Esayi 10 - U TIENU MAAMA TILI 2013

Yaaba n biendi o Diedo pali

¹ Fala baa baa yaaba n biliti Yaa bali maama n gundi, Ki dangi yaa ñoamabonbilikaana n ki tiegi.

² Bi deli ki foagidi a luoda ti buudi kaanu, Ki muni bi ninñinniba i moamoani, Ki tieni a kpepuona ban bua yaala, Ki kpabidi a kpienbila mo.

³ Yi baa tieni lede fala daali Leni yaa yebiadima n ye foagima Ki kpendi yeni po? Yi baa sani ki gedi ŋme yaa po yo, Ki baa mi todima? Yi baa ŋaa yi piama le yo?

⁴ Yaala n sieni bebe n tie yin godi Ki buani a kpaada siiga, Ki go ŋmadi ki baa ki kpe Ban kpaani yaaba siiga. Ba leni lani kuli o Diedo pali daa kuugi bi po, O nuu mo baa ki tiani ki baa waani ba fala.

Asiiri yaaba tieni ki duodi

⁵ O Diedo yedi: «Fala n baa Asiiri yaaba, yaaba n tie N pabienli gbadunduli! Yaa gbiamu n ye bi nuu nni yeni Doagidi n pabienli.

⁶ N soani ba, ban fii ki sedi yaa diema Yaa niba n ki ŋua Tienu po, Ki go fii ki sedi yaaba n biendi n pali yeni po. Bi baa fagi ba ki baa li baali, Ki ŋmaa ba bonŋanla nani U sanu nni moamoadi yeni.

⁷ Ama baa jagi yeni ka. Bi pala nni baa bili yeni ka. Bani wani n bua yaala bebe n tie ban paadi, Ki bolini mi diema buoli boncianla,

⁸ Kelima bi tua: ‹Naani ti toatieba yudanba ki pundi badiba?

⁹ Naani yaala n tieni Kalino Ka go tieni Karikemisi? Bi yaala n tieni Hamati yeni Ka go tieni Alipadi? Yaala n tieni Samari Ka go tieni Damasi?

¹⁰ N faligi yaa diema yaa buli coali n yabi Ki cie Jerusalemi leni Samari kuli.

¹¹ Min tieni yaala Samari leni o buli, Naani n kan tieni la Jerusalemi leni o buli nannana?› »

¹² O Diedo yaa soani o tuonli Yaa yogunu ki gbeni, Siyon juali po leni Jerusalemi nni, N baa pa Asiiri bado o japaadi panpaani Leni o kafaanunnualima panpaani,

¹³ Kelima o tua: «N nuu yaa paalu n teni Ke n tieni min soani yaala kuli, N yanfuoma n teni ke n tieni lani kuli, Kelima n yama fo. N ŋmiagi i nibuoli dogi biankpaana, Ki kpabidi bi ŋalimano kuli, Ki fagi ba hali bonŋanla Nani o gbanmandaano yeni, Ki fiini yaaba n bi kaa ti gbandi po.

¹⁴ N nuu gedi ki taa, nani ki tediga nni yene, I nibuoli piama. N wodi ki tinga piama kuli, Nani ban yen wodi a jena maama yeni. Niloba ki sagi, Ñoacuuluba ki yaadi ki yedi kuo.»

¹⁵ Naani li yali baa jigini li yuli Yua kubi li ki tuuni kani? Naani ku sasaagu baa yaa pia, Kafaama leni yua n tuuni leni ku? Naani u gbiamu n baa mubini, Ki yoagi yua n yugidi u? Naani li gbadunduli n baa Yugidi yua n muubi li?

¹⁶ Lani n teni ke o Diedo, Li Miali Diedo U Paaciamu Kuli Daano, Baa soani ku dondongu Asiiri jabunbuna po. O go baa soani bi bulicinba siiga U mu wun yaa co ki juu ba.

¹⁷ U Tienu, Isidayeli yenma baa tua mu. Isidayeli Tienu yua n Gagidi ki ŋani yeni Baa ti tua mupienu. Yuu n baa juu i konkoni leni a kongoaba dayenli.

¹⁸ Wuni n baa bolini o fuali leni O tikuanu kpiagidi cain. Li baa yaa tie nani yaa yiamo N kuodi yenma yeni.

¹⁹ O fuali nni tiidi yii n sieni kan yaa fuu, Ba biga baa fidi ki coadi yi.

Isidayeli niba yaaba n baa ciadi

²⁰ Landaali Isidayeli yaaba, yaaba n sieni Leni Jakob diegu nni yaaba n cia Kan go yaa dugi yua n den pua ba po. Bi baa yaa dugi o Diedo po bonŋanla, Isidayeli Tienu yua n Gagidi Ki ŋani yeni yaa po.

²¹ Yaaba n sieni baa guani ki cua. Jakob buolu, yaaba n sieni baa guani U Tienu U Paalu Daano kani.

²² Isidayeli, a niba yaa ti yabidi, Ki pundi mi ñincianma tanbiili, Niba waamu bebe n baa guani o Diedo kani. Mi bolinma baa tieni. Ti buudi mo baa jia.

²³ Lan bili ke yaa bolinma n baa tieni yeni, Li Miali Diedo U Tienu U Paaciamu Kuli Daano Teni ke mi tuonli cili mi diema nni.

Da jie mani Asiiri

²⁴ Li tie lani yaa po yo ke Li Miali Diedo U Tienu U Paaciamu Kuli Daano maadi Yaa maama n tie ne: «Yinba n niba yaaba n ye Siyon, Da jie mani Asiiri yaaba, Yaaba n pua yi leni u gbiamu. Bi yugidi bi gbadunduli yi po Ki wangi yi fala, Nani Ejipiti yaaba n moandi Ki tiendi yi maama yeni.

²⁵ Li yaa waagi waamu kuli, N pabienli baa gbeni yi po, N pabienli yeni mo baa cuani bi bolinma.»

²⁶ Li Miali Diedo U Paaciamu Kuli Daano Baa yoagi u fibu ki deli ba Nani wan den pua Madiani Horebi tangu kani maama. O gbiamu maa mi ñincianma po, O yugidi u nani Ejipiti po yeni.

²⁷ Landaali yaa cua, n baa faabi yi Leni Asiiri yaaba paalu, Bi tugikpiagili kan go yaa baa ki maa yi boacaba po.

Yibali nagidi Jerusalemi

²⁸ O tagini Ayati ki kpendi, o puadi Migoloni, Ki bili o tiadi Mikimasi.

²⁹ Bi tagini ki ban cuoni ki tua: «Tin baa n taani ki kali naani tie Geba. Ti jawaandi cuo Rama yaaba ke bi digibi. Sayuli dogu Gibeya yaaba sani.

³⁰ Galimi yaaba, mua mani ki figindi. Ŋan faami daa, Layisi! Ti solindi jagi a yuli po, Anatoti.»

³¹ Madamena yaaba sani ki yadi. Gebima yaaba lingi u wuonkaanu.

³² Dinla lige ke yibali baa cua ki sedi Noba kani, Yibali sedi ki tandi o nuu ki mua mi jama, Siyon juali po, Jerusalemi joabiga yeni po.

³³ Diidi n Diedo, Li Miali Diedo U Tienu U Paaciamu Kuli Daano Pua ki kua i beni leni mi jama, Yaa tiidi n se belibeli, o pedi yii N kpedi boncianla mo ki luni tiipo.

³⁴ Leni o yali, o pedi li fuali nni tiidi. Liban sediri tiŋami kuli, U Paaciamu Kuli Daano pedi ki luni yi.