Esayi 23 - U TIENU MAAMA TILI 2013

Fenisi diema bolinma

¹ Yaa saawalo n ye Tiiri po. Yaa buudi mani Tarsisi yaaba, Yinba ti ñinbiaciandi danba, Kelima Sipiri kpendega po, Bi gaa yaa laabaalo n tie ne: U dogu mudi ki bia fanma, Diedi ki go ye, buliñoabu mo ki go ye.

² Yaa ŋmini mani kelima i jeje po, Yinba Siyon kpenkpenda, Yaaba n kaa u ñinkunu, Ki tuuni yi tonda mi ñincianma nni.

³ U kpenciamu Nili balinma bonluonkaala kuli, Den tagi mi ñincianma nne ki kpendi Sidon. Sidon n den tie i nilanbuoli kuli daaga.

⁴ Yaa ye leni i fe fini Sidon, Mi ñincianma nni kaanpaalu, Kelima mi ñincianma maadi mine: «Mii bani maditugukoanu, Mii mali, mii wubi jawaaba ke bi fandi, Mii wubi jafanba mo.»

⁵ Laabaali yaa pundi Ejipiti diema nni, Bi baa digibi nani Tiiri n den gaa Laa laabaalo ki digibi maama yeni.

⁶ Poandi mani ki gedi hali Tarsisi dogu. Yaa mua mani yinba yaaba n ye u ñinkunu.

⁷ Naani yi domoanu yeni liga nne, Yuu n cili yaa bina n kpeligi Hali boncianla yeni? Wuni n den li caa hali foagima Ki ban paadi dotoe yeni?

⁸ Ŋme n baa laa yanjagili Ki fii ki sedi Tiiri dogu po, Yuu n den boagidi mu badifogilimu Ke u kpenkpenda mo tie badijaba, Ke bi den kpiagidi u kpenkpenda Ki tinga nni kuli mo?

⁹ Li Miali Diedo U Paaciamu Kuli Daano N baa laa yanjagili Ki bua ki poagili yaala n ñuliti kuli japaadi, Ki bua ki jiini ban jigini yaaba kuli ki tinga nni.

¹⁰ Tarsisi dogu bisalo, yaa ko A tinga nani u kpenciamu Nili balinma n tie maama yeni, Kelima ti ñinbiadi n baa sedi naani Ki go ye.

¹¹ O Diedo tandi o nuu mi ñincianma po. O teni ke mi diema buoli digibi, O yedi Kanana n bolini o kaanpaali.

¹² O yedi: «A kan go yaa baa ki jeli, Fini Sidon dogu bisalo Ban ñii yaa jafanbiga leni u paalu yeni. Fii ki gedi Sipiri diema nni. Ba lanpo fuodima ki ye a po.

¹³ Diidi Kalide yaaba diema, Laa nibuoli ki go ye. Asiiri yaaba taa ba ki teni yaa niba N ye mi fanpienma nni. Bi den maa a diefoaga ke a kpedi Ki go maa i kaanpaali. Asiiri yaaba tudi ki luni ki bolini likuli.

¹⁴ Yaa mua mani, Tarsisi ñinbiadi Kelima yi wuonkaanu bodi.»

¹⁵ Laa daali bi baa sundi Tiiri dogu po Hali bina piilele, Nani o bado dana n baa waagi yaa banlu. Bina piilele yaa pendi, yaala n baa tieni Tiiri Baa yaa tie nani ban yiini yaa puoconconli ki tua:

¹⁶ «Taa ku gogidigu, fini ban sundi Yaa puoconconli yeni, Ki gaani ki lindi u dogu, Pua bonŋanla ki yiini a yani hali ban tiadi a po.»

¹⁷ Bina piilele yaa tuoni, o Diedo baa goandi Tiiri dogu. Tiiri baa guani ki yaa baadi o puoconconligi. O baa conbi leni yaa diema buoli kuli n ye ki tinga nni.

¹⁸ Ama o bonbaakaala leni o ñuadi kuli baa tua o Diedo po yo. Bi kan dogini la, bi kan bili la mo. O bonbaakaala baa tua yaa jiema n guondi leni yaa tiayiekaadi n ŋani boncianla, yaaba n ye o Diedo nintuali po.