Esayi 16 - U TIENU MAAMA TILI 2013

Moabi mia Jerusalemi mi todima

¹ Soani mani mi diema daano po a pebila, Ki ña Sela ki tagini mi fanpienma po, Ki pundi hali Siyon bisalo juali kani.

² Moabi puoba se Arinoni kpenu kane, Nani ban deli yaa nuanga yeni, Bi nani ban pua ki fidi yaa noantediga Ke mu nuanmu puagi yeni.

³ Moabi puoba tua Jerusalemi yaaba: «Pa ti mani i tundi, baa mani ti po jagili, Nani ku ñiagu yeni, Wuoni yaaba n sani ki cua a kani Nani ku sabigu yeni,

⁴ Jerusalemi yaaba, cedi ti niba yaaba n sani, Da daadi yaaba n cua ki wuoni a kani, Ki cedi yaaba n cua ki wuoni yi kani n yaa ye. Ku tugumoangu yaa gbeni yaa yogunu, Ke ki mabinga mo baa u bianu yaa yogunu, Tua mani bi po wuonkaanu yua bolindi kani, Yua n mabindi yaa ñani mi diema nni yaa yogunu.

⁵ Mi ŋanma n baa pugini mi piama paalu. Yaa bujialo n lingi mi teginma baa kali ti gbandi po, Davidi gbandieli nni.»

Jerusalemi kan fidi ki tieni puu kuli Moabi po

⁶ Juda yaaba yedi: «Ti gbadi Moabi japaadi maama, Yaa japaadi n ki pia bianu, O jigidi leni o japaadi, O kafaama leni o yantiafana maama.

⁷ Lani n teni ke Moabi mua bi yula po. Yuakuli wolini. Yi yenbidi Kiri-Hareseti dogu po, Li coagi yi boncianla.

⁸ Hesibon tikuani kuodi, Ki taani leni i nibuoli yudanba N den ñu Sibima duven tiidi yii Yaa daama ki gaadi yeni. Yii den taa Yaeseli ki ban caa mi fanpienma po, Ke i beni den ban yiini mi ñincianma po.

⁹ Lani n teni ke n baa mua Sibima duven tiidi po, Nani Yaeseli n mua maama yeni. N baa mua yinba Hesibon leni Eleale yaaba po, Kelima yi jetaagu yogunu yo, Ke bu toabu cua ki baa yi.

¹⁰ Li pamanli leni i yigimi gbeni yi tikuani nni. I duventiidi kuani nni yani ki go yiini, Pamanli mo ki go ye. Yua n ŋanbidi a duventiidi daama Kan go tuodi duven daama ti datiadi nni. N teni ke i yigimi cuo ki sedi.

¹¹ Lani n teni ke n yiini bu yanbu Leni n pali kuli Moabi po, Nani u gogidimuanu yeni. N ye leni li pabiidili Kiri-Heresi po.

¹² Moabi cua yaa padibinbinli N ye a juana po ki coagi. O cua wan gagidi yaa kaanu kani Ki baa jaandi, Ama o kan ŋmani yanbu.

¹³ Lani n tie hali yogu o Diedo n den maadi Moabi po yaa maama.»

¹⁴ Moala o Diedo yedi yaa maama n tie ne: «Ne leni binataa nani yua gaani i ŋmaligi yaa bina yeni, Moabi kpiagidi baa tua faliga bonla. Ba ke ku niligu yabi boncianla, yaala n sieni kan go yaa moani, li kan go yaa pia fuoma.»