Esayi 32 - U TIENU MAAMA TILI 2013

Mi ŋanma bado

¹ Li baa baa yaa bado n baa gobidi mi diema Leni mi teginma, Bi badijaba mo n gobidi Nani lan pundinni maama.

² Bi siiga, yuakuli baa tua nani u wuonkaanu u faalu po, Nani u wuonkaanu ku tafaaciangu po, Nani mi ñinpuubikaama ki tinkuonga nni, Nani ku tanciangu soangu li tinwali nni.

³ Yaaba n nua nuni kan go yaa nua kpigili kpigili, Yaaba n cengi mo yaa tuba baa yaa gba bonŋanla.

⁴ Bi yanjegibidanba baa kpaagi Ki fidi ki gaa bonŋanla, Yaaba n bidi maama baa yaa jaligi Ki go cebidi mo.

⁵ Bi kan go yini yanluodaano bulicino, Bi ki yedi ke niyuogu tie niŋamo.

⁶ O yanluodaano wani maadi o gaadimaame. O pali nni o tia yaala n bia, Ki tuuni li cancagintuonli. O maadi o Diedo po ti mayuogidi. O muni mi koma n pia yua mi jiema, Ki fie u ñuñuunu n pia yua mo yaa ñima.

⁷ Ku niyuogu wani yaa tuada gundi, O jagi a jagibiada ki baa biani Taliga leni mi tuofaamaama, Ba ke o se i moamoani nni.

⁸ Ama o bulicino jaga tie bulicinjaga, O se o bulicinjaga nni.

U Tienu fu leni Jerusalemi puoba

⁹ Yinba yaa puoba n duani yi yama yeni, Fii mani ki cengi n nialu. Yinba Jerusalemi badisiaba, Yaaba n dugi bi yula po, Diadi mani yi tuba ki cengi n maama.

¹⁰ Nekanba leni binli leni danaba, Yi baa digibi yinba yaa puoba N dugi yi yula po yeni, Kelima duven tiidi bonluonkaala baa gbeni, U jetaagu mo kan tieni.

¹¹ Yaa ye mani leni i jeje, Yinba yaa puoba n dugi yi yula po yeni. Yiedi mani ki sedi mubima. Baa mani ku gbanñagidigu ki ñagini yi ciamu.

¹² Pua mani yi bena ki mua kelima li paboanli po, Yi koaŋami leni yi duventiidi Yii n luoni kuli yaa po.

¹³ I konkoni leni a kongoaba fii Ki loli n niba tinga nni, Ki taani leni yaa dogu nni Ke ti diedi kuli ye leni li pamanli.

¹⁴ Badidiegu ki go pia nilo, Bi sani ki ŋaa yaa dogu n den gbie Leni bi niba yeni. Ki joabiga leni li toadiefoagili Baa kpandi ki tua wuonkaanu i fuaŋunbi po, Bi yema n baa yaa mani bi po naani, Ki go tie ti yandi kuli yankpaakaanu.

Mi yema lebidi ki ŋanbi

¹⁵ Dayenli o Diedo baa jiini o Fuoma ti po. Lani, mi fanpienma baa kpandi ki tua tikuanu, U tikuanu yeni mo baa kpandi ki tua fuajali.

¹⁶ Yaa bujiali n tiegi baa yaa ye mi fanpienma nni, U tikuanu nni mo mi teginma baa yaa ye.

¹⁷ Mi teginma n baa cuani yaala Baa yaa tie mi yanduanma. Mi teginma baa cuani mi yemanma Leni laafia yaa yogunu kuli po.

¹⁸ N niba baa yaa ye leni mi yanduanma, Bi jigi n baa yaa co yaa diedi nni, Leni yaa diedi yaa niinni n pia mi yanduanma cain.

¹⁹ Ama a tatana baa pua ki guli li fuali tiidi kuli. U dogu jigidi mo baa bodi.

²⁰ Li pamanli ye leni yinba yaaba N buu i kpeni balinma yeni, Ki go dagidi ki ŋaa o nua leni o ŋunbo.