Esayi 29 - U TIENU MAAMA TILI 2013

Yaa saawalo n ye Jerusalemi po

¹ Arieli, fala baa baa ŋa! Fini Arieli, Davidi n den cua Ki baa yaa dogu yeni. Ba ke a tiendi mi jaanma Binli n tuu binli,

² N baa nugi fini Arieli, Ki teni kaliti leni dunli bebe n sieni. U dogu baa yaa tie n po nani Arieli yeni.

³ N baa fii ki sedi a po ki gaani ki lindi a. N baa sieni sieni n toatieba ban gaani ki cebini a, Ki tieni n toawuonkaani ki baa ŋa.

⁴ A baa le i fe, A baa yaa bili tiipo yo ki maadi. A maama baa jiidi ki cie mi wagima. A nialu baa yaa ña ki tinga nni Nani ku jiingu yeni. A baa yaa bili mi wagima nne Ki maadi ki soabidi.

⁵ Yaa niligu n taani ki tie a yibalinba Baa yaa tie nani u tangunjuanu yeni. Laa niligu yaagu n bia yeni, Ba tua nani u faalu n piebi Ki yugini yaa muayoma ke mi bodi yeni.

⁶ Li Miali Diedo U Paaciamu Kuli Daano Baa cua ki goandi a leni i tatantani, Mi tindigibima leni yaa fuugu n yabi hali boncianla. O baa goandi a leni ki tacianga, ku tafaagu Leni yaa mu n co ki buondi.

⁷ Nani ti dangidi leni ku ñiagu Bonlekaala n yen bodi maama, Li baa tua yeni leni i nilanbuoli diema, Yaama n baa koani leni Arieli. Li go baa yaa tie yeni leni yaaba n cua ki baa o, Ki baa lingi ki bolini o leni o kaanpaali kuli.

⁸ Lanwani, nani mi koma n pia yua N dangi ke o di maama, Ki yen fundi ki sua ke o tugu nni Ki pia liba yeni, Bi u ñuñuunu n pia yua n dangi ke o ñu, Ki yen fundi ki sua ke o coagi Ke o nialu kuodi maama yeni, Li baa yaa tie yene i nilanbuoli niba kuli po, Yaaba n cua ki baa koani leni Siyon juali.

Ti juandi leni mi dañogaadima

⁹ Sedi mani suo, ki jie ki luodi! Ŋubini mani, ki kpandi mani juama, Ki yaa tie nani yi ñuni ki gaadi yeni, Ama laa tie leni daama ka ke yi jadibi. Yi jadibi mani ke laa tie dabiadima ka kubi yi,

¹⁰ Kelima o Diedo kuani yi niinni Mi guama yantiali ke yi gonbidi. O pii yinba bi saawalipuaba nuni, Ki libini yinba a baayuadiida mo yaa yula ti kpaliti.

¹¹ Laa bonla kuli yaa lema tie Nani ban poabini ki luoni yaa tili Ki teni li yua n bani u cogu ki yedi o: «Cogi line!» Omo guani ki yedi: «N kan fidi, Kelima li puabi ki go lo.»

¹² Bi nani ban baa taa li tili ki teni Yua n ki bani u cogu ki yedi o: «Cogi line!» Omo guani ki yedi: «Mii bani cogu.»

¹³ O Diedo yedi: «A laa u naa nibuolu yen cua n kani, Ki yaa kpiagidi nni leni u ñoacuuna, Ama u pali foagi leni nni. Wun pia n po yaa fangili mo tie maasuagu bebe.

¹⁴ Lani n teni ke n baa yaa baa Ki tiendi upo li bonludikaala. Bi yanfuodanba yanfuoma baa bodi. Bi nunfandanba nunfanbu baa sani Ki ban wuoni.»

¹⁵ Mi yebiadima baa baa yaaba N wuondi o Diedo bi jaga, Ki tiendi bi tuona kuli li biigili nni. Bi maadi ki tua: «Ŋme n nua ti, ŋme n bani ti?»

¹⁶ Mi naa yanluoma te? Naani o maado leni ku yoagu baa yaa tie yenma, Hali yaala ke li tuonli baa yedi o tuonsoanlo: «Fini ka tagi nni?» Naani li bobili baa yedi o maado: «Ŋaa bani liba?»

Li bonla kuli lebidi cain

¹⁷ Ne leni yogunu waamu, Liban fuali baa lebidi ki tua tiidi kuanu. I tiidi kuanu yeni mo n lebidi ki tua fuali.

¹⁸ Landaali a woma baa gbadi li tili yeni maama, A juama nuni baa ŋubidi ban faabi Leni li biigili leni ku ñiagu.

¹⁹ Bi yumiindanba pamanli baa Yaa pugidi o Diedo nni, A luoda pala baa mangi ki kandi, Kelima Isidayeli Tienu Yua n Gagidi ki ŋani yeni po.

²⁰ O tugumoandaano kan go yaa ye. O ñuañuado baa bodi. Yaaba n den wuo ki tiendi Yaala n bia kuli baa bodi cain.

²¹ Yaaba n den maadi ki kuliti Bi lieba ti buudi danba kani, Ki maadi ki gangidi bi lieba li bujiali yogunu, Ki teni ke bi ja ti buudi ki mundi O niteginka i moamoani kuli baa bodi.

²² Lani n teni ke o Diedo maadi Leni Jakob diegu nni yaaba, Wani yua n daa ki faabi Abalahama. Moala Jakob kaa go ye leni i fe. Moala o nunga kan go boandi,

²³ Kelima yaa yogunu ke o bila Laa bi siiga nni n nii tuonli, Bi baa bandi min tie yua, Mini Jakob Tienu Yua n Gagidi ki ŋani, Ki yaa fangi mini Isidayeli Tienu.

²⁴ Yaa niba n luo mi yama baa baa mi yanfuoma, Yaaba n den tie niyiekaaba mo baa gaa i tundi.