Esayi 20 - U TIENU MAAMA TILI 2013

Esayi goadi benbili leni taapiena

¹ Asiiri bado Saligona den soani bi guudikaaba yudaano, ke o cua ki baa Asidodi dogu, yuu n ye Filisiti diema nni, ki den paadi u.

² Lanyogunu yo ke o Diedo den maadi leni Esayi Amotisi bijua, ki yedi o: «Gbindi ki ñani a ciaga nni ti paboantiadi, ki pidi ŋan pili yaa cacaadi.» O den tieni yeni ki cuoni kaa la puu, kaa pili puu kuli mo.

³ O Diedo den yedi: «Nani n naacemo Esayi n cuoni maama binataa kaa la puu yeni, kaa go pili puu yeni, laa bonla baa tua mi maalima leni sinankeene bonla Ejipiti leni Etiopi po.

⁴ Yeni Asiiri bado baa gedini Ejipiti kpaada leni ban cuo yaaba Etiopi diema nni ti yonbidi, li nipanba leni li jakpela ke baa yie puu, kaa pili puu kuli mo. Laa bonla baa yaa tie fe Ejipiti po.

⁵ Bi baa yaa ye leni ti jawaanciandi leni i fe, kelima Etiopi yua n den tie bi suginma, ke Ejipiti yua mo tie ban jigini yaala.

⁶ Yaaba n kaa li naa boanjaali kani baa yedi landaali: ‹Diidi mani yaala n tieni tin den dugi yaaba yaa po, ke bi baa faabi ti leni Asiiri bado! Timo baa tieni lede ki baa mi faabima?› »