Esayi 25 - U TIENU MAAMA TILI 2013

O Diedo tie wuonkaanu o nidugikaaba po

¹ O Diedo! A tie n Tienu, N baa yaa jigini a ki kpiagidi a yeli, Kelima a tieni li bonlidinkaala. Ŋan taa yaa jaga hali yogunu se Bonŋanla ki kan lebidi.

² A teni ke u dogu kpandi tanfana bebe. Yaa dogu n pa kpandi diegbena. Bi canba kaanpaalu bodi u dogu nni. Bi kan go guani ki maa li kaanu abada.

³ Lani n teni ke yaa nibuolu n pia U paalu kpiagidi a, Ke yaa dogi mo yaa niba n pia Ku tugumoangu fangi a,

⁴ Kelima fini n den tua o tadimo wuonkaanu, O luodo wuonkaanu o paboanli daali, U wuonkaanu ki tacianga daali, U soangu u yienu n gbadi yua yaa po. Bi tugumoandanba pabienli Tie nani yaa taaga n mi li guonli po yene.

⁵ Nani ku wulugu n paani Ki tinkuonga maama, A paadi bi nilanba fuugu yene. Nani ku tawaligu soangu n paadi Ku wulugu maama, A paani bi tugumoandanba yanbu yene.

Mi jaanjiema i nibuoli kuli po

⁶ Li Miali Diedo U Paaciamu Kuli Daano baa tieni Mi jaanjiema i nibuoli kuli po, Li naa juali po. Mi jaanma leni yaa jiema n mani bonŋanla, Mi jaanjemanma leni mi damanma, Mi jemanma yaama n gbie leni o lonlogo, Mi damanma yaama n baani.

⁷ Li naa juali yuli po o bolini Yaa kpalilibinkaabu n den liibi i nibuoli kuli Leni yaa kpalidoaginkaabu N den duagi mi diema kuli.

⁸ O bolini mi kuuma yaa yogu n tuu Yaa yogu kuli po. Li Miali Diedo U Tienu, Baa duundi mu nunmu kuli nunsiidi. O baa kagidi o niba fe ki tinga nni kuli, Kelima o Diedo n maadi.

U nufanu pua Moabi diema

⁹ Landaali bi baa yedi: «Ti Tienu n na. Wani n tie tin dugi yua yaa po. Wani n faabi ti. O Diedo n tie tin dugi yua yaa po. Tin mangi mani ti pala bonŋanla, Tin mangi mani ti pala o faabima po,

¹⁰ Kelima o Diedo nuu n maa li naa juali po.» Bi nugi Moabi ki bili o li buoli nni, Nani ban yen nugi ti muadi maama Ti bugidi buogu nni yeni.

¹¹ Laa buogu yaa niinne, Ke Moabi tandi o nii nani o ñindugilo yeni. Ama o Diedo baa jiini o japaadi, Ba leni o moandili kuli.

¹² O baa tudi ki lu a kaanpaali Yii n jagi a bilini po Ki kpedi boncianla kuli, Ki teni yin baa tiipo mi wagima nni.