Esayi 3 - U TIENU MAAMA TILI 2013

Li bonla kuli tua juga Juda diema nni

¹ Li Miali Diedo U Paaciamu Kuli Daano Baa muni Jerusalemi dogu yaaba Leni Juda diema yaaba Li bonjekaala, mi ñima Leni lan tie yaa todima buolu kuli.

² Bi kan baa jakoanda leni toatieba, Bujiaba leni saawalipuaba, Lingida leni a nikpela,

³ Niba piimuu yudanba, Bi bulicinba, bi tundikaaba, Bi buligbandanba leni a baayuadiida.

⁴ N baa teni a bonwaala N yaa gobidi ba Ki caani ba ban bua naani.

⁵ Bi niba baa fii ki sedi biyaba po. Yuakuli baa nandi o yieninlielo. A bonwaala baa fii ki paagi A jakpela yama, Ti niyuogidi mo baa fii Ki pani bi bulicinba po.

⁶ Jayendo baa cuo o kpiilo Ku baadiegu nni ki yedi o: «Fini wan pia li bonlakaala, Tua ti yudaano, Ki yaa gobidi tinba taliginba.»

⁷ Landaali o baa kpaani ki yedi ba: «N kan fidi ki todi yi, N diegu nni ki pia jiema, Mii pia tiayiekaadi mo. Da tuni mani nni ku naa niligu yuli.»

⁸ Jerusalemi tuudi, Ke Juda mo ŋmadi ki baa. Bi ñoana maadi o Diedo kpiagidi leni mi kafaama, Kelima bi maama leni bi tuona po.

⁹ Bi japaadi jia bi buudi. Bi doagidi bi tuonbiadi Nani Sodomi yeni, ki naa wuondi ti mo, Mi yebiadima n ŋmaa ba, Kelima bani n lingi bi fala.

¹⁰ Yedi mani: «O niteginka pali mani Kelima o baa je o tuonli ñuadi.

¹¹ Fala baa nandi o nibiado, Kelima waa ŋua yaa sanu n ŋani. Wan soani yaa tuona baa guani Ki baa o yuli po.»

¹² Bonwaala n li wangi n niba fala, Puoba mo n li die ba. N niba, yaaba n gobidi yi yaani yi, Ki bolini yin ŋua yaa sanu.

Bi gobidikaaba buudi jiama

¹³ O Diedo baani ki gbeni ti buudi jiama po. O fii ki baa bu i nibuoli buudi.

¹⁴ O baa bu o niba siiga a nikpela buudi Leni bi yudanba yaadi, ki yedi: «Yi ŋmani n duventiidi kuanu, Yin fie yaala a luoda kani gbie yi diedi.

¹⁵ Be yaa po yo ke yi wangi n niba Fala ki mabindi a luoda? Li Miali Diedo U Paaciamu Kuli Daano n yedi yeni.»

Jerusalemi puoŋanba

¹⁶ O Diedo yedi: «Nani Siyon puoba n pia ti puopaadi Ki cuoni ki dadi bi tuli, Ki pia mi kafaama, ki cuoni dindini, Ki teni ke bi taana biana mua yeni,

¹⁷ O Diedo baa teni bi yula n fabidi, O Diedo baa kuo ba yukpankpanma.»

¹⁸ Li daali kpendi ke o Diedo baa fie, Siyon puoba n pua ti jafandi leni yaa tiadi. Lani n tie: a taana biana, li bontabinkaala, yaa bonlakaala n tie nani o ŋmaalo yeni,

¹⁹ a tubilenlena, a biana leni ti kpalilibinkaadi,

²⁰ ti finfinjuadi leni li bonlakaala, ti gbanñagiditi, i ñoagigbani leni a ñoagitila,

²¹ mi ñoagima leni yaa ñoagima n baa tieni i miani kani,

²² ti jaantiadi leni ti kaabugiti, a caba leni a boaga,

²³ a liadiciama leni a bonbila, a cencenmaada leni yaa cabili n maandi li boacabili po.

²⁴ Li bonbedinla n baa gaa tulale kaanu, U baabu n gaa ku gbanñagidigu kaanu, Li yuminminli n gaa u pianŋamu kaanu, Li paboanli tiadi mo n gaa, Li liadikpiagili kaanu. Yaala n tie u ŋamu yeni baa kpandi Ki tua fe bebe.

Jerusalemi kpepuona

²⁵ Jerusalemi, ki jugisiega baa je a jaba, A jakoanda n kpe bu toabu nni.

²⁶ Siyon dogu buliñoana n mua Ki go yaa ye li paboanli nni.