰ Diidi Siyon, tin taagi ti taana yaa dogu nni! A nuni baa le Jerusalemi Mi yanduanma kaanu, Laa gbandieli kan go ŋmiagi, Li kpaana kan go ŋabi abada, Li baabi mo kan lodi.

²¹ Lankane ke o Diedo ŋani ti po hali bonŋanla. O tie ti po kpenciami leni fuani kaanu, Ban gobidi yaa ñinbiadi Leni ti ñinkaaliti n kan kua naankani, Ke ñinbiacianguba mo kan poandi likani.

²² Yeni! Kelima o Diedo n tie ti bujialo, Wani n tie ti liiga yua. O Diedo n tie ti bado, Wani n baa faabi ti.

²³ A baabi yoaligi, Yii go dadi ku dafoagidigu bonŋanla. A maalima caba ki tandi bonŋanla, Bi baa boagidi yaa fagidi n yabi boncianla. Ba a diama moko cua ti fagidi po.

²⁴ Mi diema nni oba kuli ki tua: «Mii pa.» Yaa nibuoli n ye Jerusalemi baa sugili bi tagili po.