Esayi 26 - U TIENU MAAMA TILI 2013

Yaa dogu n pia u paalu yanbu

¹ Landaali bi baa yiini bu naa yanbu Juda diema nni: «Ti pia yaa dogu n pa. O Diedo puni ti i bilini yin tua Ti faabima leni ti wuonkaanu.»

² Luodi mani a buliñoana, Yaa nibuolu yaa niba n tiegi n kua Kelima bi tie nidugikaaba.

³ Yua n se bonŋanla o jaga nni, A puuni o mi yanduanma, Kelima o dugi a po.

⁴ Dugi mani o Diedo po yogunu kuli, Kelima wani Li Miali Diedo yeni N tie yaa Tanciangu n ye Hali yaa yogunu kuli.

⁵ O guli yaaba n den jagi tanpoli, Ki tudi ki luni yaa dogu n pia u paalu. O tudi ki luni u hali tiipo, Ki teni ke u baa mi wagima nni.

⁶ O teni ke bi ninñinniba leni a tadima Ŋmaa u leni bi taana.

Mi juodima dana tuondi

⁷ O niteginka sanu n tie mi teginma. Fini yua n tiegi yeni, A ŋanbidi o niteginka sanu.

⁸ Lani n teni ke ti dugi a po, Fini o Diedo, Ki ŋua ŋan bili ti po yaa sanbila kuli. Tin bua yaala leni ti pala kuli n tie, Ki yini a ki mia a todima.

⁹ Ku ñiagu kuli n nua fine Ki lingi a leni n pali kuli, Kelima a yaa jia a buudi ki tinga nni, Li ŋandunli nni yaaba baa bangi Ki yaa tiendi yaala n tiegi.

¹⁰ Bi yaa gbadi o nibiado po mi ninñima, O kan bangi ki yaa tiendi yaala n tiegi. Se wan yaa golindi i moamoani Mi teginma diema nni, Kaa faami o Diedo bali po.

¹¹ O Diedo, a nuu yuugi ki baa pua, Ama baa faami a cuu po. Bi baa le a buacianma a niba po, I fe n cuo ba. Yene ke u mu baa je a yibalinba.

¹² O Diedo, a puni ti a yanduanma, Kelima tin tiendi yaala kuli, Fini n tiendi la ti po.

¹³ Li Miali Diedo ti Tienu Canbaantoaba diedi ti. Ama fini bebe n tie tin jaandi ki miadi yua.

¹⁴ Nani bi tinkpiba n kan go faadi, Ke yaaba n kpe mo kan go fii maama, A bolini ba yene, ki teni ke bi sundi bi po cain.

¹⁵ O Diedo, a pugini ti buolu! Yeni de! A pugini ti buolu! Lani yaa po yo ke a baa ti kpiagidi! A diadi mi diema tinbiani kuli.

¹⁶ O Diedo, ti sani Ki cua a kani ti pabiidili yogunu. Ba ŋan faligi ti maama kuli, Ti miadi a yaa todime.

¹⁷ O Diedo, ti ye a nintuali Nani yaa pua n punbi ki bua maa, Ki lu ki lebidi u tugukoanu po Ki kuudi yeni.

¹⁸ Timoko tie nani yaaba n punbi yeni. Ti laa fala boncianla. Ama laa fala kuli juodi fanma bebe. Tii tieni yaala n baa fidi ki faabi ki tinga, Bi ki lebidi li ŋandunli niba mo.

Bi tinkpiba fiima, mi biadima panpaani

¹⁹ N niba, yi tinkpiba n guani ki faadi! N niba yaaba n kpe baa guani Ki fii bi tinkpiba siiga! Fundi mani, mangi mani yi pala, Yinba yaaba n dua mi tama nni, Kelima o Diedo baa guani ki pa yi Mi yenma mangu, Ki tinga mo n teni bi tinkpiba kuli n faadi.

²⁰ Gedi mani n niba, kua mani yi diena nni, Ki jili ki luoni yi buliñoana. Wuoni mani yi yula u yogunu waamu Hali o pabienli n kuugi.

²¹ O Diedo ñani o diegu nni, Ki baa faligi ki tinga niba bi tagili po. Ki tinga baa doagidi yaa soama N den wuli ki niinni, Ki kan go doagini ban ku yaaba.