Esayi 27 - U TIENU MAAMA TILI 2013

Bi paadi mi ñincianma nni bonfuodibiado

¹ Landaali o Diedo baa taa o jugisiega, Yaaga n mani ki yabi ki go pa, Ki faligi mi ñincianma nni bonfuodibiado, Yaa wa n tiini, wani yaa wa yaa tagu n goli yeni. O baa kpa mi ñincianma bonfuodibiado yeni.

O Diedo leni o duventiidi kuanu

² Landaali, yiini mani Yaa duven tiidi yaa daama n mani po.

³ Mini Li Miali Diedo n tie o koaguudo, N kpidi u yogunu kuli, Ñiagu leni yensiinu kuli n guu u, Kelima mii bua ban baa u.

⁴ N kan go bieni n pali n duven tikuanu yeni po. Ama n yaa laa konkoni bi kongoaba, N baa pedi i kuli, ki juu i u mu.

⁵ Ama yua n bua min tua o wuonkaanu, Wan lingi mi yanduanma leni nni! Yeni de! Se wan lingi mi yanduanma leni nni!

⁶ Yaa yogunu n kpendi nne, Jakob baa pa i jiini, Isidayeli n tieni a ŋuada leni mi puuma. O baa gbieni li ŋandunli leni o bonluonkaala.

⁷ Naani o Diedo pua ba nani wan den pua Yaaba n den pua ba maama yeni? Naani o kpa ba nani wan kpa Yaaba n den kpaani ba maama yeni?

⁸ Yeni ka! Ama puoli faagu n baa cua yaa daali, O baa jia bi buudi, ki deli ba, Ki piebi ki yadi ba leni o ñoabu fawaama.

⁹ Lani n tie ban baa duuni ki ñani Jakob tuonbiadi maama. O tuonbiadi sugili miabu mo n baa cuani yaala nne: O Diedo baa teni li padibinbinli tana kuli N mudi yomi yomi nani o kaalo yeni. O kan go cedi Akera budaadi n yaa go se, Ban juugi tulale naani kuli.

¹⁰ U kaanpaalu ye u bebe yo U tie ban ŋaa yaa diegu, Oba kuli ki go ye lienni nani Mi fanpienma yeni. A naabila dua lankane ki fuo, Ki ŋmani ti fatudi.

¹¹ I beni yaa kuodi bi yen kua yi, Bi puoba n cua ki taa yi ki ban kuuni. Li den tie yaa niba n ki pia yanfuoma, Yua n den tagi ba ki den gbadi bi ninñima, Yua n den tagi ba ki den juogi ba.

Yaaba n sani ki puodi dietoama guakpenma

¹² Landaali, o Diedo baa yoagi i tiidi, Ki cili u kpenciamu Efrati, Ki ban pendi Ejipiti ñinbaadu. Bi baa duo yi yendo yendo Yinba Isidayeli yaaba.

¹³ Landaali, bi baa piebi li naatuntuncianli. Yeni, yaaba n den bodi Asiiri diema nni, Baa guani ki cua. Yaaba n yadi Ejipiti diema nni Baa gbaani ki pugi o Diedo, Yaa juali n gagidi ki ŋani yuli po. Li baa tua Jerusalemi dogu nne.