Efesa 5 - U TIENU MAAMA TILI 2013

Tiadi mani ke yi tie U Tienu bila

¹ Lanwani, yin yaa ŋua U Tienu fuuli, nani o bibuadimu yeni.

² Yin yaa ye leni yiyaba leni mi buama, nani Kilisiti n den bua ti maama, ki puni o yuli U Tienu, ki tua yaa paabu leni yaa padili yaa nuulu n mani.

³ Yin da tuo mi conconma maama leni majoagindi buoluba kuli, bi mi ŋaliŋabuama maama n ña yi siiga ba waamu, kelima laa dagidi yinba bi nigagidiŋanba po.

⁴ Yin yaa kubi yi yula yi maama nni, ki da maadi mi cancaginmaama, mi gaadimaama leni o faajibiado kuli. Ama yin yaa tuondi U Tienu.

⁵ Yin bandi ke ba niyendo yua n tie mi conconma daano, yua n tiendi ti joagindi leni o ŋaliŋabualo yaala n tie o po nani i buli ŋoadima, kan baa U Tienu leni Kilisiti diema ŋalimano.

⁶ Oba kuli n da boandi yi leni mi mafanma. Li tie laa bonla po yo ke U Tienu pabienli se yaaba n yie o kuli po.

⁷ Lani yaa po, yin da pia ŋantaadoba kuli leni ba.

⁸ Yi den kpa tie li biigili yaaba, ama moala yi tie mi yenma yaaba o Diedo nni. Yi tagi n yaa tie nani mi yenma yaaba yeni.

⁹ Mi yenma n baa luoni yaa bonluonkaala tie li ŋanbili, mi teginma leni i moamoani.

¹⁰ Yin biigi ki bandi yaala n baa yaa mani o Diedo po,

¹¹ ki da pia ŋantaadoba kuli leni li biigili tuona, ya n ki pia fuoma, ama yin doagidi ke a bia.

¹² Li pia i fe, ba ki maadi ban tiendi yaa bonla ŋasiili nni.

¹³ Bi yaa doagidi laa niba n tiendi yaa bonbiadila mi yenma nni, mi yenma baa doagidi lan bia maama, kelima mi yenma doagidi likuli.

¹⁴ Lani yaa po yo, ke li yedi: «Ŋan fundi, fini yua n goa, Ki fii bi tinkpiba siiga, Ke Kilisiti baa yendi a po.»

¹⁵ Lani yaa po, yin yaa fangi mani yi yula leni yi tagi n tie maama. Yin da tie nani bi yanluodanba yeni, ama yin yaa tie nani bi yanfuodanba.

¹⁶ Yin daa u yogunu, kelima yaa dana n tie ne bia.

¹⁷ Lani yaa po, yin da tie yanluodanba, ama yin yaa fani ki moandi ki bandi o Diedo yanbuama.

¹⁸ Yin da ñu mi daama ki gaadi, kelima li baa teni yin biidi yiba, ama yin yaa gbie leni U Tienu Fuoma Yua.

¹⁹ Lani, yi baa yaa maadi leni yiyaba, ki togidi Pisominba leni yaa yani n pagi U Tienu leni U Tienu Fuoma Yua n gobidi yi, ke yi yini yaa yani. Yaa yiini mani ki pagi o Diedo leni yi pala kuli.

²⁰ Yaa tuondi mani U Tienu yua n tie Baa yogunu kuli li bonla kuli po, ti Diedo Jesu Kilisiti yeli nni.

Ku diegu yema

²¹ Yin yaa miindi yi yula yiyaba kani kelima yin pia Kilisiti po yaa fangili yaa po.

²² Yinba bi puoba, yuakuli n yaa miindi o yuli o calo kani, nani wan miindi o yuli o Diedo kani maama.

²³ O joa tie o pua yudaano, nani Kilisiti n tie o Nitaanli yudaano maama, yaali n tie o gbanandi, wani n tie li Candaano.

²⁴ Nani Kilisiti Nitaanli n miindi li yuli Kilisiti kani maama, li pundi ke bi puoba n yaa miindi bi yula bi ciaba kani li bonla kuli nni.

²⁵ Yinba bi puodanba, yuakuli n yaa bua o pua, nani Kilisiti n bua o Nitaanli maama, ki puni o yuli ki kpe li po.

²⁶ O den tieni yeni ki baa ŋuudi ki ŋanbi li leni mi ñima leni U Tienu maama.

²⁷ Lani ke wan teni o Nitaanli yeni, n pundi ki sedi o kani ki pia ti kpiagidi, kaa pia joagindiba, golimiba leni yaala n gundi kuli. Ama lin gagidi ki yaa ŋani cain, kaa pia ban baa fidi ki kuli li leni yaala.

²⁸ Li pundi ke bi puodanba moko n yaa bua bi puoba nani ban bua bi yula maama yeni. Yua n bua o pua kuli, bua o yuli.

²⁹ Oba kuli naa nani o gbanandi. Ama o dindi ti, ki kubi ti nani Kilisiti moko n kubi o Nitaanli maama,

³⁰ kelima timo tie o yaa gbanandi buoli.

³¹ Li diani: «Li tie lani yaa po ke o joa baa ña o baa leni o naa kani, ki taani leni o pua, bani nibilie yeni n tua gbananyendi.»

³² Line n tie yaa bondoaginkaala n yabi. N maadi laa maama Kilisiti leni o Nitaanli yaa po yo.

³³ Li mayuli yinba yaa po tie, ke joa kuli n yaa bua o pua nani wan bua o yuceli maama, pua kuli mo n yaa fangi o calo.