Esayi 19 - U TIENU MAAMA TILI 2013

Ejipiti yaaba jigi cie

¹ Yaa saawalo n ye Ejipiti yaaba po. Li Miali Diedo jagi yaa tawaligu n jaligi po. O kpendi Ejipiti nni. Ejipiti yaaba buli digibi o nintuali, Ejipiti yaaba jigi kuli cie.

² O Diedo yedi: «N baa teni Ejipiti yaaba n koani bi ŋmiali nni, Yuakuli n koani leni o kpiilo, Yuakuli leni o danli, Dogu leni uyuu, Diema mo leni miyama.

³ Ejipiti yaaba jama kuli baa gbeni. N baa biani bi jaga fanma. Bi baa bu i buli leni a baayuadiida, Ki bu yaaba n maadi leni bi tinkpiba leni a lingida.

⁴ N baa teni yaa canbaanba n bia n diedi Ejipiti, Yaa bado n bia boncianla baa diedi ba.» Li Miali Diedo U Tienu U Paaciamu Kuli Daano n yedi yeni.

⁵ Mi ñincianma baa ñuudi. U kpenciamu baa ñuudi ki kuodi.

⁶ I kpeni ñima baa nuugi. Nili kpentaana baa wadi ki kuodi. Ku sabigu leni i kpenkagi baa kuodi.

⁷ Puu kuli kan yaa ye Nili balinma Hali u juodima mi ñincianma kani. Yaala n buli Nili kani kuli baa kuodi, Li baa yadi ki bodi cain.

⁸ Bi jankpaanba baa yaa mua ki figindi, Yaaba n dia leni mu jandiamu Nili kpenciamu kuli nni, Baa yaa ye leni li paboanli. Yaaba n lu i taali mi ñima nni kuli Pala baa biidi.

⁹ Yaaba n tuuni leni len gaali Gbani baa wudi, Ki taani leni yaaba n lu a cabipiena kuli, I fe baa cuo ba.

¹⁰ Yaaba n todi mi diema kuli baa Yaa ye leni li coagili. Yaaba n tuuni ki gaani i ŋmapani kuli Pala baa biidi.

¹¹ Tisoani dogu badijaba kuli tie yanluodanba. Faraon cancantieba Kuli tie yanpiidanba. Yi baa gaa lede yuakuli n cua ki yedi Faraon: «N tie yanfuodaano bijua yo, U yogu nni badiba bijua?»

¹² Faraon, a yanfuodanba yeni nan ye le? Ban nan teni ŋan bandi Li Miali Diedo U Paaciamu Kuli Daano n bili Ke o baa soani Ejipiti yaaba yaa tuonli.

¹³ Tisoani badijaba gaadi. Nofa badijaba mo ye mi boanma nni, Laa nibuoli yudanba n biandi Ejipiti fanma.

¹⁴ O Diedo teni ke Ejipiti yaaba jigi cie. O teni ke baa go bani kuli ban tiendi yaala, Nani o dañogaado n yen jadibi Ki ŋmaadi o siindi maama yeni.

¹⁵ Ejipiti diema nni, taliga leni bi bulicinba siiga, A piada leni a luoda, Oba kuli kan fidi ki midi yanbu.

Yaa yema n faadi ki ye Ejipiti po

¹⁶ Lanyogunu Ejipiti diema baa yaa tie nani bi puoba yeni. Mi baa yaa digibi ke ti jawaandi pia ma, mi yaa laa ke Li Miali Diedo U Paaciamu Kuli Daano fii ki se mipo.

¹⁷ Juda tinga baa tua Ejipiti diema po i jeje bonla. Yua n taa mi yeli ti jawaandi baa cuo o, kelima Li Miali Diedo U Paaciamu Kuli Daano n taa yaa jagili, ki baa koani leni ma yeni po.

¹⁸ Lanyogunu Ejipiti diema baa yaa pia dogimuu, yii n baa yaa maadi Kanana yaaba maama, ki polini Li Miali Diedo U Paaciamu Kuli Daano yeli nni. Bi baa yini doyendu U Yienu Dogu.

¹⁹ Lanyogunu li padibinbinli baa yaa ye o Diedo po Ejipiti diema siiga. Li bunbunli baa yaa ye o Diedo po u tinbianu kani.

²⁰ Li baa yaa tie maalima bonla, ke Li Miali Diedo ye Ejipiti diema nni. Ejipiti yaaba yaa kuudi ki yini Li Miali Diedo, kelima yaaba n mabini ba po, o baa soani bi po o candaano yua n baa koani ki gaa ba.

²¹ Li Miali Diedo baa yaa tie Ejipiti n bani yua. Ejipiti yaaba baa bandi Li Miali Diedo, lanyogunu bi baa kpiagi o, ki padi o po a pada, ki go pa o bu paabu. Bi baa niani Li Miali Diedo i ñoaniani, ki go kuani ban niani yaa ñoaniani.

²² Li Miali Diedo yaa pua Ejipiti yaaba, o go baa paagi ba moko. Bi baa lebidi ki guani o kani. O baa cengi bi maama ki paagi ba.

²³ Lanyogunu u sanu baa yaa ye, yuu n ñani Ejipiti ki caa Asiiri. Asiiri yaaba baa yaa caa Ejipiti. Ejipiti yaaba mo baa yaa caa Asiiri. Ejipiti yaaba leni Asiiri yaaba baa taani ki yaa pugi o Diedo.

²⁴ Lanyogunu Isidayeli diema n baa taani leni Ejipiti leni Asiiri diema man tua diemitaa, yaama n baa yaa tie li seli bonla ki tinga kuli po.

²⁵ Li Miali Diedo U Paaciamu Kuli Daano n baa seligi ma, ki yedi: «Li seli n yaa ye leni n niba Ejipiti yaaba, Asiiri yaaba, yaaba n tie n tagima leni Isidayeli yaaba, min die yaaba.»