Esayi 18 - U TIENU MAAMA TILI 2013

Etiopi diema tonda, faami mani!

¹ Fini yaa tinga yaa ñinbiadi n pia cabalie lie, Ki ye Etiopi kpenciami niinni.

² Fini yua n tuuni a tonda mi ñincianma po, Ke bi caa leni ti ñinbiadi. Yinba yaa tonda n jaligi boncianla yeni, Guani mani yi diema po, Yinba yaa niba n kpedi ke yi gbani ñuliti yeni. Ban jie yinba yaaba li ŋandunli nni, Yi pia u paalu ki paani yi yibalinba. Guani mani yi diema nni, I kpenciami n gbie yaama yaa niinni yeni.

³ Yinba yaaba n ye ŋanduna nni kuli, Yinba yaaba n ye ki tinga nni, Diidi mani yaa jakoandicabili N se a juana po. Cengi mani ban piebi Li naatuntunli yaa yogunu,

⁴ Kelima o Diedo yedi nni: «N ye n yekaanu tanpoli po, Ki diidi yaala n tiendi ki tinga nni. Nani ku yenwuligu n ñuliti Mi yenma nni maama, Bi nani mi manma tawaligu U jetaagu wulugu nni yeni.»

⁵ Duven tiidi yaa puudi ki gbeni, Mi puuma mo yaa tua bonluonkaala, Ke li bonluonkaala yeni mo beni, O baa coandi ki ñani yaa beni n ki pia fuoma.

⁶ Bi baa ŋaa laa niba kuli a juana kaabi po Leni li fuali nni yandi po. I kaabi baa yaa jagi bi tinkpila po ku siagu, Li fuali nni mo yaa yandi kuli n Yaa jagi bi po ku fawaagu.

⁷ Lanyogunu yaa nibuolu yaa niba n kpedi, ke bi gbani ñuliti, hali yogu ban jie yaa nibuolu li ŋandunli nni yeni, baa cuani bu paabu Li Miali Diedo U Paaciamu Kuli Daano kani. Laa nibuolu pia u paalu ki paani bi yibalinba, ke i kpenciami mo gbie bi diema nni. Bi baa cuani laa padili Li Miali Diedo yeli n ye naankani, Siyon juali po.