Efesa 3 - U TIENU MAAMA TILI 2013

Poli tuonli yaaba n tie bi nilanba po

¹ Lanwani, mini Poli yua n tie Jesu Kilisiti kpaadili, jaandi yinba bi nilanba po.

² Yi gbadi U Tienu n tieni n po yaa ŋanbili, ke min boagidi li leni yi.

³ Li tie U Tienu doagidima po yo, ke n bandi laa bondoaginkaala nani min diani yi po maama waamu.

⁴ Yi yaa cogi, yi baa fidi ki bandi min gaa maama ki bandi Kilisiti bondoaginkaala.

⁵ U Tienu ki den doagidi laa bondoaginkaala, yaa nifiima n pendi po, nani moala o Fuoma n doagidi la o tondiba leni o saawalipuaba yaaba n gagidi o po maama.

⁶ Laa bondoaginkaala tie line: O Laabaaliŋamo po, bi nilanba leni Jufinba taani ki dini faayenli, ki tua gbananyendi, ki baa U Tienu ñoaniani Jesu Kilisiti nni.

⁷ U Tienu den ŋanbi n po, ki puni nni ke n tua o Laabaaliŋamo naacemo, kelima o paalu po.

⁸ Mini yua n tie puoli yua U Tienu nigagidiŋanba kuli siiga, n den baa laa ŋanbili, ki baa yaa wangi bi nilanba o Laabaaliŋamo, yua n doagidi Kilisiti n pia yaa ŋalimano n yabi hali ke li kandi maama.

⁹ O go teni ke n doagidi bi niba kuli po laa bondoaginkaala n baa tieni maama. U Tienu yua n tagi li bonla kuli wuoni o bondoaginkaala yeni, hali yaa yogini n kpeli.

¹⁰ O bua moala, kelima Kilisiti Nitaanli po, i paaciami danba leni li bali danba yaaba ye tanpoli n bandi, wani U Tienu yanfuoma, yaama yaa buoli n yabi.

¹¹ U Tienu den jagi ke o baa tieni la hali yogu, ki go tieni la ki dudi, kelima ti Diedo Jesu Kilisiti yaa po.

¹² O yaa niinne ke ti fidi ki nagini U Tienu kani leni ti dugidi, kelima tin pia yaa dandanli o po yaa po.

¹³ Lanwani, n mia yi, yin da luo li papaali min laadi yaa fala yi po yaa po, kelima li baa yaa tie yi po kpiagidi.

Kilisiti buama

¹⁴ Li tie lani yaa po yo, ke n gbaa Baa kani ki jaandi o,

¹⁵ wani yua n puuni diegu kuli li yeli, lan tie ŋanduna nni leni tanpoli po kuli.

¹⁶ N miadi wani U Tienu, wan pa yi nani o kpiagidi ŋalimano n yabi maama, ke o Fuoma n yaa tuuni yi niinni leni u paalu, ki teni yin yaa pa hali yi pala tugu nni,

¹⁷ ke Kilisiti n yaa ye yi pala nni kelima li dandanli po. N go mia o ke wan pa yi yin yaa pia i jiini leni li tanpuuli mi buama nni, ki se ke li pa.

¹⁸ Lani n tie yin fidi ki taani leni bi nigagidiŋanba kuli, ki bandi wani Kilisiti buama n pia, ki foagi, ki ñua ki go kpedi maama,

¹⁹ ke yin bandi laa buama, yaama n yabi ki pendi tin baa fidi ki bandi yaala, hali ke U Tienu yedagidikaama n gbie yi pala nni.

²⁰ U Tienu yua n fidi ki tiendi yaala n yabi ki pendi tin mia o yaala leni tin tia yaala kuli hali ke li kandi, kelima o paalu yuu n tuuni ti niinni yaa po,

²¹ wani n yaa baadi ti kpiagidi Kilisiti Nitaanli siiga leni Jesu Kilisiti yaa po, hali nifiima n tuu nifiima, hali yaa yogunu kuli. Amina!