Esayi 11 - U TIENU MAAMA TILI 2013

Davidi puoliŋuanu

¹ Li benkpeli baa pudi Isayi ñiali kani. Li baa pudi o jiini nni.

² O Diedo Fuoma baa yaa ye o po. Mi yama leni mi yanfuoma Fuoma baa yaa ye o po, I tundi leni mi jama Fuoma baa yaa ye o po, Mi bandima leni o Diedo fangili Fuoma baa yaa ye o po.

³ O baa gbie leni o Diedo fangili. O kan jia ti buudi leni o nunnualima bebe po, Bi leni o tuba gbadima bebe po ka.

⁴ Ama o baa jia ti buudi taliginba po Leni mi teginma. O baa yaa tiegi mi diema luoda po. O baa pua ki tinga leni o maama Nani li yaa bi tie gbiamu yeni, Ki piebi o nibiado mo wan kpe.

⁵ Mi teginma n baa tua o gbanñagidigu, Ku yantugupiengu mo n tua o cañagidu.

⁶ O fuasangbanlo leni ki pebiga Baa taani ki yaa ye. Ki gbiiga leni ki ŋuabiga N baa yaa taa ki dua. Ki naabiga, ki yangbanbiga leni Ban wubi yaa yandi baa yaa taa ki ye, Bonjabiga n baa yaa kpaa ba.

⁷ O nua leni ursi baa yaa taa yankpaakaanu, Bi bila n baa yaa taa duanu. O yangbanlo baa ŋmani ti muadi Nani o nua yeni.

⁸ Ki canpandiga baa yaa jeli Leni o duduuno o duanu nni, Ki bonwaaga mo n tuuni li waalabili falu nni.

⁹ Biadima leni bolinmiba kan tieni O Diedo joagagidiŋanli po, Kelima mi diema nni, Yuakuli baa bandi o Diedo Nani mi ñincianma n gbie Leni mi ñima maama yeni.

¹⁰ Landaali Isayi benkpeli baa fii Ki sedi nani mi maalima yeni i nibuoli po. I nibuoli baa lingi wan ye naankani, U Tienu kpiagidi mo baa yaa dua likani.

Yaaba n den sani ki puodi dietoama guakpenma

¹¹ Landaali o Diedo baa guani Ki tandi o nuu Ki daa ki faabi o niba Yaaba n sieni ki ye Asiiri, Ejipiti, Patilosi leni Etiopi diema nni, Elami, Sineari, Hamati leni Mi ñincianma kpendega nni.

¹² O baa sieni mi maalima i nilanbuoli po. O baa taani Isidayeli yaaba, Yaaba n ye ti yonbidi kuli, Ki gobidi ki kpeninni Juda yaaba Ban den yadi yadi yaaba Ki tinga ñoakunnaadi nni.

¹³ Efrayimi nunponli baa gbeni Juda po, Juda yibalinba mo n bodi. Juda mo kan go yaa nani Efrayimi.

¹⁴ Bi baa taani ki baa Filisiti yaaba nintuali po, Ki taani ki fagi puoli yaaba. Edomi leni Moabi yaaba baa le fala bi nuu nni. Bi baa diedi Anmoni yaaba.

¹⁵ O Diedo baa teni Ejipiti yaaba Ñincianma ñinbaadu n kuodi. O baa yugidi o nuu u kpenciamu Efrati po ki piebi leni u paalu, Ki boagidi u kpentaanalele, Ki teni bi niba n yaa cuoni lienni leni bi cacaadi.

¹⁶ Li sanjali baa tieni n niba yaaba N sieni Asiiri po, Nani lan den tua Isidayeli yaaba po maama, Ban ñani Ejipiti diema nni yaa daali.