Esayi 21 - U TIENU MAAMA TILI 2013

Babilonni tingbali

¹ Yaa saawalo n ye yaaba n kaa Mi ñincianma fanpienma nni po. Nani ku tafaaciangu n fu maama Nuganu po yeni, Yibali ña ban jie yaa diema Yaa fanpienma po ki kpendi.

² N laa yaa bonlekaala n pia i jeje. I janbi daano janbidi, yua n bolindi mo bolindi. Elami yaaba, gedi mani ki baa ba. Medi yaaba, gaani ki cebini mani u dogu. U Tienu yedi: «N baa teni Babilonni Yaaba n wangi yi yaa fala kuli n baa u bianu.»

³ Lani n teni ke n ciaga ye leni mi koankoanma, Nani yaa funfunma n ye Yaa pua n baa maa po yeni. N jie ki luodi mo ki kan fidi ki le. Mi funfunma teni ke n kan fidi ki gbadi.

⁴ N yama yagi ke n jie ki luodi. Ti jawaanciandi cuo nni, N den tama ke ku yenjuagu Baa cuani mi kuugima, Ama li cuani n po yanbani bebe.

⁵ Bi sieni mi jiema, Yaaba n guu u dogu guu, Bi kaa ki di ki go ñu. O nilo kpaani ki yedi: «Bi toatieba yudanba, Taa mani yi jatiadi.»

⁶ O Diedo yedi nni: «Gedi ki ban sieni o doguudo Wan waani wan baa le yaala.

⁷ O yaa laa i taami ke bi dia toateligu, Li ŋungoli leni li yuoyuogoli, Wan diidi ki faami hali bonŋanla.»

⁸ Lanwani, yua n den guu den kuudi Nani o yangbanlo yeni ki yedi: «N Diedo, n guu u yensiinu leni ku ñiagu kuli, Kaa ŋmiagi n kaanu ba waamu.

⁹ Diidi yaala n kpendi na. O joa n jagi toateligu ke taamilie dia ku. O den maadi ki yedi: ‹U baa! Babilonni dogu baa! U buli nannana kuli baa tiipo ki mudi.› »

¹⁰ Ŋain n niba ban pua yaaba Nani i di n jalu nni yeni, Min gbadi Li Miali Diedo U Paaciamu Kuli Daano Isidayeli Tienu kani yaala, n waani yi lane.

Ku ñiagu taa ki dagini le yo?

¹¹ Yaa saawalo n ye Duma diema po. Bi sedi hali Seyiiri ki kpaani: «O guudo, ku ñiagu taa ki dagini le yo? O guudo, ku ñiagu taa ki dagini le yo?»

¹² O guudo guani ki yedi: «Ku tiŋaagu kpendi, Ku ñiagu moko kpendi. Yi yaa bua ki buali, Yin cedi mani guantoama.»

Yaaba n ñani Dedani leni Kedari ki tiini

¹³ Yaa saawalo n ye Arabi diema po. Yi baa duani ku ñiagu Arabi fuali nni, Yinba yaaba n ñani Dedani leni yi yangola.

¹⁴ Gedini mani mi ñima U ñuñuunu n kubi yaaba yaa po. Tema diema yaaba, Baa mani mi jiema ki tuogi yaaba n tiini,

¹⁵ Kelima bi tiini mu jugisiemu, Yaa jugisiemu n ki ye tuagu nni, Yaa dabana n kpali kani. Bi tiini kelima bu toabu n bia maama po yo.

¹⁶ O Diedo yedi nni: «Ne leni binli kap, Kedari kpiagidi kuli baa bodi.

¹⁷ Li baa sieni Kedari Dabantuadimoana siiga, niba waamu bebe.» O Diedo Isidayeli Tienu n yedi yeni.