Esayi 14 - U TIENU MAAMA TILI 2013

O Diedo baa gbadi mi ninñima

¹ O Diedo baa gbadi mi ninñima Jakob puoliŋuani po. O go baa guani ki gandi Isidayeli yaaba. O baa guani ki kaani ba bi tinga nni. Bi canba baa sani ki taani leni ba, Bikuli n taani ki tua yenma leni Jakob buolu.

² I nibuoli baa taa ba ki gobidi Ki gedini ba bi diema nni. Isidayeli buolu baa gaa ba Nani li faali yeni o Diedo tinga nni, Ban tua nani a jatuada leni a puotuada yeni. Bi baa cuo ti yonbidi yaaba n den kubi ba ti yonbidi, Ki diedi yaaba n den mabindi ba.

Babilonni bado juodima

³ O Diedo yaa puni a yaa daali mi fuodima, A coagingu leni a fala puoli po Leni ŋan den laa yaa fala ti yonbidi nni,

⁴ Ŋan yiini Babilonni bado po Yaa yanbu n tie ne: «Bee! Mabinga daano ki go ye? Bee! Ku tugumoangu gbeni?

⁵ O Diedo mudi bi nibiadiba gbadundula, Ki pua ki kua bi paatieba gbiami.

⁶ Yaaba n den pua i nibuoli bi pabienli nni yogunu kuli, Ki den diedi i nibuoli bi pabienli nni leni u paalu, Bi ji ŋua ki deli ba ke bi kan baa ki fuo mo.

⁷ Mi diema kuli ye leni mi yanduanma leni laafia. Bi yiini i pamandanyani.

⁸ Sipre tiidi leni Liban sediri tiidi yeni Kuli pala mangi yaala n tieni yaa po, Ki tua: ‹Hali ŋan ŋmadi ki baa, Dakpaagilo ki go kpendi ki pe ti.›

⁹ Ki tinga nni, bi tinkpiba diema pua yaayaa, Hali ban gbadi ke fini O tugumoandaano kpendi bi kani. Bi tinkpiba yaaba n den tie Ki tinga yudancianba kuli fundi. Ki tinga badiba kuli fii bi gbandi po,

¹⁰ Bikuli maadi leni a ki tua: ‹Amoko n ji kaa, kaa go pia paalu nani tinba yeni? Tikuli kpandi ki tua yenma n yeni!

¹¹ Bi pieni ki luni a kpiagidi Bi tinkpiba diema nni Leni u gogidimuanu. A duanu n ti bili mi bedima nni, Ke a sidibila mo tie a kpalipinkaabu.

¹² Li gaa lede ke a ñani tanpoli ki baa, Fini ku tiŋaagu ŋmabicoancoanli. Bi pua ki luni a tiipo, Fini yua n den paani i nibuoli.› »

¹³ A den tua a pali nni: «N baa do tanpoli. N baa bili n bali kalikaanu U Tienu ŋmabila yula po. N baa do ki kali i buli Kadikaanu juali po hali nujienu po.

¹⁴ N baa do ti tawadi tanpolijoma. Mini leni Tanpoli Badiciamo N baa yaa tie yenma.»

¹⁵ Ama bi pieni ki luni a bi tinkpiba diema nni, Hali ku buoñuangu tugu nni.

¹⁶ Yaaba n nua kuli diidi a cem Ki buali bi yula: «Naani o naa joa n den li teni Ke ki tinga digibi? Naani wani n go digini Mi diema boncianla yeni?

¹⁷ Wani n den li yen teni li ŋandunli N kpandi fanpienma, Ki den pua i dogi nufanu, Ki den kubi a kpaada kaa ŋaani ba yeni.»

¹⁸ I nilanbuoli badiba kuli dua Leni bi kpiagidi yuakuli o takuli nni.

¹⁹ Ama bi luni fini wani, Ki foagidi a leni a takuli, Nani yaa biga n kpe o naa tugu nni yeni, Nani ban kpaani yaaba leni ki jugisiega, Ki pieni ki luni ba ku buogu tana po, Nani ban ŋmaa yaa tinkpilo yeni.

²⁰ Ama a kan taani leni ba li takuli nni, Kelima a bolini a diema, ki kpa a niba, Bi kan go taa bi nibiadiba buolu yeli abada.

²¹ Bogini mani ki kpa a bonjala, Kelima bi baanba tagili po, Ban da ti fii ki diedi ki tinga, Ki gbieni li ŋandunli leni mi biadima.

²² N baa fii bi po, mini Li Miali Diedo U Paaciamu Kuli Daano n yedi yeni. N baa bolini Babilonni yeli Leni yaala n sieni likani kuli. N baa bolini Babilonni puoliŋuani Yaaba n sieni kuli.

²³ N baa teni likani n tua baagu, A guda kaanu. N baa pidi o leni mi bolinma ŋaanu. Li Miali Diedo U Paaciamu Kuli Daano n yedi yeni.

Ki mabinga buoli kuli baa gbeni

²⁴ Li Miali Diedo U Paaciamu Kuli Daano poli ki yedi: «Li baa tua nani min li jagi maama yene. Min bili yaala lani n baa tieni.

²⁵ N baa pua ki mudi Asiiri yua Gbanmanu n diema nni. N baa ŋmaa o n juana nni. N baa faabi n niba o nuu nni. O tugili baa maadi bi boacaba po.»

²⁶ O Diedo n taa yaa yanjagili Ki tinga kuli po n yeni, O mua i nibuoli po mi jama.

²⁷ Li Miali Diedo U Paaciamu Kuli Daano N jagi yaala n yeni. Ŋme n baa teni ke li kan tieni? O tandi o nuu. Ŋme n baa fidi ki poali u?

Filisiti yaaba, fangi mani yi yula

²⁸ Li naa ñoamabonli ñani o bado Akasi n guani yaa binli.

²⁹ Ŋan da mangi a pali fini Filisiti diema, Kelima yaa gbiamu n den pua ŋa kua po. O wa yaa kpe, li waalabili baa ña o niinni, Li waalabili yeni baa maa yaa bonfuodibiado n yugi.

³⁰ Lani, taliginba baa baa u kpaakaanu, A luoda mo n baa mi yanduanma. Ama mi koma baa kpa yinba Filisiti yaaba puoliŋuani, Yaala n baa sieni yi kani mo baa kpe.

³¹ Yinba i dopaali, Wanli mani ki kuudi! Filisiti diema yaaba kuli gbani tadigi, Kelima u nufanu ñani nujienu po. Yibali toagoli nni, ba niyendo ki yaadi.

³² Bi baa guani Filisiti diema yaaba tonda be yo? Ban guani line: O Diedo wani o ba n maa Siyon dogu o niba siiga. Taliginba mo baa u wuonkaanmoanu lankane.