Esayi 13 - U TIENU MAAMA TILI 2013

Babilonni juodima

¹ Amotisi bijua Esayi n baa yaa maama o Diedo kani, ke li tie Babilonni po.

² O Diedo yedi: «Sieni mi maalima bonla, Yaa juali n pidi milimili po. Kpaani ki waani ba, Yugidi mani yi nii ki waani ba, Ban tagini ki kua bi bulicinba buliñoana kani.

³ N teni n ñoamabonbilikaana Yaaba n gagidi bi yula n po, N yini n jakoanda moko, Ki baa doagidi n pabienli Leni yaaba yaa pala n mani ki koani ki paadi po.

⁴ Ku niligu fuugu ye li juali yuli po Nani yaa niba n yabi yeni. Diema boncianla yaa nibuoli n taani Ki pia laa fuugu. Li Miali Diedo U Paaciamu Kuli Daano cua Ki baa le o toatieba n taani Ki da maama bu toabu po.

⁵ Bi ñani yaa diema n foagi, Ki ye hali ki tinga bianu po. O Diedo leni o pabienli tuonsoantiadi Duoli mi diema kuli.

⁶ Mua mani ki figindi Kelima o Diedo daali nagini. Lidaali kpendi nani o bolinka yeni. Li ñani mi bolinma daano kane.

⁷ Lani n teni ke i nii kuli tadigi, Ke bi jaba kuli mo ki go pia papaali.

⁸ Ti jawaanciandi cuo ba hali boncianla. Bi ye leni fala ke bi tugidi nni koani, Ke bi poali ki buandi nani yaa pua N bua ki maa yeni. Bi diidi biyaba leni ti jawaandi, Bi nunmu kuli moandi nani U mu yeni.

⁹ Diidi o Diedo daali n kpendi yeni. Landaali bia, pabienli daali, Pabienkandikaali daale yaali n baa Cuani li paboanli ki tinga nni, Ki go bolini ti tuonbiadi danba mo.

¹⁰ Tanpoli ŋmabila Leni ŋmasoali kuli yenma kan go yendi. U yienu baa biigi wun li pudi yaa yogunu yo. O Ŋmaalo mo yaa yenma kan go yendi.

¹¹ N baa waani li ŋandunli fala Kelima li biadima po. Bi nibiadiba mo, kelima bi tagili po. N baa teni bi yusiedanba japaadi n gbeni, Bi tugumoandanba mo Yaa kafaama n baa u bianu.

¹² N baa teni bi niba lema n moandi Ki cie Ofiri wula lema.»

¹³ Lani yaa po, n baa yoagi ti tawadi, Ki teni ki tinga tanpuuli n digibi, Kelima Li Miali Diedo U Paaciamu Kuli Daano Pabienli n baa tieni lani kuli, O pali yaa beni yaa daali.

¹⁴ Lanwani, nani ban deli yaa ñoago, Nani yaa yandi n ki pia yua n baa taani ba, Yuakuli baa pegidi ki noanli o buolu po, Yuakuli baa sani ki guani o diema nni.

¹⁵ Bi yaa nandi yaaba kuli, Bi baa muu ki kpa ba. Bi yaa cuo yaaba kuli, Bi baa kpa ba leni mu jugisiemu.

¹⁶ Bi baa taa bi canpanda ki lu tiipo ke bi nua. Bi baa kua ki fagi bi diema nni piama kuli, Ki go ñii bi puoba mo.

¹⁷ Diidi mani n fiini Medi yaaba pala bi po, Yaaba yaa baga n ki ye leni wula, Ki buali ŋanjilifa.

¹⁸ Bi dabana baa muu ki kpa bi jawaaba. Bi kan gbadi ninñima a canpanda po. Bi kan gbadi ninñima a bonjala po.

¹⁹ Babilonni, mi diema kuli badifogiliga, Bani Kalide yaaba jilima, Baa guani ki tua nani Sodomi leni Gomori, U Tienu n den waani yaaba fala yeni.

²⁰ Babilonni kan guani ki baa niba abada, Nifiima n tuu nifiima, laa diema Kan go gbie leni niba. Goagoadoba kuli kan sieni o gbandieli likani, Yankpaaba moko kan sedi likani leni bi yankuli.

²¹ Mi fanpienma nni yandi n baa yaa gbie likani. A juuna n baa gbie ti diedi nni, Ti tataadi n baa yendi u kaanu, A ŋuabuana mo n yaa yugi ki ciini likani.

²² I naamuuni n baa mua bi diedi nni, I tanboe mo n yaa ye bi dieŋama nni. U yogunu bua ki pundi, A dana mo kan suagi liiga.