Esayi 12 - U TIENU MAAMA TILI 2013

Ti pagidi U Tienu o faabika po

¹ Landaali a baa yedi: «N pagi a yeli fini o Diedo, Kelima a pali den beni n po, Ama a pali kuugi ke a baagi nni.

² N faabima Tienu, N baa dugi a po, n kaa jie, Kelima Li Miali Diedo n tie n fidu leni n yanbu. Wani n tua n faabima.»

³ Yi baa yaa kabidi mi ñima leni Li pamanli mi faabima ñinbuna kani.

⁴ Landaali yi baa yedi: «Pagi mani o Diedo, mia mani o todima. Teni mani bi niba n bandi O bancianma i nibuoli siiga, Kpaani mani ki waani bi niba O yeli n yabi maama.

⁵ Yiini mani o Diedo kpiagidi, Kelima o tieni yaa bonla n ŋani Ki pia mi ñuadima. Teni mani ki tinga n bandi laa bonla kuli.»

⁶ Kpaani ki doagidi a pamanli, Fini yua n ye Siyon nni, Kelima Isidayeli Tienu wani Yua n Gagidi ki ŋani yeni yabi boncianla. O ye o niba siiga mo.