Esayi 1 - U TIENU MAAMA TILI 2013

Esayi saawalo Juda diema yaaba po 1—23

¹ Amotisi bijua Esayi n den laa yaala ke li baa faa ki tieni Juda diema leni Jerusalemi dogu po. O den laa la Osiasi, Yotam, Ahasi leni Esekiasi n den kaa Juda diema gbandi po yaa yogunu.

Yaa buolu n ki pia yama

² Tanpoli, cengi! Ki tinga, amo n diadi a tubili ki cengi! O Diedo yedi mi naa maama: «N dini ki go wubi a bila, Ama bi fii ki yie n maama.

³ O nua bani yua n die o, O ŋunbo mo bani o daano N dindi o yaa tiagu nni. Ama Isidayeli ki bani liba, Bani n niba yeni ki pia yama.»

Li bonla kuli biidi Juda diema nni

⁴ Ŋain, fala baa baa yinba Ti tuonbiadi danba po, Yinba yaa buolu yaa tagili n kandi, Yaa buolu n bia, Yaa bila n jugi bi yula, Ki ŋaa o Diedo, Ki nuali ki fali Isidayeli Tienu, Yua n Gagidi ki ŋani, Ki buli o ki nunga!

⁵ Yinba yaaba n pugini yi yiema, Bi go baa pua yi le? Diidi li yuli kuli moali, ke li pali mo kuli ye leni fala.

⁶ Ki cili a taana ki ban pundi Hali li yuli siiga, Puu kuli ki pia laafia. Mi poagilima, a binbila leni a nala N ye i kaani kuli. Baa ŋuudi a nala yeni, baa fini a, Baa wuli a po mi kpama.

⁷ Yi diema pua nufanu! U mu buoni yi dogi. Bi canba di yi tinga bonluonkaala Yi nunbu nni. Laa paboanli tie nani yibalinba N bolini yaa diema yeni.

⁸ Siyon dogu bebe n ye Nani yaa koadiega n se duven tiidi kuanu nni, Nani yaa koasugili n se a noala kuanu nni, Nani yibalinba n gaani ki cebini yaa dogu yeni.

⁹ Li Miali Diedo U Paaciamu Kuli Daano, Yàá bi teni ke ti siiga bi tianba cia, Ti bi baa yaa tie nani Sodomi Leni Gomori dogi yene.

U Tienu pali n fa yaa jaanma po

¹⁰ Yinba Jerusalemi yudanba, Yaaba n jugi yi yula, Nani Sodomi yaaba yeni, Cengi mani o Diedo n yedi yaala. Yinba Jerusalemi niba, Yaaba n biidi yi yula, Nani Gomori yaaba yeni, Diadi mani yi tuba ki cengi Ti Tienu bali maama.

¹¹ O Diedo yedi daa: «N baa tieni be yo leni yi pada, Yaa n ki pia bianu? N guo leni yi petona padijuukaana, Leni yi naabila kpama. Mii bua yi naatona, Yi pebila leni yi ŋuabuana soama.

¹² Yi yaa cua n kani yaa yogunu, Ŋme n puogi yi yin ŋmaa n luolu po?

¹³ Da go kpendinni mani a pada, Laa pia n po fuoma. Da go padi mani n po tulale pada. Li nuulu fa n po. Cedi mani yi ŋmapaani leni yi fuodima jaanma, Ki taani leni yi taana ya n gagidi kuli, Kelima mii bua ki le yaa jaanma N yegi leni mi biadima.

¹⁴ N nani yi ŋmapaani jaanma Leni yi badi kuli. Likuli tie n po coagile, N coagi leni laa bonla.

¹⁵ Yi yaa yugidi yi nii ki baa jaandi, Se min buli n nunga, Ba yi yaa figili yi jaandi n kan cengi yi, Kelima yi nii kuli tie soame.

¹⁶ Wali mani ki ŋanbi yiba. Ñani mani n kani yi tuonbiada. Cedi mani mi biadima tienma.

¹⁷ Bangi mani mi ŋanma tienma, Ki lingi mi teginma. Guani mani o tugumoandaano U sanŋamu nni. Tieni mani yaala n tiegi ki kpienbiga po. Koani mani ki gaa li kpepuoli.»

¹⁸ O Diedo yedi: «Cua mani tin taani ki juogi. Yi tuonbiadi yaa moani ba nani mi soama, Se tin guani ki pendi nani a tatana yeni. Ba yi tuonbiadi yeni yaa moani colicoli, Se tin guani ki pendi paipai.

¹⁹ Li yaa tie ke yi cengi n maama, Mi diema bonŋanla kuli baa tua yi jiema.

²⁰ Ama yi yàá tuo ma, Ki tua niyiekaaba, Ki jugisiega n baa je yi.» O Diedo n yedi yeni.

Jerusalemi dogu ŋanbima

²¹ Li gaa lede ke ti dugidi dogu kpandi Ki tua nani li puoconconli yeni, Yaala n dagidi leni mi teginma n den ye naani? Ama moala wani bi nikpaanba n diedi u kaanu.

²² Fini Jerusalemi dogu, A tua nani yaa ŋanjilifa n joagini yeni, Nani ban cuugi mi ñima yaa daama nni yeni.

²³ A yudanba tie niyiekaaba, Bi juogidi leni a suuda. Bikuli faadi bu paabu Ki tiini ki lingi li suuli. Baa tiendi yaala n dagidi ki kpienbiga po, Li kpepuoli mo yaa fala ki tua ba liba.

²⁴ Lani n teni ke o Diedo, Li Miali Diedo Isidayeli Tienu, U Paaciamu Kuli Daano kadi ki yedi: «N baa paadi n koanginkaaba, Ki tuu n yibalinba bi panpaani.

²⁵ Jerusalemi, n baa soani a tuonli, N baa puli a u mu nni, Ki ñani a joagindi kuli, Ki ŋuudi ki ñani a cidi leni bu ciebu.

²⁶ N baa teni a bujiaba n tua Nani kpiama yaaba yeni, Ki teni a tundikaaba mo n go tua Nani ban den kpa tie maama. Li yaa puoli, bi baa fidi ki yini a: ‹Mi teginma leni ti dugidi dogu.› »

²⁷ Yaa bujiali n tiegi n baa faabi Siyon dogu, U dogu niba mo yaa lebidi bi tagu Ki tiendi yaala n tiegi, bi baa faabi.

²⁸ Ama mi yebiadima baa baa Bi niyiekaaba leni ti tuonbiadi danba, Yaaba n ŋaa o Diedo kuli mo baa bodi.

²⁹ I fe baa cuo yi kelima yin den padi Yaa pada tiidi kani yeni po. Yin den bua yii bonŋanla. Yi pala baa biidi boncianla Leni yin den gandi laa tiidi yi pada po.

³⁰ Yi baa tua nani yin den padi yaa pada Yaa tibu tinga ke bu faadi mali, Nani yaa salidinga n ki pia ñima yeni.

³¹ O gbanmandaano baa tadigi. O tuonli mo n tua mukaabi. Bi baa taani ki juu wani leni o tuonli kuli, Bi kan baa yua n baa gbindi ba.