Efesa 4 - U TIENU MAAMA TILI 2013

Li miapanli Kilisiti nni 4—6 Yaa taanyenma n ye li dandanli nni

¹ Lani kuli yaa po, n tundi yi, mini yua n tie li kpaadili kelima n tie o Diedo yua. Moandi mani yi tagu n dagidi leni wan den yini yi yaala yaa po.

² Yin yaa ye leni yiyaba leni li yumiinli, mi dingima leni li juunli. Juuni mani leni yiyaba leni mi buama.

³ Moandi mani hali bonŋanla ki kubi mi Fuoma taanyenma, kelima mi yanduanma n loli yi yenma maama po.

⁴ Gbananyendi n ye, mi Fuoma moko tie yenma, suginyenma mo n ye, U Tienu n den yini yi yaama yaa po.

⁵ O Diedo yendo bebe n ye, dandanyenli bebe n ye, mi batisima moko tie yenma.

⁶ Tienyendu bebe n ye, yua n tie Baa tikuli po, yua n die tikuli, ki ye tikuli siiga, ki go ye tikuli yaa niinni.

⁷ Ama ti siiga yuakuli den baa li ŋanbili nani Kilisiti n puni yuakuli bu paabu maama.

⁸ Li tie lani yaa po ke li yedi: «Wan den doni hali tanpoli, O den cuo a kpaada, Ki go puni bi nisaaliba bu paabu.»

⁹ Lan yedi ke o den doni tanpoli po yeni, li bagi be? Li bagi ke o den kpa jiidi hali ki tinga tiipo.

¹⁰ Wani yua n den jiidi yeni, n tie yua n doni ki pendi hali tanpoli, ki baa gbieni i kaani kuli.

¹¹ O puni bi nitianba ke ban yaa tie tondiba, bi nitianba ban yaa tie saawalipuaba, bi nitianba ban yaa tie o Laabaaliŋamo wangikaaba, bi nitianba mo, ban yaa tie yankpaaba, bi bangikaaba.

¹² O den tieni yeni ki bua ki yaa ŋanbidi o nigagidiŋanba cain, ki bogini ba ban yaa tuuni, ki teni wani Kilisiti gbanandi n yaa kpedi ki suagi liiga.

¹³ Lani n baa teni tikuli n pundi ki baa yaa taanyenma n ye li dandanli nni leni U Tienu Bijua yaa bandima, ki tie yaaba n kpedi o sanŋoadima nni, hali ki dagidi cain nani Kilisiti n dagidi cain maama.

¹⁴ Lanwani, ti kan go yaa tie nani a biwaala yeni, ki lengidi kelima bi niba nunfanbiadibu leni bi boandi n kpendinni yaa bangima po.

¹⁵ Ama ti yaa maadi i moamoani leni mi buama, ti baa yaa kpedi ki dagidi li bonla kuli po, Kilisiti nni, wani yua n tie li yuli.

¹⁶ Li tie wani leni o yaa todima po yo, ke ti gbanandi kuli taani ki tuugi yenma, kelima ti gbanandi tuga kuli ya n kubi ti, ke ti pa bonŋanla po. Yeni yaa po ti kpedi kelima gbananbuolu kuli tuuni u tuonli nani lan pundi maama, ki ŋanbidi tiba mi buama nni.

Yaa miapanli n ye Kilisiti niinni

¹⁷ Lanwani, min yedi yaala leni min kadi ki waani yi yaala, o Diedo yeli nni tie line: Yi tagi n da naani leni bi nilanba yaa tagi, bani yaaba n ŋua bi yantiana ya n tie fanma fanma.

¹⁸ Bi yama biigi. Bi tie canba U Tienu miali po, kelima bi yanboanma leni bi pajuagili yaa po.

¹⁹ Baa go bani i fe n tie yaala. Bi puuni bi yula mi conconma po, ki baa yaa tiendi ti joagindi buolu kuli, ki kuandi bi yama lienni ki pugidi.

²⁰ Ama yinba, yii den bandi Kilisiti yeni ka.

²¹ Yi den gbadi o maama, bi den bangi yinba yaaba n daani yaa moamoani n ye wani Jesu nni.

²² Lani n tie ke yin da go tie nani yin den kpa tie maama. Ama yi siiga yuakuli n landi o tagikpelu nani li liadili yeni, o yanbuabiadima boandi n den biidi yuu.

²³ Yin baa mani li yantiapanli.

²⁴ Yin la mani u tagipaanu, yuu n tagi nani U Tienu n bua maama, ki ŋua i moamoani n kpendinni yaa teginma leni yaa gagidiŋanma.

²⁵ Lani yaa po, yin cedi mani mi faama, yi siiga yuakuli n yaa maadi o lielo i moamoani, kelima tikuli tie gbananyendi yaaba.

²⁶ Yi pala yaa fii, yin da tieni tuonbiadi, ki da tuo u yienu n kua ke yi pala daa kuugi.

²⁷ Da pa mani ku tuotabigu yudaano u kaanu yi pala nni.

²⁸ Yua n den kpa su, wan da go su. Ama wan yaa tuuni li tuonli nani lan dagidi maama, ke wan yaa pia wan baa fidi ki pa a luoda yaala.

²⁹ Majoagindiba kuli n da ña yi ñoana nni. Ama yin fidi yaa yogunu kuli, yin maadi yaa maama n ŋani, yaama n baa ŋanbi ki go seligi yaaba n gbadi ma.

³⁰ Yin da biidi mani U Tienu Fuoma Yua pali, wani yua n tie yi po mi maalima, ki doagidi ke yi daafaabima daali kpendi.

³¹ Yin cedi mani li mutuoli, ki nanga, li pabienli, ku fuugu, ku tuotabigu leni ku tugutongu buolu kuli n ña yi siiga.

³² Yin yaa mani leni yiyaba, ki gba yiyaba po mi ninñima, ki tiendi yiyaba po sugili nani U Tienu n den tieni yi po sugili, Kilisiti nni maama.