Esayi 15 - U TIENU MAAMA TILI 2013

I wanli Moabi diema po

¹ Yaa saawalo n ye Moabi diema po. Moabi diema baa bodi, Kelima ñiayengu lige, Ke mi diema kuli baa kua li paboanli nni. Moabi dogi Adi leni Kili bodi.

² Bi gedi Divon li padili kaanu ki mua, Bi mua Nebo leni Medeba po. Bi kuo bi yudi kuli, Ti langbiadi kuli mo jia ki wadi.

³ Bi sani nni, bi la ti paboantiadi, A diena yula po, mu daamu kuli nni Bi niba wolini ki mua.

⁴ Hesibon niba leni Eleale niba mua Hali Yahatisi, bi gba bi niali. Lani n teni ke Moabi toatieba kuudi boncianla, Kelima bi jie ki luodi.

⁵ N mua leni n pali kuli Moabi po, Yua yaa kpaada n tiini ki caa Tisoari po, Hali Egilati Selisiya, Kelima bi tiini ki go buudi ki do Luhiti, Bi mua i paboandanmoe hali Holonayim sanu nni.

⁶ Nimirimi ñima ñuudi, Ti muadi kuodi, Li muabunli bodi cain. Bonsoangila mo naa go ye.

⁷ Lani n teni ke bi duo ban sieni yaala kuli, Ki taa ban bili yaala kuli Ki baa duodi i kpentiidi kani.

⁸ A bubula fii ki loli Moabi tinbiani kuli nni. O bubula pundi hali Efrayimi leni Beli-Elim dogi.

⁹ Dimoni ñima kuli gbie leni soama, N go baa soani Dimoni po yebiadipanma. N baa teni o yangbanlo n cua ki baa Moabi niba yaaba n sani ki cia, Ki taani leni yaaba n sieni likani kuli.