Esayi 22 - U TIENU MAAMA TILI 2013

Jerusalemi n yaa faami

¹ Yaa saawalo n ye li bonlekaala joaloangu po. Jerusalemi, li tie ŋa lede ke a niba kuli ñani Ki se bi diena yula po?

² Be yaa po yo ke bu lanbu gbie u dogu nni? Be n teni ke u dogu nni pia ku naa fuugu? Be n teni ke a niba kuudi? A niba yaaba n kpe naa kpe bu toabu po ka, Baa den kpe mi janjanma po ka.

³ Bi toatieba yudanba kuli sani. A dabantuada cuo ba. Bi cuo mi diema yaaba kuli ti yonbidi, Ba leni yaaba n den tuodi ki sani Ki foagidi kuli.

⁴ Lani n teni ke n yedi: «Cedi mani nni suo. Cedi mani min mua boncianla. Yin da moa ke yi baa baagi nni Leni yaa yebiadima n ŋmaa n buolu yaaba,

⁵ Kelima laa daali tie jawaancianmoandi daali, Mi bodima leni li pabiidicianli daali.» Li Miali Diedo U Tienu, U Paaciamu Kuli Daano N cuani yaala li bonlekaala joaloangu nni, O Diedo, u dogu bilini ŋmadi ki baa, A bubula mo fii ki loli a juana po, Ki miadi mi todima ki tiegi li juali po.

⁶ Elami bali li luoli. Bi toatieba leni bi tanjagiba nagidi. Kiri diema yaaba ñani bi gbankoanditi bu toabu po.

⁷ Jerusalemi, a joaloanŋandi kuli gbie leni ti toateliti. Bi tanjagiba mo bogini ki se mi janjanma po A dogu buliñoana kani.

⁸ Juda naa go pia gaapo. Landaali yi pegidi yi nunjoma ki teli Li “Fuali Doangu” jatiadi po.

⁹ Yi nua mani ban padi padi Davidi dogu bilinu maama. Yi tieni ku buogu li juali tiipo ki siendi mi ñima.

¹⁰ Yi coadi Jerusalemi diedi, Yi pua ki mudi a diena ki baa pugini u bilinu paalu.

¹¹ Yi gbi ku buogu i bilini siiga, Ki baa yaa gaani ku ñinbuokpeligu ñima. Ama yi naa pegidi ki baa diidi Yua tiendi laa bonla. Yi naa nua yua n bogini la hali yogu.

¹² Li Miali Diedo U Tienu U Paaciamu Kuli Daano Yini yi dinla ke yin mua ki wolini, Ki kuo yi yula ki yie li paboanli tiadi.

¹³ Ama li pamankandikaali n ye. Bi kodi a yangbenga leni ti yanbidi, Ki ŋmani ti nandi ki ñu mi daama ki tua: «Tin je mani ki go ño kelima saala ti baa kpe.»

¹⁴ Li Miali Diedo U Paaciamu Kuli Daano Doagidi n po lani ki yedi: «Abada, yi kan baa, Yi kan baa laa tuonbiadi po sugili hali yi kuuma.» Li Miali Diedo U Tienu U Paaciamu Kuli Daano n yedi yeni.

Li koanbali Sebina tuonli baa biidi

¹⁵ Li Miali Diedo U Tienu U Paaciamu Kuli Daano yedi: «Gedi ki ban le li koanbali Sebina, Badidiegu yudaano ki yedi o:

¹⁶ A die be yo nekanba? A kpi leni ŋme yo nekanba Ki gbi a yuli po li takuli, Ki gbi li takuli li juali po, Ki lingi ku tangu nni ban baa piini a naani?

¹⁷ Diidi o Diedo baa cuo ŋa ki yoagi yoagi, Ki fuoni ki lu ŋa.

¹⁸ O baa teni ŋan baa ki bilini bilini Nani li tankudibili yeni, Yaa diema yaa fanma n yabi po. Fini yua n fiagi a canbaa diegu yeni, Lanpo yo ke a baa kpe, Lanpo yo ke a toateliŋandi mo baa yaa biidi.

¹⁹ N baa deli ki ñani a a tuonli nni. Mini o Diedo n baa dadi ki ñani a Ŋan ye yaa yema nni.

²⁰ Landaali n baa yini N naacemo Hilikiya bijua Eliakim.

²¹ N baa lani o a liadili, Ki ñagini o a gbanñagidigu. N baa taa a paalu ki teni o. O baa tua bibaa Jerusalemi leni Juda yaaba po.

²² N baa maani o boacabili po Davidi diegu sendabiga. O yaa luodi yaa yogunu oba kan luoni. O yaa ti luoni yaa yogunu mo, oba kan luodi.

²³ N baa kpaa o nani li kpakpaali yeni Naani n juagi, Yeni o baa tua o baadiegu kpiagidi.»

²⁴ Yaala n tie o baadiegu kpiagidi po kuli, li nikpela leni li bila, li paatieba leni li taliginba kuli, baa yaa tuugi leni wane.

²⁵ Landaali Li Miali Diedo U Paaciamu Kuli Daano baa yedi: «Ban kpaa yaa kpaali naani n juagi yeni, bi baa ŋabi li. Bi baa pua ki fobi li. Yaa tugikpiagili n bi maa li po mo baa bodi.» O Diedo n yedi yeni.