Esayi 30 - U TIENU MAAMA TILI 2013

U Tienu koani leni ba, kelima bi danli leni Ejipiti yaaba

¹ O Diedo yedi: «Fala baa nandi a biyiekaana yaaba N tiendi yaala n kaa tie n jagili. Bi kuani min kaa bua yaa ŋantaado leni nitoaba. Yeni bi tiendi ti tuonbiadi Ki dogindi tiyadi po.

² Bi caa Ejipiti diema nni ki naa buni nni, Ki lingi u wuonkaanu Faraon kani, Ki lingi ban baa deni naani, Ejipiti diema soangu nni.

³ Faraon kani wuonu baa tua yi po fe. Ki wuoni Ejipiti diema soangu nni mo Baa tua yi po laadi bonla.

⁴ Bi koanbala peli ki pundi Tisoani dogu, Ke bi tonda mo pundi Hanesi dogu.

⁵ Ban caa yaa nibuolu po yeni Baa teni bi gbani n wudi, Kelima u kan fidi ki midi bi po puu, U kan fidi ki todi ba puu kuli nni. U kan yaa pia bi po fuomiba kuli, Ama u baa teni ban le i fe Ki go tua ti laadi bonla.»

⁶ Yaa yebiadima n jagi nuganu yandi po nno. Bi tungi bi ŋalimano i ŋunbi leni ti yuoyuodi po, Ki poandi li paboanli leni i yanbani diema nni, I yangbanbiadi n duni naani, Li waalabili leni yaa bonfuodibiado n yugi n ye naani, Ki caani likuli yaa nibuoli n ki pia bi po todimiba po.

⁷ Ejipiti diema todima kuli Ki pia mayuli, li tie fanma bebe. Lani yaa po yo ke n tiani ki yedi: «Japaadanba bebe, bi kan sedi kaanyendu!»

⁸ Cua moala ki diani laa bonla Bi nintuali i tanpabi po, Diani laa bonla kuli li tili nni, Lani n tie lan waagi ki ye hali li juodidaali, Yaa yogu n tuu yaa yogu po.

⁹ Bi tie niyiekaaba yo. Bi tie tupaali danba yo, Yaaba n ki bua ki cengi O Diedo bali maama.

¹⁰ Bi ŋua ki tua yaaba n nua saala bonla: «Da nua mani.» Ki tua bi saawalipuaba mo: «Da pua mani ti po yaa saawalo n tiegi! Yaa banbidi ti mani! Yaa togidi ti mani yaala n mani.

¹¹ Ŋaa mani u sanu, Jadi mani ki ŋaa u sanu Ñani mani ti nintuali Isidayeli Tienu Yua n Gagidi ki ŋani yeni.»

¹² Lani n teni ke o Diedo Isidayeli Tienu, Yua n Gagidi ki ŋani yeni yedi: «Nani yin yie yaa maama n tie ne maama, Ki bua ku tugumoangu leni i janbi, Ki go dugi lipo yeni,

¹³ Laa tagili baa yaa jagi yi po Nani u bilini n toani i yiani Ke li bia upo maama yeni. Laa yiani yen puodi yaa bilinu n kpedi, Ki teni wun ŋmadi ki baa yenma.

¹⁴ Li tie yene ke o maado cuali Baa mudi yomi yomi, Ke bi kan le yaala n sieni, Ki buali ba cianciaga yaaga N baa padi u mu u fanu nni.»

Duani mani yi yama, yaa dugi mani n po

¹⁵ Li Miali Diedo U Tienu Isidayeli Tienu Yua n Gagidi ki ŋani yedi: Yi guanma U Tienu kani N baa cuani yi po mi yanduanma Leni mi faabima. Yi paalu ye mi yanduanma leni ti dugidi nne. Ama yi naa bua la,

¹⁶ Ki nan yedi: «Yeni ka, ti baa sani leni i taame!» Lani n teni ke yi baa sani mo. Yi go tua: «Ti baa jagini yaa taami n pa mi nuama.» Lani n teni ke yaaba n baa ŋoadi ki deli yi Baa yaa jaligi ki cie yi.

¹⁷ Niyendo bebe yaa jamuali po Baa teni niba tudili n sani nani niyendo yeni. Nibimuu mo yaa jamuali po, yi baa sani Hali ki ban tua nani yaa dafoagidigu N caa li juali yuli po, Bi nani yaa jakoandicabili N ye li juali yuli po yeni.

Mi faabima yogunu

¹⁸ Lani yaa po yo, ke o Diedo Guu ki baa ŋanbi yi po. O baa fii ki gbadi yi po mi ninñima, Kelima o Diedo tie yaa Tienu n tiegi. Li pamanli ye leni yaaba n dugi o po kuli.

¹⁹ Fini yaa nibuolu n kaa Siyon, Jerusalemi dogu nni, a kan go buudi, Kelima o baa gbadi a ninñima A yaa buudi yaa yogunu. O yaa gbadi yaa yogunu mo, o baa lebidi a.

²⁰ O Diedo baa pa yi mi jiema li pabiidili nni. O go baa pa yi mi ñima o ñinkpankpagu yogunu. Yaaba n bangi a, kan go poadi ki sedi. A nuni baa yaa nua yaaba n bangi a.

²¹ A yaa baa jadi ganu bi jienu, A baa gbadi u nialu a puoli po, Ke u yedi: «U sanu nno, tagini wuni.»

²² Yi baa yaa nua ke ban boali yaa nannana Ŋanjilifa leni wula kuli joagini. A baa pua ki yadi laa joagindi, Ki yedi ba: «Ña mani nekanba.»

²³ Lanwani, o baa ŋaa ki taaga A bonbulikaala po, Ki tinga mo baa luoni Yaa bonluonkaala n yabi ki go mani mo. Landaali a yangola baa gedi Ki ban ŋmani yaa yankpaakaani n yabi nni.

²⁴ Yaa ne leni yaa ŋunbi n ko ki tinga, Baa ŋmani yaa muadi n kaali leni mi yaama, Ban lendi yaala leni ku kaaligu.

²⁵ Mi janjanbiadima daali, A diefoaga n baa baa yaa daali, I ñinsani leni i fuani baa pudi, A joaciama leni a joabila kuli yula po.

²⁶ U cipienu baa yaa tie nani u yienu yeni. U yienu mo baa yendi taalimilele ki pugini, Nani danalele yenma N baa taani yenma maama yeni. Li baa yaa tie o Diedo n baa buu O niba poagilima yaa daali, Ki paagi ban den pua ki poagili naani.

²⁷ Diidi, o Diedo ñani hali foagima ki kpendi, O pali beni hali boncianla. Li tie yaa bonla n bia hali boncianla, O ñoacuuna doagidi o pabienli, O lanbu mo tie nani yaa mu n buondi yeni.

²⁸ O fuoma tie nani yaa kpenu n gbie Ki duodi, ki pundi hali u tulu. O baa yogi i nibuoli hali ki bolini yi. O baa kpibini i nibuoli mi bodima biaga.

²⁹ Yi baa yiini nani Mi jaanma daali ñiagu yeni. Yi pala baa yaa mani, Nani yua n cuoni ki ŋua Ki yeliga piebima yeni, Ki caa o Diedo juali po, Wani Isidayeli Tanciangu.

³⁰ O Diedo baa teni ban gbadi O nialu yuu n pia li bali. Bi baa le o nuu n baa faligi ba maama, O pabiencianli leni yaa mu n buondi nni. O baa faligi ba ki tacianga, ku tafaagu Leni a tatana nni.

³¹ Asiiri yaaba baa gbadi o Diedo nialu, Ti jawaanciandi n cuo ba. O Diedo baa pua ba leni o gbiamu.

³² O Diedo yaa pua o gbiamu yaa yogunu kuli, Yi baa gbadi ke mu lonmu leni ti gogidi pua. O Diedo baa koani leni ba leni mi jama.

³³ Bi tuodi ki bogini u juukaanu hali yogu, Li kaanu tie o bado moko yaa po yo. Li tie buogu yaagu n ñua ki go pia. Bi dogini likani yaa daadi n yabi Boncianla mi juuma po. O Diedo baa piebi ki cuoni u mu likani.