Esayi 17 - U TIENU MAAMA TILI 2013

Damasi leni Isidayeli diema juodima

¹ Yaa saawalo n ye Damasi yaaba po. Diidi Damasi kan go yaa tie ba dogu moko. Li baa tua diegbengu.

² Siiri diema dogi kan go yaa pia niba, I yankuli n baa yaa die u kaanu, Ke oba ki pangi ba mo.

³ Efrayimi paalu baa gbeni, Li bali mo baa gbeni Damasi, Yaala n sieni Siiri diema mo Yaa fuoma kan cie Isidayeli yaaba. Li Miali Diedo U Paaciamu Kuli Daano n yedi yeni.

⁴ Landaali Jakob kpiagidi baa wadi, O gbengu mo baa kpandi ki tua dondongu.

⁵ Li baa tua nani ban pe yaa yogunu ti kpaandi, Ke o kpakpaalo nuu taagi ŋalikama siandi, Nani ban liegi u jetaagu Refayimi joaloangu nni maama yeni.

⁶ Yaala n ji baa sieni Isidayeli nni, Baa yaa tie boncabi bebe yo, Nani ban baa pua ki cie Leni u gbiamu olivie tiidi Bonluonkaala maama yeni, Ke bonyenga yenga sieni i beni nni Leni a tibada nni. O Diedo Isidayeli Tienu n yedi yeni.

⁷ Landaali o nilo baa pegidi ki noanli o tagido. O baa yaadi ki noanli Isidayeli Tienu yua n Gagidi ki ŋani.

⁸ O kan go yaadi ki noanli wan maa yaa padibinbina po. O kan go yaa diidi wan n tagi yaala. Lani n tie: Akera budaadi leni u yienu nannana.

⁹ Landaali bi baa sani ki ŋaa Efrayimi dopaali, nani Hiviti leni Amori yaaba n den sani, ki ŋaa bi dogi maama Isidayeli yaaba nintuali. Li baa tua paboanli bonla,

¹⁰ Kelima yi sundi yi faabima Tienu, Ki naa tiadi yi Tangu yaagu n tie yi wuonkaanu po, Lani n teni ke yi ŋuu yi yanluaditiidi i buli po. Yi ŋuu ki tinga nni i tilandi.

¹¹ Yin den ŋuu i yaa daali, I den li bundi landaali. Laa tiŋaagu lige, Ke yi bonbulikaala den puudi. Yin baa je li ñuadi yaa yogunu, Yi kpaandi sani ki bodi, Laa yianu mo ki pia ñoagu.

I nibuoli fuugu

¹² Yaa dunli n tie ne tie yaa nibuoli N ki pia coali yaa dunle. Bi dune nani mi ñincianma yeni. I nilanbuoli dunli dune nani a ñingola N yen duni maama yeni.

¹³ I nilanbuoli duni nani a ñingogbenga N duni maama yeni. O Diedo fu leni i nilanbuoli ke i sani ki foagidi Nani ku faagu n piebi ki lendi Yaa muadi a juana yuli po, Bi nani u tafaalu n fiini yaa tangungu yeni.

¹⁴ Ku juagu yaa baa, i jeje mo cua. Hali ke li daa faa baa go ye! Lani n tie yaala n baa tieni yaaba N biidi ti po ki go kpabidi ti.